वाध्यात्मक परिस्थीतिइ दुपिनि दु दु कथं लकडाउनय् कयेकुनाच्वंगु दु । लकडाउनय् सुयातनं थथे हे याः वा यायेमते धायेगु पाय्छी जुइ मखु वा जुइफइला मखु तर लकडाउनया इलय् ई छ्यायेगु कथं यक्वस्यां साउथया हिन्दी डब प्याखँ स्वयाच्वंगु खँयात मखु धाये फइ मखु । नेवाः शर्ट फिल्म नं उतिकं हे थौंकन्हे सामाजिक संजालय् खनेदयाच्वंगु दु । तर फुक्क हे नेवाः प्याखँत छथाय् मुंके फूगु अवस्था नं मदुनि । थुगु हे खँया लिधंसाय् युट््युबय् दुगु नेपालभासाया थी थी शर्टमूभीया धलः माला तयार यानागु दु । गुगु प्याखँ स्वयाः थुकीया आनन्द लकडाउनया इलय् कयादी फइ । धलखय् मदुगु प्याखँया लिंक गनं दुसा कमेन्टय् तयादीत इनाप याना ।
१) आस्था
नेसं ११३८या नेपालभासा चीहाः संकिपाः कासाया निंतिं दयेकुगु थुगु छगू अमूर्त प्याखँ खः । थुकी सुं नं कलाकारया ख्वाः क्यनातःगु मदु तर नं झी दुने आस्था गथेयाना ब्वलनिं धकाः क्यनातःगु दु । थुगु शर्ट फिल्मया निर्देशक योवन शाक्य खः सा प्याखँया च्वमि राज महर्जन खः । थुगु प्याखँ नेवाः युट्युबय् दु ।
२) इन्द्रायणी
लोकबाखँयात शर्ट फिल्मया रुपय् न्ह्यब्वयातःगु थुगु प्याखँ खः । निक्वगु नेपालभासा चीहाः संकिपा कासाय् थुगु प्याखँ लियाँल्यू लाःगु खः । लुति अजिमाया बाखँया लिधंसाय् दयेकातःगु थुगु शर्ट फिल्मय् आराध्यालक्ष्मी खड्गी, देवकुमारी खड्गी व रुपेन श्रेष्ठ थक्वाःया मू भुमिका दु । थुगु शर्ट फिल्मया निर्देशक दर्शनवीर शाक्य खः। प्याखं ईलोहं प्रकाशनया युट्युबय् दु ।
३) कुमति
कमेडी शर्ट फिल्म कथं थुगु प्याखँयात काय् फइ । थुकी श्याम सुन्दर शिल्पकार, अर्णेश्वरी शिल्पकार, रोजीना सुवाल, किशोर कुमार शाही, शंकर खड्गी आदिया अभिनय स्वये फइ । प्याखँनय् इतिइति न्हिकेफइगु दृष्य त दु । मनू दुनेया स्वभावं झीगु जीवन गुलि कष्टकर जुइफु धकाः थुगु प्याखनय् न्ह्यब्वयातःगु दु ।
४) ग्वाय्पिया सुखद्यां
ग्वाय् पिया सुख द्यां छगू रिमेक शर्ट मूभी खः । साहित्यकार श्रीकृष्ण अणुया छधाः प्याखँयात निर्देशक सुनिता राजभण्डारीं शर्ट फिल्म दयेकुगु खः । थुगु शर्ट फिल्मय् यक्व हे अमूर्त खँ हास्यव्यंगया माध्यमं न्ह्यब्वयातःगु दु । आशाकाजी थकू, हरिमान दिवाकर, राजु महर्जन जुजु थें जाःपिं कलाकार थुगु शर्ट फिल्मय् दु ।
५) छिपिंनं मां अबु जुइ तिनि
भिमसेन रिसालया निर्देशनय् दयेकातःगु थुगु शर्ट फिल्म खः । न्हुगु पुस्ता व पुलांगु पुस्ता दथुया आन्तिरीक द्वन्द थुकी क्यनातःगु दु । भिमसेन रिसाल, अन्नपूर्णेश्वरी श्रेष्ठ, रामराजा भाम व सोनिका प्रजापतिया अभिनय थुकी दु ।
६) तँया चक्र
