वंगु चैत्र ११ गतेनिसें नेपाल लकडाउनय् दु । मुक्कं नेपाः हे ठप्प जुयाच्वंगु दु । नेपाःया जक छु खँ, मुक्कं हलिं हे धइथें लकडाउनं यानाः ठप्प दु । कोरोना भाइरस कोभिड १९ या संक्रमणं हलिंन्यंक महामारीया रुप कायेधुंकाः थुगु भाइरसं तापायेत करिव मुक्कं हलिमय् हे धइथें लकडाउन जुयाच्वंगु दु ।
थज्याःगु इलय् प्राय सकसिगु हे धइथें ज्याखँ दिनाच्वंगु दु अले सकलें छेँय् दुने हे कुंकाः च्वने मालाच्वंगु दु । थ्व हे इलय् साहित्यकार, कलाकारत धाःसा न्हू न्हूगु श्रृजनाय् जानाच्वंगु खनेदु । गुलिखे साहित्यकारतय्सं कोरोनायात हे कयाः म्ये, चिनाखँ च्वःगु दुसा म्येहालामि, संगीतकारतय्सं थ्व हे कवितायात लसय् हनाः हालाच्वंगु दु ।
लकडाउन न्ह्याःगुलिसें दिपक बज्राचार्यया लकडाउन नं पिहांवल
नेपालय् लकडाउन जुइ न्ह्यः हे नांजाःम्ह म्येहालामि दिपक बज्राचार्य अस्ट्रेलियां लिहां वयाः ‘मेरो घर’य् सेल्फ क्वारेन्टाइनय् च्वनाच्वंगु खः । कन्सर्टया लागिं अस्ट्रेलिया वंम्ह दिपक व वय्कःया व्यान्ड ज्याझ्वः स्थगित जुइधुंकाः नेपाः लिहांवयाः तप्यंक हे सेल्फ क्वारेन्टाइनय् च्वंवंगु खः । सेल्फ क्वारेन्टाइनय् च्वनाच्वंम्ह दिपकं लकडाउन न्ह्याःगु दिं चैत्र ११ गतेनिसें हे फेसबुक लाइभपाखें थःगु ब्यान्डलिसें लाइभ म्ये हालेगु याःगु खः । व हे झ्वलय् लकडाउनया निन्हुगु दिनय् चैत्र १२य् हे वय्कलं लकडाउन म्ये हालाः सार्वजनिक यात ।
लकडाउनया न्हापांगु दिनय् लाइभ धुंकाः वय्कःया हे रिदम ब्यान्डया लाखय् राजीप बज्राचार्यं वय्कःयात छपु म्ये बिल । राजीपया थःथिति विजेन्द्र बज्राचार्यं च्वयातःगु म्येयात दिपकं थःगु रिदम ब्यान्डलिसे च्वनाः करीब २ घौ दुने हे लसय् हनेगु अले संगीत संयोजन नं याये सिधयेकल । कन्हय्कुन्हु ला लाइभ याये हे धुंकल ।
फेसबुक लाइभय् दिपकं थुगु म्ये हालाच्वंबलय् म्येयात च्वछासें यक्व हे कमेन्टत वःगु खःसा युट्युबय् भ्यूज नं ३०द्वःया न्ह्यःने थ्यनेधुंकल ।
थ्व म्ये रेकर्ड यायेगु मखुला ले ? ‘थ्व म्ये लकडाउन ईयात जक खः, थुगु म्येयात रेकर्ड यायेगु स्वयां लकडाउन व थुगु भाइरसं लिपातक्क ल्यंकातइगु लिच्वःयात ध्यानय् तयाः छुं योजना न्ह्याकागु दु’ दिपकं लिसः बिल ।
थःगु न्हूगु योजनाया बारे याकनं हे सकसितं जानकारी बीगु वय्कलं धयादिल ।
यमनं नं यात छेँय् दुने हे लकडाउन
नांजाःम्ह ख्यालि कलाकार लिसें म्येहालामि यमन श्रेष्ठं नं लकडाउनया हे दथुइ छगू म्ये दयेके धुंकल । वय्कलं थः अबु मदनकृष्ण श्रेष्ठलिसे च्वना छपु म्ये च्वल, ‘लकडाउन लकडाउन संसारै छ सटडाउन ।’
लकडाउनय् छेँय् च्वनाच्वंबलय् वय्कलं थुगु म्ये थः अबुलिसे च्व जक मच्व? लय् तयाः संगीत संयोजन नं यानाः, थम्हं हे थःगु हे छेँय् रेकर्डिङ नं यात । अले उगु म्येयात वय्कःया केहेँ सरानां मोबाइलया क्यामेरां खिचे यानाः निर्देशन यात । वयां लिपा युट्युबय् ट्युटरियल स्वस्वं भिडियो एडिटिङ सयेकाः दक्वं फुटेजयात दृश्य सम्पादन नं यमनं हे यानाः म्यूजिक भिडियोतक्क हे दयेकेल ।
