सामाजिक संजालय् सोफिया थापां नखःचखः हनेगु खँय् छपू म्ये हःगु दु गुगु म्ये रिलिज जुइ सातकं हे विवादय् लाःगु दु ।
‘अबको तीज नो ब्रत प्लीज म्ये रिलिज जुइवं हे हिन्दु धार्मिक संगठनया नामं मनूतय्सं फोनयाना ब्वबिइगु व ख्याच्वः बिइगु शुरुयाना हःगु इकान्तिपूरय् धयातःगु दु । थुगु म्ये सामाजिक संजालं लिकायेत यक्व हे दवाव वयाच्वंगु खँ नं सोफियां धयातःगु दु । तर थःम्हं हालागु म्येय् गननं धर्मयात मस्यंकागु तर्क सोफियां ब्यूगु दुसा सोफियाया हे कथं तीजय् ब्वलनाच्वंगु विकृति चिइके माः धैगु ताःतुनागु खः धकाः स्पस्ट याःगु दु ।
“भातया आयु ताःहाकः जुइमा धकाः लः हे मत्वंसे तकं ब्रत च्वनेगु उसाँय्या ल्याखँ नं ठीक मखु । अले तुति सिलातःगु लः त्वनेगु धैगु समानताया सोच तयाच्वंपिनिगु निंतिं गलत खः धाःसें जिं म्ये हालागु खः । तिसां तियाः पार्टियाना फुजुल खर्च याये मते धैगु सन्देश बियागु दु । तर तीज हे हनेमते धयागु मदु । थुकी छ्योँ स्याके माःगु वा हिन्दु धर्मया आस्थाय आँच वइगु वा धर्म हे ठेस लाइगु जिं मखना ।” सोफियां थुगु खँ इकान्तिपुरय् धयातःगु दु ।
थुगु म्येया बिरुद्ध विश्व हिन्दु युवा संघ अन्तर्राष्ट्रिय समितिया नामं युट्युब पाखें लिकायेत प्रेस विज्ञप्ति जारी याःगु दु । ६ गते तक थुगु म्ये मलिकाल धाःसा विरोध ज्याझ्वः न्ह्याकेगु विज्ञप्तिइ उल्लेख यानातःगु दु ।
थुगु म्येयात कयाः हाइलाइट्स नेपालयात नं म्ये लिकायेगु निंतिं दबाब वयाच्वंगु खँ इकान्तिपुरय् उल्लेख यानातःगु दु ।
