छुं दिं न्ह्यः सामाजिक संजालय् बय्बय् जूगु छगू टिकटक कथं भारतया छगू स्लम एरियाय् छप्वः छुचुं राहत कथं इना बिल । राहत तसकं हे म्हो जूगुलिं अतिकं माःमाःपिन्सं जक हे काः वन । व छुचुं प्वः नं छम्हेसित छप्वः जक बिल । उगु हे भिडियोया मेगु दाबि कथं थुगु छुचुं प्वः दुने १५००० तका तयातल । राहत धैगु थुकथं बिना चर्चा याना इनेमाः धकाः सन्देश बिल ।
थुकीया छुं ई लिपा हाकनं मेगु छगू टिकटिक भाइरल जुल की उगु राहत इ्युंम्ह मनू धाःसा भारतया नांजाम्ह कलाकार आमिर खान खः । आमिर खानयात थुगु ज्याखँया क्रेडिट ब्यूगु थुगु भिडियो झन हे बयबय जुल । आमिर खानपाखें थुकथंया ग्वाहलि धकाः झीथाय् नं यक्वस्यां हे थुगु भिडियो शेयर यानाच्वंगु दु ।
४ मे, २०२०या सुथसिया १०ः१५य् आमिर खानया आधिकारिक ट्वीटर पाखें छगू ट्वीट पिदन की थुगु ज्याखँय् आमिरया छुं हे ल्हाः मदु धकाः । थुगु ट्वीट न्ह्यो नं आमिरया पिआर टिम पाखेंनं थुगु खँया खण्डन याःगु खः ।
मोरल अफ द स्टोरी
सामाजिक संजालया छुं नं भिडियोयात मिखा तिस्सीना विश्वास याये मते ।