‘जिगु हे चिग्वःगु कम्प्यूटरय् रेकर्ड यात, जिगु हे मोबाइलं कयागु भिडियोयात युट्युब स्वयाः एडिटिङ सयेकाः थम्हं हे एडिटिङ याना, सुटिङ नं छेँय् दुने हे सिधल, निर्देशन केहेँ नं यात । थुगु म्येय् जिं ला छतका नं खर्च यायेम्वाःल’ यमनं न्हिलाः धाल ।
पवनराज बज्राचार्यं नं दयेकल सन्देशमूलक म्ये
ल्याय्म्ह म्येहालामि पवजराज बज्राचार्यं नं थुगु लकडाउनय् छपु म्ये दयेकल । लकडाउनय् सर्वसाधारणं लापरवाही यानाः पिहांवयेगु, पुलिसया मिखा छले यानाः मुनेगु यानाच्वंगु खनाः सन्देशमूलक म्ये दयेकेगु बिचाः पवनयात वल ।
‘लकडाउन झीगु हे लागिं खः, अनुशासित जुयाः थुकिया पालना याये, म्वाःमदय्क पिहां मजुइ । भौतिक दुरी कायम यानाः थवंथवय् यायेफइगु ग्वाहालि याये धइगु हसना बीत जिं थुगु म्ये दयेकागु खः’ बज्राचार्यं धाल ।
चैत्र १४ गते शुक्रबाः वय्कलं थुगु म्येया परिकल्पना यात व आइतबाःतक्कय् म्येया भिडियो तकं हे तयार जुइधुंकल ।
म्ये च्वयेगु, लय् तयेगु, संगीत संयोजन यानाः हालेगु लिसें रेकर्डिङ तक्कया दक्वं ज्या पवनं हे याःगु खःसा भिडियोया ज्या वय्कःया दाजु मिलनरत्न बज्राचार्यं याःगु खः । पवनं छेँय् हे रेकर्डिङ स्टुडियो दयेकातःगु दु ।
इन्टरनेटं नेपाःया लिसें पिने देय्या नं फुटेजत डाउनलोड यानाः मिलनं म्येया भिडियो एडिटिङ नं यानाः म्यूजिक भिडियो तयार यात ।
ग्यान्पु स्टाइल सुरजं नं हाल ओ कोरोना लिसें न्हूगु सालया भिन्तुना
ग्याङनम स्टाइलया नेपालभाषा भर्सन ग्यान्पु स्टाइल लिसें बुदिंया भिंतुना म्ये हाःम्ह नांजाःम्ह म्येहालामिलिसें संचारकःमि अले थौंकन्हय् नेवाः पत्रकार राष्ट्रिय दबूया केन्द्रीय नायः तकं खःम्ह सुरजबीर बज्राचार्यं नं लकडाउनय् कोरोनाया म्ये हाल ।
सुरजं हिन्दी संकिपा सोलवां सालया म्ये ‘है अपना दिल तो आवारा’या लसय् ‘ओ कोरोना, अय् कोरोना’ हाल । म्येग्वः भूषणप्रसाद श्रेष्ठयागु दु ।
थ्व हे लसय् दुने च्वनाः च्वयातःगु म्येग्वः सुरजयात नेपालभाषाया बाःछिपौ ‘पेजथ्री’या सम्पादक दर्शनबीर शाक्यं ब्यूगु जुयाच्वन ।
लकडाउनं ब्वलंकेफुगु समस्या, उगु समस्यां हयेफुगु निराशा, ल्वचं हयेफुगु त्रासया वातावरणय् हःपाः बीगु कथंया, आःया विषम परिस्थितीलिसे संघर्ष यायेत हःपाः बीगु कथंया भूषणप्रसाद श्रेष्ठं च्वयादीगु खँग्वः च्वछायेबहःजू ।
रेकर्डिङ स्टुडियोत दक्वं बन्द दुगु, लकडाउनया अवस्थाय् बज्राचार्यं थुगु म्ये थःगु हे ल्यापटपय् रेकर्ड यात । ल्यापटपय् नं थुलि बांलाक रेकर्ड जू खनी ला धइगु न्ह्यसलय् वय्कलं चीहाकलं लिसः बियादिल ‘जू खनी ।’
म्येया लिरिकल भिडियो नं सुरज थम्हं हे दयेकल ।
