नेसं ११३४य् नेपालभासा संकिपा नखःया निंतिं द मिथ शर्टमूभी पेजथ्री बाःछि पौपाखें न्ह्यब्वःगु खः । उगु प्याखँ नेपालभासा संकिपा नखः ११३४य् न्हाप सिरपा त्याकेत ताःलागु नं खः । थुकीया हे छगू मेगु ब्वकथं मेगु शर्ट फिल्म द मिथ ० (जीराे) दयेकुगु खः । तर द मिथ जीरो थुकीया सिक्वेल मखुसे थुकीया प्रिक्वेल अर्थात प्याखँ सिबें न्ह्योनेया ब्व कथं दयेकुगु खः । थुगु संकिपाया निर्माता नरेशवीर शाक्य खःसा संकिपाया स्क्रीप्ट व निर्देशन पेजथ्री बाःछिपौया सम्पादक दर्शनवीर शाक्य खः । संकिपालय् सहायक निर्देशन व एक्शन निर्देशन राजन शाही दुसा क्यामरा, सम्पादन व ध्वनी मनोजरत्न शाही दु । प्याखँया प्रोडक्शन सहायकय् रानीशोभा महर्जन दु ।
थुगु प्याखँया मेगु विशेषता कथं न्ह्यम्ह संचारकःमिपिनीगु संलग्नता दु । कलाकार कथं नविन थेच्वमि, विराजकाजी राजोपाध्याय, प्रेरणा शाक्य, अर्विन्द्र मान सिं दु । अले धंकी ल्युने क्यामरा मनोजरत्न शाही, निर्देशक दर्शनवीर शाक्य, निर्माता नरेशवीर शाक्य दु ।
नविन थेच्वमि छम्ह रेडियो संचारकःमि खः । विराजकाजी राजोपाध्याय समाचार डेस्क डटकमया सम्पादक जुयादी । प्रेरणा शाक्य शुभअभियान मिडियाया संचालक खः । अर्विन्द्रमान सिं नेवाः पत्रकार राष्ट्रिय दबू, काठमाडौंका नव निर्वाचित अध्यक्ष खः । मनोजरत्न शाही न्हापां निसें नेपाल वानया लाय्लामा कार्यक्रमका संचालक व थौं कन्हे नेवाः एचडी टिभिइ आवद्ध जुयादी । नरेशवीर शाक्य पत्रकारीता क्षेत्रया उम्ह व्यक्तित्व खः गुम्हेस्यां लच्छिइ नेपालभासाया जक मुक्कं ८पाः पत्रिका पिकयाच्वंगु दु । अले दर्शनवीर शाक्य नेपालभासाया मनोरंजनात्मक पत्रिका पेजथ्रीया सम्पादक खः ।
थौंकन्हेया नांजापिं कलाकार एवं पेजथ्री अवार्ड ११३७य् उत्कृष्ट मिजं कलाकारया एवार्ड त्याकुम्ह रूपेन श्रेष्ठ थक्वामि व मेम्ह लोकंह्वाम्ह मय्जु आराध्या लक्ष्मी खड्गीया जोडी दु । अले भेट्रान कलाकार राजेन्द्रमान शाक्यनं विशेष भुमिकाय् दु ।
