सिलु लिपा दयेकूगु निगू नेपालभाषा निगू भिडियो संकिपाय् नायक जुयाः म्हितादीम्ह भाजु खः तुलसी डंगोल । वय्कलं आपालं नेवाः ख्यालः नं म्हितादीगु दुसा उकिं पुरस्कृत नं जुयादीगु दु । वय्कलं अभिनय जीवनयात कयाः खल्हाबल्हा न्ह्यब्वयेगु झ्वलय् थःगु अनुभव थुकथं कनादी ।
थौं कन्हय् छु यानाच्वनादिया ?
जिगु ज्या धइगु धार्मिक पर्यटन खः । कोरोना महामारीया कारणं यानाः ज्या बन्द जुयाच्वंगु दु । थौं कन्हय् अथें च्वनाच्वना धायेमाल ।
आः तक गुलि संकिपाय् म्हितादी धुन ?
न्हापां जिपिं पासापिं जानाः दयेकूगु निगू फिल्म ‘निपाः ख्वाःपाः’ व ‘न्हिला न्हिला हुँ’ म्हितागु खः । वयां लिपा ‘प्रेम कथा, तिनतिकः महाविकः, गज्याः गज्याःपिं मनू दु थन’ आदि फिल्मय् अभिनय यायेधुन । लिसें न्यागू स्वयां अप्वः खस भाषाया फिल्म नं म्हितेधुन ।
अभिनय क्षेत्रय् गुकथं दुहां झाया ?
जि मचानिसें अभिनय यायेगु सोख दु । उकथं जिपिं स्वम्ह पासापि दु । जि अले श्यामकृष्ण श्रेष्ठ व दिनेशलाल श्रेष्ठ जिपिं स्वम्हं नापं ब्वलंपिं छगू हे त्वालय् झ्वलिं छेँय् । अथे हे आखः नं छगू स्कुलय् ब्वनेगु झ्वलय् न्हापा ख्यालि खँ ल्हानाः मनूतय्त न्हिकेगु खः । अथे हे जिमिगु त्वालय् आपालं कलाकारत बालं च्वनाच्वंगुलिं यानाः कलकारतय् छुं नं कथंया ज्याझ्वः जुल कि जिपिं स्वयेत वनेगु । उकथं मचायेक जिमिके अभिनय क्षेत्रय् आकर्षण जुल । अथे हे खँल्हाबल्हाया झ्वलय् छकः ख्यालि जुजु मदनकृष्ण श्रेष्ठं छिमिसं नं अभिनय यायेमाः धकाः धाल । वय्कःया उगु प्रेरणा नं जि अभिनय क्षेत्रय् लाःगु खःसा वयां लिपा जिपिं क्याम्पय् वनेधुंकाः नं नेपालभाषा ख्याल कासाय् ब्वति कायेगु याना । न्हापा क्याम्पसया दथुइ हे छधा प्याखँ व ख्यालः कासा जुइगु अज्याःगु कासाय् क्याम्पसपाखे ब्वति कायेगु निरन्तर जुल थ्वहे कथं अभिनय यायेगु ज्या नं निरन्तर जुयाच्वन । न्हापा न्हापा त्वाः त्वालय् अप्वः धयाथें थीथी साहित्य सम्मेलन जुयाच्वनी उकियानाः नं जि अभिनय क्षेत्रय् लाःगु खः ।
रामशेखर नकर्मि च्वयादीगु छु छु प्याखनय् अभिनय यानादिया ?
जि रामशेयर नकर्मि च्वःगु न्यापु ख्याल म्हितागु, भजगोविन्द, वाथं गाथाय् चुलुइ यः, खुँयात ज्वं ज्वं, नकतिनिया लभस्टोरी ।
सिरपा त्याकादीयागु दु् ला कि मदु ?
रामशेयरया फुक्कं प्याखनय् वा ख्यालखय् सिरपा त्याकूगु दु । उकथं पलिस्था आयोजना याःगु ख्यालः कासाय् बेस्ट डाइरेक्टरया सिरपा नं त्याकूगु दु ।
खस नेपाली भाय्या नाटकय् नं अभियन यानागु दु ला ?
