शब्दया तालमेलं कविताया रचना जुइ, उगु कवितायात मूर्त दयेकी संगीतं, अले व संगीतयात छाय्पी सलं । बल्ल छपु म्ये न्यनेजी । म्ये न्यने ला जिल तर छपु म्यें न्हाय्पंयात जक मखु, मिखायात नं सालेफत धाःसा उगु म्ये लोकय् लोकं व्हाइ । थुकथं छपु म्ये मिखायात नं ल्वःवंकेत तःधंगु भूमिका म्हितीगु छगू पक्ष खः हुलाप्याखं । दबुलिइ अथवा म्यूजिक भिडियोस म्येलिसें बांलाःगु हुलाप्याखं न्ह्यब्वयेफत धाःसा चाय्कं मचाय्कं हे स्वकुमिया नुगः सालाकाइ । थुकथं हे तःपु म्येयात हुलाप्याखंलिसें बांलाकेत योगदान बियाच्वनादीम्ह, ताः इलंनिसें कोरीयोग्राफी याना वयाच्वनादीम्ह छम्ह कलाकार खः, भुवनदास श्रेष्ठ ।
थनिं ५४दँ न्ह्यः विक्रम सम्वत २०२२ साल श्रावणया २७ गतेया दिनस अबु केदारदास श्रेष्ठ व मां महालक्ष्मी श्रेष्ठया कोखं येँया नःघः त्वालय् भुवनया जन्म जूगु खः । वय्कलं ४० सालय् छेँ लिक्क हे दुगु श्रीघःया श्री प्रभात मा.बिं. एलएलसी परीक्षा पास यानादिल । भुवनया बाल्यकाल मेपिं मस्तय् थें न्ह्यइपुक्क मवं । यक्व दुःख सियाः हे ब्वलंम्ह खः वय्कः । न्हापा छेँया आर्थिक अवस्था तसकं कमजोर । छेँयात छुं आर्थिक तिबः बीगु ल्याखं वयक्लं एसएलसी बी न्ह्यवः हे ज्या यायेगु न्ह्याकादीधुंकल । १४दँ जक दुबलय् हे वय्कलं येँया भोताहितिइ दुगु नांजाःगु पसः नेपाल उल हाउसय् ज्या यायेगु यानादिल । सुथय् जा नयाः पसलय् वनेगु अले लिहांवयेगु बहनी १० बजे । सुथंनिसें पसलय् बँ पुइगुनिसें गाहाकित, साहुया नितिं च्या काःवनेगु आदि यायां बहनी जुइ अले बहनी सामान दक्वं थासय् तयेगु काउन्टर दक्वं हुयाः सफा यायेगु आदि यायेधुंकाः बल्ल छेँय् वनेखनी । थुकथं खुलातक्क विना पारिश्रमिक ज्या यानादिल । खुला लिपा वय्कःयात लय् ४सः तलब बीगु यात । नेपाल उल हाउसय् ज्या यानागु उगु ईयात वय्कलं जीवनया छगू तःधंगु पाठ व प्रेरणाकथं हे थौं नं लुमंकेगु यानाद्यू अले धयादी, ‘दुःखं जीवनया न्हाय्कं क्यनाबी, संघर्षं म्वायेगु स्यनाबी, नेपाल उल हाउसय् ज्या यानागु उगु इलं जितः यक्व पाठ स्यनाब्यूगु दु । जिं उबले व ज्या मयानागु जूसा थनतक्क थ्यनी नं मखु जुइ ।’
कला ख्यलय् हे जीवन पानादीम्ह वय्कः शिक्षाया ल्याखं धाःसा कमर्श ब्वनादीम्ह खः । एसएलसी धुंकाः ४२ सालय् वय्कलं पब्लिक युथ क्याम्पस ज्वाइन यानादिल । अले हाकनं प्याखं ल्हुइयःम्ह, प्याखं ल्हुइगु स्यनेयःम्ह कोरीयोग्राफर वय्कलं कला यात्रा न्ह्याकादीगु नं हुलाप्याखनं मखु, अभिनयपाखें खः । वय्कलं थःगु कला यात्रा न्ह्याकादीगु २०४४ सालय् गिरीजाप्रसाद जोशीं च्वयादीगु पूधाः प्याखं बाखाछेँया नाटक म्हिताः खः । उगु नाटकय् वय्कलं नायकया हे भूमिका म्हितादिल । भुवनया कला यात्राय् दक्कले न्हापांगु पलाः नं ऐतिहासिक हे जूवन । मथुराराम श्रेष्ठं निर्देशन यानादीगु उगु नाटकया नितिं भुवनं कम मेहनत मयाः । न्यूरोडय् उगु इलय् दुगु कोजी होटलया छकू कोथाय् खुलातक्क ला नाटकया रिहर्सल जुल । नाटकया प्रचार प्रसारया झ्वलय् एफोर साइजया कलर पोस्टर थाय्थासय् तिकल । उगु इलय् कलर पोस्टर छापे यायेगु धइगु नं तःधंगु हे खः । थम्हं म्हितागु नाटक अले उकीसनं कलर पोस्टर हे पिहांवःगु । थः हे ब्वाँय् जुयाः नं पोस्टर तिकः जुल । अले नाटक नं थुलि लोकं व्हात, नाचघरया दबुलिइ ११ला तक क्यनेज्या जुल ।
मचा ल्याय्म्हचाया इलय् म्ये, प्याखं धालकि मन चंचं धाः । उगु इलय् न्हूदँया लसता लाकाः थाय्थासय् साँगितिक ज्याझ्वः जुइगु । अले अज्याःगु साँगितिक ज्याझ्वः वा कन्सर्ट स्वःवने खुब यः । दबुलिइ म्ये हालाच्वनीबलय् भुवन क्वय् म्येलिसें प्याखं हुलाच्वनी । उगु इलय् पासापिन्सं छ प्याखं ल्हुइगु गपाय्सकं बांलाः, गुलि हिसि दु धाइगु । पासापिनिगु थ्व हे शब्दं भुवनयात हुलाप्याखंपाखे सालायंकल ।
हुलाप्याखं ख्यलय् वय्कलं थः न्हापांम्ह गुरुकथं प्रवेश वान्तवाया हे नां कयादी । २०४४ सालय् हिमालयन कल्चर एशोसिएसनय् प्रवेश वान्तवापाखें दक्कले न्हापां डान्स सयेकादिल । प्रवेश वान्तवापाखें हुलाप्याखंया आधारभूत तालिमया नापं कत्थक नं सयेकादिल । निम्हम्ह गुरुकथं वय्कलं राधेश्याम प्रधानया नां कयादी । ४६ सालय् हाकनं हिमालचुली कल्चलर ग्रुपय् नं तालीम कयादिल । अन वय्कलं नांजाःम्ह वरिष्ठ कोरीयोग्राफर राधेश्याम प्रधानपाखें तालीम कयादिल ।
हिमालचुली कल्चरल ग्रुपय् डान्स सयेकु सयेकुं अन हे मेपिन्त स्यनेगु नं यानादिल । कला क्षेत्रपाखेया दक्कले न्हापांगु जागीर थ्व हे जुल वय्कःया । अन नं वय्कलं खुलातक्क मेवा मदुगु सेवा जक यायेमाल । अथे धयागु विना पारिश्रमिक । खुला लिपा विद्यार्थी संख्याया ल्याखं पारिश्रमिक दइगु जुल । वय्कःया कला यात्रां जाः काःगु ई धइगु नं थ्व हे खः । उगु इलय् प्रोग्रामत नं उलि हे जुल अले न्हिं न्हिं विद्यार्थीतय्त स्यने नं माःगु । प्रोग्रामय् स्वंगू प्यंगू हुलाप्याखं अले विद्यार्थीतय्त स्यस्यं प्याखं हुलेगु । उकथं उगु इलय् न्हिं झिंन्यागू, झिंखुगू डान्स यायेमाःगु ।
वय्कःयात ला पत्रकारतय्सं रंगमञ्चया नृत्य सम्राट धकाः हे च्वयेगु याः । रंगमञ्चया नृत्य सम्राट धइगु ला वय्कःया उपाधी हे जुइधुंकल । वय्कलं दक्कले न्हापां दबुलिइ प्याखं ल्हूगु धइगु ४६ सालय् खः । नाचघरया छगू साँस्कृतिक ज्याझ्वलय् बल्ल बल्ल भेट भाको दिन म्येय् नेपाली दौरा सुरुवाः फिनाः वय्कलं प्याखं ल्हुयादिल । उबलय् नःघलय् पश्मिना पसः नं दुगु । पसः हे तिनाः नं प्रोग्रामय् ब्वाँय् वनाच्वनीगु । अबुया डाक्टर दयेकेगु इच्छा, जुल नृत्यकार । व नं पसः तिनाः तिनाः हे जुइगु । उकथं प्याखं हूजूगु अबुजुयात धाःसा यःगु मखु । अझ गुलितक्क नं अबुं सि हे मसीक प्याखं ल्हूजुल । मामं धाःसा स्यू, मामं पनी नं मखु । लिपा अबुजुं सिल, प्याखं ल्हूजुइमेत धाइगु, नतुवा जुइमते धाइगु । तर मामं धाःसा प्याखं हुलेगु मपंसे छ्वयाच्वन । अथे हे जुजुं छन्हु वय्कलं प्याखं ल्हूगु छगू ज्याझ्वःया समाचार गोरखापत्रय् छापे जुल । उकी नृत्य निर्देशक भुवनदास श्रेष्ठ धकाः नां खंबलय् अबुजु मख्ख । वयां लिपा धाःसा नतुवा नं मधाल, प्याखं ल्हूजुइमते नं मधाल ।
वय्कलं आःतक्कया दुने डान्स टिचरकथं प्रतिभा कला मन्दिर, अनमोल कला केन्द्र, नेशनल स्कूल अफ पर्फमिङ आर्ट्स, साधना कला केन्द्र, हारती कल्चरल ग्रुप, कलेज अफ फिल्म स्टडिज व कामना कला केन्द्र, नेपाल म्यूजिक सेन्टरय् ज्या यानादीधुंकल । अथे हे प्रज्ञा प्रतिष्ठानय् नं खुदँतक्क ज्या यानादिल । थौंकन्हय् नेपाल संगीत विद्यालयस ज्या यानाच्वनादीगु दु । तःगु हे संकिपाय् नं कोरीयोग्राफर कथं कला क्षेत्रय् योगदान बियादीगु दु । नेपाली संकिपा १२ धइथें, नेवाः १५गुलिं मयाक्क व भोजपुरी तकं न्यागू धइथें संकिपाय् नृत्य निर्देशन यानादीधुंकल । म्यूजिक भिडियो ला ल्याःखानाः साध्य हे मदु । वय्कःयात संकिपा ख्यलय् यंकूम्ह धाःसा कमल राई खः । ४८ सालपाखे पिदंगु मनकामना नांया संकिपाय् कमल राईया असिस्टेन्ट डान्स डाइरेक्टरकथं संकिपा ख्यलय् पलाः तयादीगु खः । नेवाः फिल्मय् डाइरेक्टरकथं वय्कःया न्हापांगु संकिपा मतिनाया कलि खः ।
थुकथं न्ह्याःवँवं थौंकन्हय् नृत्य निर्देशक संघ नेपाल स्थापना यानाः देय्न्यंकया नृत्य निर्देशकत संगठित यायेगु व नृत्य क्षेत्रया वृहत्तर विकासया नितिं वय्कः न्ह्यज्यानाच्वनादीगु दु । थुगु संघया नायः जुयाः वय्कलं थीथी ज्याझ्वःत न्ह्याकाच्वनादीगु दु । थःगु प्रोफेसनल लाइफ व संगठनयात वय्कलं सन्तुलित ढङ्गं न्ह्याकाच्वनादीगु दु । थःगु कला यात्राया झ्वलय् थुगुसी वय्कलं छगू तःधंगु हे उपलब्धी हासिल यानादीगु दु । थौंकन्हय् वय्कलं नेपाल संगीत विद्यालयस नं नृत्यया कक्षा कायेगु यानाद्यू । थुगु पालय् एसईई परीक्षाय् नृत्य विधाया नं अलग्ग हे परीक्षा संचालन याकेत वय्कः सफल जुल । पाठ्यक्रम विकास केन्द्र अन्तर्गत च्वनाः पाठ्यक्रम विकास यानाः उकिया हे आधारय् ऐच्छिक संगीत अन्तर्गत नृत्य विधाया परीक्षा वय्कःया हे पहल व सक्रियताय् सम्पन्न जुल । नृत्य क्षेत्रया नितिं थ्व तःधंगु उपलब्धी खः । थुकथं हे नृत्य विधायात च्वन्ह्याका यंकेगु, राज्यपाखें हे उचित सम्मानलिसेंया थाय् सुनिश्चित याकाःलि कलाकारपिं कला ख्यलय् हे पूवंक समर्पित जुयाः म्वायेफइगु, म्वायेदइगु लकस दयेकेगु आज्जु ज्वनाः न्ह्याःवनाच्वंगु दु । वय्कःया आज्जु पूवनेमा, थ्व हे भिंतुना ।
