निर्माणाधीन बौद्धकालीन ऐतिहासिक संकिपा घोषकया च्वमि धर्मरत्न शाक्य (६३ दँ) थौं न्हिनय् वासः याकुयाकुं मन्त । ताः ई न्ह्यः निसें अचाकलि (प्यारालाइसिस्) ल्वचं थ्युथ्युं वय्क अन्तिम इलय् न्ववायेगु तकं मफया वंगु खः । वय्कःया अन्त्यष्टि थौं हे चुपिन घाट ख्वपय् क्वचाःये धुंकुगु दु ।
युवा बौद्ध पुचः ख्वपया संस्थापक लिसें मदुम्ह शाक्य उगु हे संस्थाया अध्यक्ष जुया ज्या यानाच्वंम्ह खः । वय्कया संलग्नताय् बुद्ध धर्मया प्रचार प्रसारय् थी थी ज्याझ्वः नं जुयाच्वंगु खः । बौद्धकालीन ऐतिहासिक संकिपा ‘घोषक’ नं वय्कलं हे च्वयादीगु खः । थुगु संकिपा निर्माणया अन्तिम चरणय् थ्यनाच्वंगु खँ ‘घोषक’ या निर्माता द्वय रोशन बज्राचार्य व प्रेमा शाक्यं कनादिल ।
वय्कलं नांजाःगु बौद्ध ख्यःया सिरपा ‘पंचवीर सिरपा’ नं निक्व त्याकादिइ धुंकुगु दु । मदुम्ह शाक्यया जहान लिसें काय् छम्ह म्ह्याय् छम्ह दु ।
वय्कःया सुखावती भुवन वासंया व छेँजःयात धैर्य धारणाया कामना याना ।