उकिया नापं २०७७ वैसाख १ गतेया दिनय् हाकनं सुरजं मेगु म्ये छपु सार्वजनिक यायेधुंकल । थुगु म्ये नं हिन्दि म्येया काराओके ट्राय्कय् हालातःगु दु । भुषण प्रसाद श्रेष्ठं च्वयातःगु न्हूगु साल वःगु दु जिगु भिन्तुना दु न्हि म्येयात सुरजबीर बज्राचार्य व रमा तुलाधरं नापं हालाः सामाजिक संजालय् सार्वजनिक याःगु दु ।
सुरेन्द्र श्रेष्ठं धाल तिमी अलि वरै बस
म्येहालामि सुरेन्द्र श्रेष्ठं नं लकडाउनया ईयात संगीत श्रृजनाय् हे बियाच्वंगु दु । सुरेन्द्रया ल्हातय् भाजु श्याम तमोटं च्वयातःगु छपु म्ये ल्हातय् लात, ‘तिमी अलि परै बस केही दिन घरमै बस ।’ संक्रमण न्यनेमबीत छेँय् हे च्वँ, भौतिक दुरी कायम या धइगु कथंया थुगु हसना दुगु म्ये सुरेन्द्रं छन्हुं हे दयेके सिधयेकल ।
म्येयात संगीतवद्ध यानाः संगीत संयोजन यायेत स्वःबलय् छेँय् च्वंगु कम्प्यूटरय् समस्या वल खनी । वय्कःया क्षेत्रपाटीइ थःगु हे रेकर्डिङ स्टुडियो दु, सुर मेलाडी रेकर्डिङ स्टुडियो, छेँ धाःसा रामकोटय् । चैत्र २२ गते सुथय् प्यताः इलय् दनाः रामकोटं क्षेत्रपाटी ब्वाँय् वनाः अनया कम्प्यूटर छेँय् हयाः संगीत संयोजन यानाः, हालाः रेकर्डिङ लिसें मिक्सिङ नं छन्हुं हे सिधयेकल ।
भिडियोया नितिं रत्नशोभा महर्जनया ग्वाहालि काल । चैत्र २२ गते तयार जूगु म्येयात रत्नशोभां २३ गते हे लिरिकल भिडियो दयेके सिधयेकल व उगु हे दिनय् सामाजिक संजालय् नं शेयर जुल ।
सुरेन्द्रं थुगु म्येया हिन्दि भर्सन ‘अभि तुम दुर रहो, कुछ दिन घर पे रहो’ नं दयेके लायेधुंकल । हिन्दि म्येया म्येग्वः धाःसा सुरी के सिंहं च्वयातःगु दु ।
सुरजबीरं है अपना दिल तो आवारा म्येया लसय् हालातःगु ओ कोरोना अय् कोरोना म्येयात नं सुरेन्द्रं संगीतवद्ध याःगु दु । वय्कलं हार्मोनियम छगः थानाः थुगु म्ये हालाः सामाजिक संजालय् शेयर यानातःगु दु ।
उकिया नापं सुरेन्द्र तुलाधरं च्वयातःगु छपु म्येयात लय् तयाः संगीत संयोजन यायेगु लिसें रेकर्डिङ यायेगु ज्या तकं सुरेन्द्र श्रेष्ठं सिधयेकेधुंकल । थुगु म्येयात सराना श्रेष्ठं हाःगु दु । म्येया म्यूजिक भिडियो तयार यानाः भिडियोलिसें म्ये सार्वजनिक यायेगु योजनाय् म्ये च्वमि लिसें कलाकार सुरेन्द्र तुलाधरं ज्या यानाच्वंगु दु ।
लकडाउनयात गुकथं श्रृजनात्मक दयेकेफइ धइगु दसु कलाकारतय्सं बियाच्वंगु दु । छेँय् दुने हे परिवारलिसे च्वनाः थम्हं सःगु श्रृजना यानाच्वन धाःसा थुकिं थःत नं फ्रेस दयेकातइसा कलाकारपिनिगु न्हूगु श्रृजना न्यने स्वयेखनीबलय् मेपिं नं फ्रेस जुइखनी ।
लकडाउनया इलय् थुकथं हे थम्हं सःगु ज्या यायेगु अले स्यनेज्यूगु ज्याखँत सामाजिक संजालपाखें स्यनेगु नं यानाच्वन धाःसा सयेकेगु सीकेगु व्हःताः नं जुइ । भौतिक दुरी कायम यानाः थवंथवय् सतिनाच्वनेगु बांलाःगु माध्यम नं थ्व हे जुइफु ।
