कोरोनाया रोकथामया छगू उपाय् धकाः नेपाल सरकारया कार्यान्वयन पला कथं सवारी साधनया जोरबिजोर नीति थौंकन्हे महानगरया ट्राफिक विभागं न्ह्याकाच्वंगु दु । महानगर ट्राफिक विभागं छन्हु निन्हु छ्वासुकीगु अले हाकनं निन्हु प्यन्हु क्वातुकीगु नीति अन्तर्गत न्ह्याकाच्वंगु थुगु कार्यान्वयन पक्ष स्वनिगःया जनता तसकं हे अलमलय् खने दु । स्वनिगःया हरेक वर्गया निंतिं अत्यावश्यक सवारी साधनया रूपय् मोटर साइकल थौं कन्हे मदयेकं मगाः । तर विशेष रूपं नं महानगरीय ट्राफिक प्रहरीं धाःसा मोटरसाइकलयात हे जक प्राथमिकता बियाः कार्यवाही जुयाच्वंगु दु ।
मोटरसाइकल ज्वंसां नं आकारया ल्याखं चिग्वः जुयाच्वंगु कारण तब्याःगु सडकया पेटीइ हे कार्वाहीलय् लाःगु मोटर साइकलयात न्हिच्छीया निंतिं धयाथे जफत यानाच्वंगु दु । तर ततःग्वःगु गाडीयात कार्वाही जुयाच्वंगु मदु । ट्राफिक व्यवस्थापन अन्तर्गत लँय् पार्किंग यायेमदु धकाः १ मिनेट हे दिके मबिइगु लँय् थौं अधोषित पार्किंग स्थल जुयाच्वंगु दु । ट्राफिक ब्यवस्थापनं आनाधिकृत रूपं पार्किंग स्थल कथं छ्यलाच्वंगु दु । थुगु विषयलय् स्थानीय सरकारं कार्वाहीया निंतिं अज्योगु स्थानयात छ्यलाबिइके मजिउगु कारण उगु थाय् झीसं पुलागु करं यात्रा सुचारुयायेगु निंतिं दयेकुगु सडक खः ।
सवारी साधनया जोरविजोर नीति लागूयाःसां नेपाल सरकारं सरकारी अफिस वा नीजि अफिस वा छुं नं ज्याकुथिइ धाःसा जोर बिजोर लागु याःगु मदु । न्हिंया न्हिथं अफिस वनेगु नितिं ला मनूत सार्वजनिक यातायात वा छुं नं यातायातया साधनय् च्वना वने हे माः । थथे मोइक्रोबस जायेक मनू च्वंसां ट्राफिकं धाःसा कार्वाही यानाच्वंगु मदु । बसय् ट्याक्सी कार्वाही यानाच्वंगु मदु तर केवल सवारी साधनयात जक जोर बिजोर यायेगु धयागु तसकं हे अदुर्दशी खँ खः । थज्योगु हे नीतिं यानां थौं नेपालय् कोरोना संक्रमितया दर भारतया सिबें अप्वये धुंकल । मेमेगु देशय् धाःसा कोरोना संक्रमितया ल्याः म्हो जुजुं वनांच्वंगु दु तर झीथाय् धाःसा थुगु दर झन झन हे आपाया च्वंगु दु । अवश्य नं सरकारया नीति स्वनिगलय् चाप म्हो यायेगु खःसां मेमेगु देशया नक्कल याना जोर बिजोर सवारी साधन न्ह्याकेगु ज्याखँ झीथाय् कोरोना नियन्त्रणय् वयाच्वंगु मदु । झन थुकीं नकारात्मक प्रभाव लिसें कोरोना संक्रमण अप्वयाच्वंगु दु । सवारी साधनयात कार्वाही यायेगु निंतिं ट्राफिक प्रहरितय्सं नं छुं विशेष कथंया सुरक्षा नालाच्वंगु खनेमदु । कार्वाहीया दौरान जुइगु खँल्हावल्हा वा विवादया इलय् सामाजिक दुरी नं कायाम जुयाच्वंगु मदु । स्थानीय सरकारं थुकी बारे बिचाः यायेमाःगु अवस्था दु ।