२०४१ सालय् प्रज्ञा भवनय् प्रदर्शन जूगु गाईजात्रा अभिनय यानागु खः । ‘आइडिया’ उकि जिमिसं पुरस्कार नं त्याका । उकिया निर्देशक व च्वमि मदककृष्ण श्रेष्ठ हे खः । उकथं हे नेपाल टेलिभिजनं प्रशारण जूगु कोरस नांया टेलिप्याखनय् नं गुगुं सिरियल तक म्हितागु दु ।
आः नं अभिनय यानाच्वनादीगु दु ला ?
थ्व स्वयां न्ह्यः स्वदँ धयाथें ख्वताबजी नं अभिनय यानाः अथे हे पासापिसं इनाप यात धाःसा आः नं अभिनय यायेगु यानाच्वन ।
फिल्म म्हितेबलय् व टेलिसिरियल म्हिेतबलय् गुगुं न्ह्यइपु ?
फिल्मय् स्वयां टेलिसिरियल म्हिते न्ह्याइपु । टेलिसिरियल म्हिेतबलय् टिम वर्क जुइ ।
अभिनय यानाः आर्थिक रूपं गुलि तक ताः लाके फत ?
अभिनय जिगु शोख जक खः । थ्व व्यवसाय कथं मखु । अभिनय यायेगु झ्वलय् पासापिसं गुलि बिल उकी हे सन्तुष्ट जुयाच्वनागु दु ।
न्हापा प्याखनय् म्हितेबलय् व आः गुलि पाः ?
आकाश जमिन पाः । न्हापा प्रविधि मदु । क्यामरा छगः ज्वनेत हे थाकु । अबलय् नेपालय् साउण्ड रेकर्ड तकं यायेत थाकू आः ला प्रविधिं यानाः आपालं अःपू धायेमाः । अझ सुटिङया झ्वलय् मनूत म्वःम्वः जुइक स्वः वइगु सुटिङ यायेगु निंतिं अभित चीकेत तकं थाकू । तर थौंकन्हय् अज्याःगु समस्या मदु ।
न्हापा स्वकुमित आपाः दु कि आः ?
न्हापा स्वयां आः स्वकुमि आपाः दु, थौंकन्हय् द्वःछि स्वयां अप्वः ध्यबा पुलाः नं प्याखँ स्वइपिं दु । न्हापा जिमिसं अभिनय यायेगु झ्वलय् टिकट कयाः स्वइपिं हे म्हो । सुयातं टिकट छपाः कयाः प्याखँ स्वयेत इनाप यात धाःसा छिमिसं म्हितुगु प्याखँ नं टिकट कयाः स्वयेमाःला धाइगु ।
ताः ई निसें अभिनय यानादीगु दु, थुकिं गुलि तक सन्तुष्टि दु ?
सन्तुष्टि दु हे धायेमाः । सन्तुष्टि मदुगु खःसा आः तक निरन्तर अभिनय मजुइगु जुइ ।
ताः इलंनिसे अभिनय यानादिल । छु गज्याःगु सम्मान चुलाकादिया ?
कलाकारया रूपं आम मनूतय्सं सम्मान याः । तर छुं गुगुं संस्था धाःसा आः तक सम्मान कयागु मदु । हानं सम्मानया निंतिं स्वयातं नं आः तक चाकडी यायेगु बानि मदु । अथेजुयाः संघसंस्थापाखे सम्मान कयागु मदु ।
दुःख मताला उकथं सम्मान मजूगुलिं यानाः ?
दुःख मताः नेपालभाषाया उत्थान जुइमाः धकाः अभिनय यानागु खः । अथेजुयाः दुःख मताः । नेपालभाषाया कला क्षेत्र विकास जुइमा धइगु चाहना खः । उकिं यानाः थौंकन्हय् आपालं नेपालभाषा कला विकास जुयाच्वंगु दु । थ्वहे नं छगू सन्तुष्टि खः ।
अन्तय् पेज थ्रीपाखें छु धायेगु दु ला ?
पेज थ्री जितः लुमंका दिल । उकियात कयाः सुभाय् नेपालभाषाया कला क्षेत्र अझ चकनाः वनेमाः धइगु चाहना याना । लिसे पेज थ्रीया न्हापा जि स्वयेगु यानाः थौंकन्हय् धाःसा तापाक च्वनेमाःगुलिं पेज थ्री स्वयेगु त्वःफिउगु दु ।
(पेजथ्री बाःछिपौया निंतिं दिलिप शाही पाखे न्ह्याकुगु खँल्हाबल्हा )
