नेपालभासाया मनोरंजन ख्यलय् छगू संभावनाया लुखा पूर्णकाजी ज्यापूया छगू बुखँ क्यनाब्यूगु दु । रहरबहरं नेपालभासाया मनोरंजन ख्यलय् पला न्ह्याकुम्ह पुर्णकाजी ज्यापू थौंकन्हे छम्ह नेवाः इन्टरटेनर जुयाः पिदनाच्वंगु दुसा नेपालभासा ख्यः धैगु आ छगू लाज्या जक मखुसे थुकीयात ब्ववसायिककथं नालाः आम्दानीया श्रोत नं जुइफइगु लँपु चायेका ब्यूगु दु ।
पुर्णकाजी ज्यापूया फेसबुकय् वय्कःयात हाइलाइट्स नेपाल पाखें दच्छि यंकया आम्दानी स्वरुप १लाख २० हजार तका दां लःल्हाःगु स्टाय्टस व किपाः पिदंगु दु । सामाजिक संजालय् युट्युबपाखें थथे नेवाः म्ये पाखें आम्दानी जूगु छगू तःधंगु हे रकम अवश्य खः तर थुगु रकम पूर्णकाजी ज्यापूयापाखें निर्माण यानातःगु थीथी म्ये पाखें एकमुष्ट रुपं आम्दानी जूगु खः ।
युट्युबय् पूर्णकाजी ज्यापूया कन्हे निसें न्वतुइमखु ११ लाख भ्यूज, यो माँ हारति ८ लाख, जामाच्व वा वल ७ लाख यानां थी थी म्येया भ्यूज पाखें आम्दानी जूगु खः । तर पूर्णकाजी ज्यापूं धाःसा थ्व रकम काःगु न्हापांखुशी मखु । थ्व सिबें न्हापाया दँय् ७० हजार काये धुंकुगु खःसा वसिबें न्हापांगु दँ १४ हजार तका कायेधुनागु खँ धाःगु दु ।
दुहांवःगु थुगु रकम पाखें आः पूर्णकाजी ज्यापूं याकनं हे छगू ज्याझ्वः याना थीथी म्ये निर्माणया झ्वलय् ग्वाहलि यानादीपिंन्त ल्हाः खालि मजुइकेगु ग्वसाः ग्वयाच्वनागु खँ नं पेजथ्रीयात जानकारी बियादीगु दु । ल्यंदुगु रकम हाकनं निरन्तर रुपं नेवाः म्येया निर्माणय् खर्चया यायेगु खँय् पूर्णकाजी ज्यापू उत्साहित जुयादीगु दु ।
