३४ म्ह कासामि – पेजथ्री कभर म्ये कासाया

नेपालभासाया इतिहासय् इलय्ब्यलय् म्ये कासा जुइधुंकुगु दु । थुकी मध्य् दकलय् लोकंह्वाःगु कासा निभाः साहित्य पालाया ‘निभाः म्ये धेंधेंबल्ला कासा’ खः । तर छपू हे म्ये जक कयाः कभर कासा न्ह्याकेगु धाःसा अवश्यनं छगू न्हूगु पह खः । नेसं ११३८य् न्हपांखुशी छपू हे म्येयात जक कयाः धेंधेंबल्ला कासा न्ह्याकुगु खः पेजथ्री बाःछिपौ पाखें । सुरजवीर वज्राचार्यया च्वसा व सः अले जुगल डंगोलया संगीत संयोजनय् मंगलधुनया लोकलयस आधारीत बुदिंया म्येकासा न्ह्याकुगु खः । थुगु ज्याझ्वःयात चेज कम्पनि पाखें प्रायोजन यागु खः । थुगु कासाय् मुक्कं १२१ म्ह कासामिपिनिगु ब्वति दुगु खः । म्ये कासाया इतिहासय् थ्व हे नं छगू उपलब्धि खः । थुगु कासाय् बांलाक्क म्ये हाःपिं उत्कृष्ट ५म्ह कासामियात ल्ययाः छगू सांगीतिक ज्याझ्वः जुल, थुपिं न्याम्ह कासामिपिनिगु सः दुथ्याकाः जुगल डंगोलया हे संगीत संयोजनय् आर्टो म्यूजिकपाखें सिरपा देछाकथं ‘सिरपा’ नाां न्हूगु म्येचाः नं पिदने धुंकुगु दु ।

विश्वन्यंक कोरोना भाइरसया त्रास ब्वलनाच्वंगु इलय् नेपास सरकारं नं थुकीयात पने कथं लकडाउनया नीति नाला काःगु दु । थुगु हे इलय् सकल मनूत छेँ दुने सुम्क च्वनेमाःगु अवस्थायात ध्यानय् तयाः नेपालभासाया संगीत ख्यलय् हाकनं छक्व मेगु कभर म्ये कासायात निरन्तरता ब्युुसें जनकवि दुर्गालाल श्रेष्ठया च्वसां पिदंगु, रत्नशोभा महर्जनया सःलय् अले जुगल डंगोलया संगीत व संगीत संयोजनय् कं नं स्वां जुइ म्येया कभर कासा पेजथ्री बाःछिपौ पाखें न्ह्याकुगु दु ।
जनकवि दुर्गालाल श्रेष्ठया म्ये हालेगु धैगु अःपुगु खँ मखु । यदि जनकविया न्ह्योने सुनानं म्ये हाल धाःसा छगः छगः शब्दया उच्चारण सहि रुपं मजुल धाःसा वय्कयात मयः, तुरुन्त हे वय्कःया प्रतिकृया पिदनी । अथे तुं जुगल डंगोलया संगीतय् गुगु कर्णप्रिय संगीत दु व संगीत न्ह्याय्पंया माध्यम जुयाः तुरुन्त हे नुगलय् थ्यनी । अले रत्नशोभाया सलं गुगु शब्दयात म्वाकातःगु दु, उगु सःयात हाथ्याय् बिइगु अपूगु खँ अवश्य नं मखु । थज्योगु हे म्ये खः कं नं स्वां जुइ । पेजथ्री बाःछिपौया म्येकासाया निंतिं दुथ्याःगु थुगु म्ये लाइभ हालेगु अपूगु खँ अवश्यनं मखु । गुलिनं थुगु म्ये हालेत कुतः जूगु दु व कुतःयात च्वछाये हे माः ।

थुगु म्येया सिरपाकथं आर्टोम्युज स्टुडियो पाखें छपू म्येया कभर रिकर्डिंग व फोटो क्यानभास नेपालपाखें उगु हे म्येया भिडियो निर्माण यानाबी । लिसें कासाय् ब्वति काःपिं सकसितं हःपाः बिइ कथं कभर म्ये युट्युबय् दकलय् आपाः लाइक वःगु व दकलय् आपाः भ्यूज दुगुयात सुनचाँदी विक्रेता लुँ वहः पसः पाखें १५ ग्रामया वहःया पाँय्म्वः म्हतिं छचाः सिरपा नं दु । थुगु कासा मुक्कं झिन्हुया नितिं जक ई तःगु खः । थुगु ई दुने मुक्कं ३४म्हेस्यां ब्वति काःगु खःसा गुम्हेस्यां अप्रतियोगिकथं ब्वतिकाःगु दु । क्वःछिनातःगु ई दुने म्ये दुतमब्यूपिनिगु नां नं अप्रतियोगिकथं दुथ्याकूगु दु ।

थुगु कासाय् ब्वति काःपिं मिसा व मिजंया अनुपात स्वयेगु खःसा मुक्कं ४१ प्रतिशत मिसात दुसा ५९ प्रतिशत मिजं त दु । उकथं हे प्रतिस्पर्धिया उमेर स्वयेगु खःसा १० दुम्ह मय्जु लुँस्वां मानन्धर व ६२ बर्ष दुम्ह चिधिबाबु महर्जन तकं दु । कासाय् ब्वतिकाःपिनिगु थायबाय्या ल्याखँ येँ, यल, बनेपा, किपू लिसें देसं पिने अष्ट्रेलिया पाखें व नर्वे पाखें निम्ह दु । तर नर्वेया कासामिं थः अप्रतियोगी कथं जक ब्वति कयादीगु खः । कासामिया ल्याखँ ख्वपपाखें सुं नं प्रतिस्पर्धी दुहाँ मवः ।

१ सिद्धार्थ बज्राचार्य कःनि बहाः