भारतीय बलिउडया कलाकार सुशान्त सिंह राजपूत सीगु लच्छिं मल्याये धुंकल । तर आः तक्क नं सुशान्तया प्रशंसकतय्सं सुशान्तं आत्महत्या यात धकाः पत्याः याये मफूनी । थ्व हे दौरान छगू पारानर्मल विज्ञ स्टीभ हफ नांयाम्ह मनुखं सुशान्त सिंहया आत्मा लिसे संवाद याना धकाः युट्युबय् भिडियो तयातःगु दु ।
स्टीभ हफया धापू कथं सुशान्तया प्रशंसकतय्गु यक्व हे अनुरोध वःगु कारण स्टीभ हफं थःम्हं हे निर्माण याःगु यन्त्रया ग्वाहलिं भौतिक रुपं मदयेधुंकुम्ह सुशान्त लिसे खँल्हाबल्हा यानागु धकाः भिडियो पोष्ट यानातःगु दु ।
स्टीभं थःगु फेसबुक पेजय् पोस्ट च्वसें – ‘जितः वं तप्यंक लिसः बियाच्वंगु दु । न्हापा सिबें बांलाक्क व स्पस्ट लिसः बियाच्वंगु दु । याकनं हे झी मेमेगु सेसन नं याना यंके । माःमागु न्ह्यसः न्यने ।’
सुशान्त लिसे खँल्हाबल्हा
न्हापांगु खँल्हाबल्हाय् स्टीभं सुशान्तयात नां कयाः हे सःताः छ गथे याना सिइगु खः लुमंला धकाः न्यनातःगु दु । थुकीया लिसः कथं स्टीभं दयेकातःगु मेसिनं सः वइ की – थन यक्व हे जः दु । जितः जः लुयाच्वंगु दु । आ भचा म्हो जुयाच्वंगु दु । इमिसं छन्त खनाच्वंगु दु । जितः धात्थें द्यः लिसे नापलाये मास्ति वयाच्वंगु खः । छं स्युला जितः छु धाये मास्ति व? जि ठिक जू थन ।
सुशान्त लिसेया मेगु न्ह्यसः कथं छं छाये थःगु ज्यान बियागु ?
लिसः ह्युपाःया निंतिं
सुशान्तया थुगु लिसः बियाच्वंगु इलय् वः लिसें मेगु नं सः दुगु स्पष्ट जुइ । थुकि छम्ह मिजं सः व मिसासः नं दु ।
सु खः ले स्टीभ हफ ?
स्टीभ हफ आत्मालिसे संवाद याइम्ह पेशावर पारानर्मल विज्ञ खः । विगत १० बर्षं निसें थुगु ज्या पेशावर रुपं यानाच्वंम्ह मनू खः । स्टीभं थःगु ज्याखँ अःपुइकेगु नितिं थःम्हं हे छगू यन्त्र sprit communication device नं दयेकुगु खः । स्टीभं हलिउडया कलाकार पिं प्याट्रिक स्वेज व माइकल ज्याक्शनया आत्मालिसे संवाद याःगु भिडियो नं थःगु युट्युब च्यानलय् तयातःगु दु ।
स्टीभ हफ सिबें न्ह्यो नं निम्ह पारानर्मल एक्पर्ट डा. सशिनां व शन लार्शनं नं सुशान्तया आत्मालिसे खँल्हाना धकाः दावी याये धुंकुगु दु ।
सुशान्तया केसय् प्रशंसकतय्त पुलिसं बांलाक्क अनुसन्धान याइमखु धैगु लकस ब्वलनाच्वंगु दु । थ्व हे सिलसिलाय् यक्व मनूत भावुक जुसें सुशान्तं आत्महत्या याःगु मखुसे वैगु हत्या याःगु धैगु खँय् विश्वास यानाच्वंगु दु ।
