नेपालभासा ख्यलय् अभिलेखिकरणया लँपु तसकं चिब्या जुजुं वनाच्वंगु दु । छुं नं ज्याखँया अभिलेख तयेगु प्रचलनधाःसा नेवाःतय् दुनेया हे छगू सभ्यता खः । अझ नं झी नेवाःतय्सं तयातःगु अभिलेख त पूर्ण रुपं लुइके फयाच्वंगु मदु । देगलय्, गुथिइ इत्यादी थासय् अभिलेख तयेगु याना हे वयाच्वंगु झीसं हे खः । अभिलेखया हे कारणं थौं नेपाःया इतिहासय् उल्लेखनीय खँत लुयाच्वंगु खः ।
टेक्नोलोजीया लिधंसाय् थौंया इलय् छुं नं खँया अभिलेख दुथ्याकेगु थाकुगु खँ मखय् धुंकल। तर नं नेपालभासाख्यलय् थुकथं अभिलेख तयेगु ज्या धाःसा उल्लेखनीय रुपं जुयाच्वंगु मदु । पुलांगु अभिलेखयात हे सुरक्षित यायेत नं थौंया टेक्नोलोजी तसकं हे न्ह्यां वने धुंकुगु दु । अभिलेखिकरण न्ह्यागु नं क्षत्रय् आवश्यक जूसां नेपालभासाया मनोरंजन ख्यलय् नं उतिकं हे आवश्यक जू ।
छुं बर्ष न्ह्यो तक नं नेपालभासाया हे भाषिक कार्यकर्ता पिंसं नेपालभासाया पिदंगु सफू, म्येचाः वा प्याखँ न्याना अभिलेखीकरण यानाच्वंगु झीसं मखनागु मखु । तर गुलि नं अभिलेखया ज्याखँ जुल व आपा धैथे हे व्यक्तिगत कुतः जक हे जुयाच्वंगु दु । अभिलेखिकरणया क्षत्र तसकं हे व्यापक खःसां आः वया नेपालभासा संकिपा ख्यलय् न्हपां खुशी नेवाः संकिपाया अभिलेखिकरण ज्याखँ न्ह्याःगु दु ।
नेपालभासाया न्हापांगु सिनेमा सिलु पिदंगु ३३ बर्ष दयेधुंकुगु दुसा आधिकारिक रुपं गुलि नेवाः संकिपाः पिदन धैगु लेखाजोखा तकं मदु । नेपाल सरकारयात जानकारीकथं ला गुलि संकिपा चलचित्र बिकास बोर्डय् दर्ता जूगु दु उलि हे जक नेवाः प्याखँया ल्याः सरकारं स्यु । मेगु चिचिधंगु बजेट वा सेंसर यायेत दर्ता मजू प्याखँयात सरकारं म्हसिकी मखु । थ्व ल्याखँ आदिवासी जनजाति पाखें छुं नं कथं नीतिनियमय् नेपालभासाया प्याखँ दुथ्याके माल धाःसा व्यक्तिगत संकलन ज्याखँ वइ मखु। उकिं छगू आधिकारीक संस्थाया संकिपा अभिलेखिकरण ज्या तसकं हे आवश्यक जू ।
अभिलेखिकरण गुगु नं हालतय् अःपुगु ज्याखँ मखु । अभिलेखिकरणय् अनेक पंगः दु । गुलिस्यां पूरा जानकारी मबिइगु वा गुलिस्यां जानकारी ब्युम्ह मनू गुलि तक्क आधिकारीक मानेयायेगु धैगु खँय् नं बिश्वास याये थाकुइ छाय् धाःसा नेवाः संकिपा ख्यः उलि व्यवस्थीत मजूनिसा ज्याखँ याइपिंके नं व्यवसायिकता मदुनी ।
उकिं थुगु ज्याखँयात चरणवद्ध याना फिल्तर यायां हे संसोधन याये अपुकेगु व तसकं हे विश्वस्नीय जुइधुंकाः तिनि हे जक पितबिइगु वा प्रकाशन यायेगु ज्या जुइमा ।