न्यनेकने बाखँया लिधंसाय् दयेकातःगु थुगु शर्ट फिल्मया निर्देशक देवकुमार श्रेष्ठ खः । छगू ख्यालि कथं न्ह्यब्वयातःगु थुगु प्याखँनय् सुशिल राजोपाध्याय्, वासु शाही, सुनिता ठाकुर पिनिगु अभिनय स्वये खनिं ।
७) तथास्तु
कलस मिडियाया न्ह्यब्वयाय् छगू कमेडी शर्ट फिल्म खः । थुकी भिमसेन रिसाल व रुपा मानन्धरया अभिनय दु । थुकीया निर्देशक राजुु श्रेष्ठ खः ।
८) नेवाः म्युजियम
नेवाः युट्युब च्यानलया न्हापांगु चीहाः संकिपा नेवाः म्युजियम खः । छम्ह नेवाः विदेशय् च्वना लिहां वयेधुंकाः स्वनिगःया स्थीति गथे हिला वन धैगु खँयात वाःचायेका दयेकातःगु थुगु शर्ट फिल्म खः । प्याखनय् पूर्णमान महर्जनयात मू पात्र याना क्यनातःगु दु । प्याखँया निर्देशक योवन शाक्य खः।
९) बचं
आर्यम नकःमिया निर्देशनय् तयार जूगु थुगु प्याखनय नेवाः भाय् न्हू पुस्तां छाय् त्वतावन धैगु खँय् केन्द्रित दु । आशिष्मा नकःमि व राजु महर्जन लिसें बाल कलाकार क्रिजा श्रेष्ठया अभिनय दु ।
१०) बैना भ्वँ
ख्वप मिडिया सर्कलया यथास्थीतिइ दयेकातःगु छगू शर्ट मूभी खः । प्याखनय् गज्योगु परिस्थीतिइ मनूतय्सं झंगः लाका भचा भचा ध्यबाया निंतिं झीगु बुँ स्यंका मियाच्वन वा गथे याना वाध्यात्मक परिस्थीति उत्पन्न यानाच्वन धकाः क्यनातःगु दु । प्याखँया निर्देशन हर्के माइलां याना तःगु दु । स्थानीय ख्वप भासं थुगु प्याखँ दयेकातःगु खः ।
११) भकुँग्वारा ख्याः
एभिसिडि पोखराया न्ह्यब्वया कथं भकुँग्वारा ख्याः प्याखनय् परिस्थीति वस झीगु भाय् गथे हिला वनाच्वंगु दु धकाः क्यनातःगु दु । यादव दास भ्वछिभ्वया निर्देशनय् तयार जूगु थुगु शर्ट मूभी न्हापांगु नेपालभासा चीहासंकिपा कासाय् लियांल्यू लाःगु खः ।
१२) हाःसः मदुगु सः
सुनिता राजभण्डारी जूनुया निर्देशनय् तयार जूगु थुगु प्याखँ न्हापांगु नेपालभासा चीहाः संकिपा कासाय् न्हाप लाःगु खः । नेवा भाय् झीसं मल्हात धाःसा छु जुइ व झीसं छु याये माः धैगु सन्देश थुकी दु । प्याखनय् मन्जु श्रेष्ठ, शाक्य सुरेन, सुनिता राजभण्डारीया अभिनय दु ।
१३) लिधँसा
किर्ति श्याम सुन्दर जोशीया निर्देशनय् तयार जूगु चीहा संकिपा खः लिधँसा । थुगु प्याखनय् भौतिकवादी संसार व आध्यात्मिक मनस्थीतिया द्वन्द क्यनातःगु दु । प्याखनय् कृष्णभक्त महर्जन, अनिता ताम्राकार व सुमन चित्रकारया अभिनय दु ।
१४) द मिथ
सन २०१४य् पिदंगु थुगु प्याखनय् सडक विस्तार विरुद्धया चेतना थनेत पिदंगु शर्ट मूभी खः । निर्देशक दर्शनवीर शाक्यया थुगु प्याखनं न्हपांगु नेपालभासा चीहाः संकिपा कासाय् न्हाप सिरपा त्याकुगु खः । प्याखनय् अमृतचन्द्र श्रेष्ठ, भिमसेन रिसाल, योगेन महर्जनया अभिनय दु ।
१५) स्वापू
योवन शाक्यया निर्देशनय् छगू थ्रिलर शर्ट मूभी खः स्वापू । थुगु प्याखनय् सरिता बज्राचार्य व प्रेमा शाक्यया अभिनय दु । थौंकन्हे पाश्चात्य संस्कृति कथं लिभिंग टुगेडरयात कयाः छगू रोमांचक प्याखँ दयेकातःगु दु ।
