कोरोनाभाइरसया रोकथामया लँपुइ विश्वं नालाच्वंगु लकडाउनया परिस्थीतिइ नेपालभासा ख्यलं छगू अवसरया सवाः बुलुहुँ बुलुहुँ कयाच्वंगु दु । लकडाउनया इलय् विश्वनापं हे स्वापूया माध्यम जुयाच्वंगु इन्टरनेटया छ्यलाबुला बुलुहुँ बुलुहुँ नेपालभासा ख्यलं थुइका हयाच्वंगु दु । विश्वय् इन्टेरनेटया छ्यलाबुला गुकथं यायेगु धैगु खँ आः छगू अभ्यास कथं न्ह्यानाच्वंगु दु । अथेला थ्व सिबें न्ह्यों नेपालभासा ख्यलं इन्टरनेट हे छ्यलाच्वंगु मदु धैगु मखु तर इन्टरनेटया माध्यमं नेपालभासायात गुकथं छ्यलेगु धैगु खँय् आ नेपालभासा ख्यः सजग जुयाःवःगु व छ्यलाबुलाया लिच्वः नं थुगु ख्यलं कयाच्वंगु दु ।
नेपालभासा ख्यःया दकलय् तःधंगु समस्या धैगु हे लक्षित पाठक चूमलाइगु खः । नेपालभासा ख्यःया विविध विधा मध्य सुया साहित्य, भासा, लिपि, संकिपा आदि इत्यादी ख्यःयात लक्षित पाठक लुइके थाकुयाच्वंगु अवस्था खःसा नेपालभासा ख्यया सामाग्री निर्मातापिन्त नं थःगु छगू निश्चित पाठक वर्गया पहिचान याये मफयाच्वंगु अवस्था दयाच्वंगु हे खः । थुज्योगु समस्याया समाधान कथं हे आः वयाः छगू अनलाइन कक्षा वा अनलाइन गोष्ठीया परिकल्पना साकार जुइ धुंकुगु दु । लकडाउन न्ह्यो तक्क नं नेपाललिपि स्यनेत लिपि गुथिया हे हलय् वनां स्यंवने माःगु परिस्थीति वयाच्वंगु खः तर लक डाउनया इलय् अनलाइन लिपि कक्षा संचालन यायेवं यक्व हे मन दुपिं लक्षित पाठक थुकी संलग्न जुयाच्वंगु दु । गुलिस्यां नेपालभासा स्यनेत अनलाइन वयाः स्यनाच्वंगु दु । नेपालभासा सयेके न्ह्याःपिं लक्षित वर्ग याउँक हे थुगु लाइभय् कनेक्ट जुयाच्वंगु दु । थथे अनलाइनं स्यनाच्वंगु छगू अनौपचारीक ज्याखँ हे खःसां औपचारिक रुपं हे नेपालभासाया अध्यापन जुइगु नेपालभासा केन्द्रीय विभागं नं आः अनलाइन कक्षा संचालन याना औपचारीक कक्षा न्ह्याकाच्वंगु दु । हिलाच्वंगु विश्वया छगू ज्वलन्त दसू स्वयेगु खःसा झीगु मनस्थीति हिलेमफयाच्वंगुया छगू दसू थ्व नं खः । अकसर नेपालभासा केन्द्रीय विभागय् उच्च शिक्षा कथं ब्वंवइपिं ईया कमिया कारण मवयाच्वंगु व गुलिं केन्द्रीय विभागय् भर्ना जुइधुंकाः नं ई या अभावं कक्षा काः मवःपिं दु । वजारया थुगु क्षेत्रयात आः वयाः मिखा तिस्सीफइगु स्थीति मदये धुंकल ।
थुकथं हे नेपालभासा ख्यलय् थौंकन्हे क्षत्र विशेष कथं साहित्यिक ज्याझ्वः जुल धाःसा स्थानीय मनू बाहेक मेमेगु थाय् यापिं मनूत थ्यनाच्वनिं मखु । येँ जुल धाःसा ख्वप व यलं म्हो मनू जक थ्यनी, उकथं हे यलय् जुल धाःसां ख्वपं व येँ नं म्हो मनू जक थ्यनी अले यलय् जुल धाःसा येँ व ख्वपं म्हो मनू जक हे थ्यनी तर थुगु स्थलगत समावेशीयात अझं व्यापक यायेगु खःसा छगः मोनिटरं हे विश्वन्यंकया नेवाः साहित्यकारपिंत समावेश याना आः साहित्य गोष्ठी यायेफइगु स्थीतिइ मिखा वंगु दु । साहित्यिक ज्याझ्वः छगू ग्वसाग्वयेत मानव संसाधनया कमि जुयावनाच्वंगु अवस्थाय् अनलाइन साहित्ययात लच्छिइ छक्व मखुसे न्हिंया न्हिथं याना यंकेफइगु स्थीति दु ।
लकडाउनया थुगु इलय् मेगु छता न्ह्यथने बहगू खँ धैगु युट्युब खः । युट्युबया अवधारणा बारे नेपालभासा ख्यलं बांलाक्क वाः चायेके मफयाच्वंगु दु । युट्युबया क्षत्रफल गुलि दु धैगु खँय् झीसं अन्दाज हे याये फूगु स्थीति मदु । तर थुगु लकडाउनय् बुलुहुँ बुलुहुँ नेवाः ख्यलं नं युट्युब च्यानल चायेकाच्वंगु दु । युट्युब च्यानल ताः लात धाःसा थुकीं आम्दानी जुइफइगु स्थीति नं तसकं हे बांला । तर थुकीयात थुइका बिइत युट््युब बिज्ञ कथं न्हूगु पुस्ताया आवश्यकता दु । थौं कन्हे युट्युब च्यानल च्यायेका नेवाः चीहाः संकिपा व म्युजिक भिडियो क्यनाच्वंपिं यक्व दु । थौं कन्हे टिवि रेडियो सिबें युट्युबया भविष्य अतिकं हं बांलानाच्वंगु दु थुगु पाखें नं झीसं बुलुहुं वाःचायेका यंके माः ।
