स्वनिगःया नगर प्रमुखपिं कोरोनाया चपेटय् लाना कोरोना संक्रमित जुयाच्वंगु अवस्थाय् स्वनिगःवासीं थौंया स्थीतिइ थःत सुरक्षित गुकथं तायेके फइ ? विशेषत नगरप्रमुखपिं कोरोनाया कारण थःपिं क्वारेन्टाइनय् च्वनेमाःगु अवस्थाय् झीसं निर्वाचित यानापिंसं झीगु नीतिं कोरोनाया ल्वय् पनेत गज्योगु कार्ययोजना दयेकाच्वन वा दयेकल धयागु खँय् झीसं च्यूता तये हे माः । कोरोना संक्रमणय् लायेधुंकाः क्वारेन्टाइनय् च्वनेगु हे वासःया रूपय् कयाच्वंगु दु । तर नं सर्वसाधारणयात नं थथे हे क्वारेन्टाइनय् च्वनेगु वातावरण दयेका वनेगु खः की कोरोनायात गुगु कथं म्हो याना यंकेगु धयागु खँय् छुं ठोस नीति नियम वनेगु खः ।
थौंया अवस्थाय् स्वनिगःवासीतय् सामान्य जीवनशैलीइ लिहां वनाच्वंगु दु । तर नं कोरोनाया त्रासया दथुइ सामान्य खने दयाच्वंगु मदु । सुरक्षाया थीथी घेराय् दुने लानाच्वंपिं नगर प्रमुखपिं ला कारोनाया ल्वचं कयाच्वंगु दु धाःसा सर्वसाधारणया हविगत छु जुइ ? थौंया अवस्थाय् कोरोनाया संक्रमणयात थःपिन्त जूगु अनुभव कथं गुकथं नियन्त्रणय् हयेमाली धयागु खँय् नगरप्रमुखपिन्सं आइसोलेसनय् च्वनाः प्रभावकारी नीति दयेकेमाःगु अवस्था दु ।
कोरोना ल्वय्या लवः कायेगु निंतिं थी थी बिमा कम्पनिं कोरोना बिमाया घोषणा याःगु दु । थुगु हे बिमा पोलिसीया अन्तर्गत यदि कोरोना जुल धाःसा सामान्य न्यूनत्तम रकमं हे बिमा रकम दावी याये दइगु परिस्थीति दयेकाब्यूगु दु । तर थुगु हे पोलिसी अन्तर्गत छुं नं गैर सरकारी पिसिआर टेष्ट रिपोर्ट सिबें सरकारी पिसिआर टेष्ट रिर्पोट यात मान्यता बिइगु निर्णय नं यानातःगु दु ।
कोरोनायात आः सर्वसाधारणं नं इजि मनिया रूपय् कोरोनाया बिमाया रकम कायेत लालायित जुयाच्वंगु दु । कोरोनाया बिमा नीति अन्तर्गत सरकारी पिसिआर रिपोर्टयात जक मान्यता बिइ धयागु खँय् मनूत चा न्हिं मधाःसे सरकारी रिपोर्टया निंतिं पियाच्वंगु दु । बिमा कम्पनी पाखें छुं रकम असूल यायेगु नीतिं मनूत थन स्वनिगःया मू बस्तियात कोरोनाया इपिसेन्टर दयेकाच्वंगु दु । गुगु नं इलय् थुकीं थुगु इपि सेन्टरं छगू बिस्फोट हयाबिल धाःसा स्थीति झन भयावह यानाबिइफु ।
चैत्र मसान्तं लकडाउन शुरु जूगु हुनिं थौं छुं मखुसां खुला धयाथे ई वने धुंकुगु दु । बजार संचालनय् वयाच्वंगु दुसां छुं विशेष चहलपहल वा आर्थिक अवस्था सुदृढ जुयाच्वंगु अवस्था मदु । गनं पिने वने धयागु हे कोरोनां झीत पियाच्वंगु दु ला धयाथें त्राशया वातावरण दु । मूलत थुज्योगु परिस्थीति सरकार पाखें कःघाये मफूगु वा नियन्त्रण याये मफूगु थज्यागु आर्थिक नीति खः गन सरकारी भ्वँ छपाः दये तुं स्वनिगलय् अःपुक्क हे धेबा म्हेगु ज्या जुयाच्वंगु दु । सरकारयात माःगु भ्वँ जक चुलात की धेबा वइ ।
स्वनिगःया थज्योगु स्थीतियात आः नगर प्रमुखपिंसं वाःचायेके माः । कमसेकम थुज्योगु पिसिआर टेष्ट याये थाय् गनं संक्रमित मनूत थःगु पोजिटिभ रिर्पोट कायेत चान्हिं लाइन च्वनाच्वनिं अज्योगु थाय् स्थानीय क्षत्र सिबें भचा तापाः थाय् अतिकं सुरक्षित तवरं जुइमाः । रिपोर्ट संकलन यायेगु निंतिं नं ध्वातुमतु ध्वाना लाइन च्वने माःगु अवस्थाय् कोरोना नियन्त्रण याये झन थाकुइगु खने दु ।