१६) म्युजियम
राजिन महर्जनया निर्देशनय् नेपालभासा चीहाः संकिपा कासाय् ल्यू लाःगु छगू अमूर्त चीहाः संकिपा खः म्युजियम । लक्ष्मिकुमार महर्जनया मू भुमिका दुथ्याकातःगु दु ।
१७) म्हसिका
राकेश महर्जनया निर्देशनय तयार जूगु थुगु शर्ट मूभी नेवाःतय्गु म्हसिका जातं जक जुइ मखु धकाः सामाजिक मुल्यमान्यता न्ह्यब्वयातःगु दु । प्याखनय् विजय शर्मा राजोपाध्याययात मू पात्र कथं क्यनातःगु दु ।
१८) मिखा दुपिं कां
समयबजि पुचःया थुगु शर्ट मूभी माजु भौया सामाजिक स्वापुतिइ केन्द्रित दु । प्याखनय् शुभलक्ष्मी मानन्धर रजनी खड्गीया अभिनय दु । थुगु शर्ट मूभी सुरेन्द्र मानन्धरं निर्देशन यानादीगु खः ।
१९) लिच्वः
पवन जोशीया निर्देशनय् तयार जूगु थुगु प्याखँ पिम्स फिल्म फेस्टीभलय् सिरपा त्याकेत ताःलागु संकिपा खः । थुगु प्याखनय् नेवाः जुयाःनं नेवाःभाय् खँल्हाये मसःगु इलय् फय्माःगु अपमानयात न्ह्यब्वयातःगु दु । प्याखनय् अनु महर्जन, गोपिलाल तुयु, सोनिका हेक्का, रुकसाना महर्जनया आदिया अभिनय दु ।
२०) वाःचाः
न्हापांगु चीहाः संकिपा कासाय् दुथ्याःगु थुगु प्याखँया निर्देशक रवि साय्मि खः । प्याखनय् सुशिल राजोपाध्याय व सरस्वति मानन्धरया अभिनय दु । अय्लाखं छगू सम्बन्धयात गुलि तक स्यंकी धैगु सामाजिक सन्देश दु ।
२१) स्वचेतना
निर्देशक प्रज्वल शाक्यया न्हपांगु कुतः कथं स्वचेतना प्याखँ नेपालभासा चीहाः संकिपा कासाय् ब्वतिकाःगु खः । झीसं झीगु भाय् मल्हात धाःसा गज्योगु परिस्थीति तक ब्वलनि धकाः स्वचेतना ब्वलंकीगु चीहाः संकिपा खः । थुकी बिधान तुलाधरयात मू पात्र कथं न्ह्यब्वयातःगु दु ।
२२) संकिपाया उँ
निर्देशक लूःजः सिंया निर्देशनय् तयार जूगु थुगु प्याखनय् सिनेमा स्वयाः मस्तय्गु मनय् गज्योगु मनोविज्ञान उत्पन्न जुइ धैगु खँ न्ह्यब्वयातःगु दु । प्याखनय् मणि महर्जन अभिषेक लामाया मू भुमिका दु ।
२३) स्वन्हु
निर्देशक योवन शाक्यया निर्देशनय् तयार जूगु थुगु शर्ट मूभी शोभा महर्जन व रणेन्द्र महर्जनया अभिनय दु । विना संवाद दयेकातःगु थुगु प्याखनय् मतिनायात मू बिष्यबस्तु दयेकातःगु दु ।
२४) हाकुगु पौ
निर्देशक योवन शाक्यया हाकुगु पौ छगू क्राइम थ्रिलर खः । थुकी रुपेन श्रेष्ठ, रोजिना सुवाल व सरिता बज्राचार्यया अभिनय स्वये दइ । धन सम्पत्तिया लोभय् मनुखं याइगु अपराधयात मू बिषय दयेकातःगु दु ।
२५) ह्याउँगु हि
योवन शाक्यया निर्देशनय् दयेकातःगु थुगु प्याखनय् समाजया थजात व क्वजातया बिषय केन्द्रीत जुयाच्वंगु दु । सरस्वति मानन्धर, सुरज व्यजनकार, रोजिना सुवालया अभिनय दुथ्या ।
