कारोनाया कारण संसार हे लकडाउन जुयाच्वंगु थुगु इलय् झी दुने नं अझं अज्योपिं व्यक्तित्व व पुचः दु गुपिंसं थुगु ई यात नं छगु प्रेरणाया रुपय् छ्यलाच्वंगु दु । जीवनय् दुःख धैगु स्वइत जक मवइ तर नं थुगु दुःख वा संकटया इलय् नं दुःखयात ल्वमंकेत पलख सा मन हिइके फइगु वातावरण थुज्वःपिं व्यक्तित्वपिंसं यानाच्वंगु दु । धात्थें धायेगु खःसा समाजयात हे छगू उत्साह बिइगु कुतलय् थुपिं व्यक्तित्वपिन्त न्ह्याक्व हे सुभाय् देछासां मगाः ।
मथुरा साय्मि (वरिष्ठ आख्यानकार)
मथुरा साय्मि गुब्लें हे सुम्क च्वने मफूम्ह व्यक्तित्व कथं नेपालभासा साहित्य ख्यलय् खने दु । मद्दिक्क उपन्यास च्वया पिकयाच्वनिम्ह अले थी थी कथंया कासा याना नेपालभासा ख्यःयात गतिशील याइम्ह छम्ह व्यक्तित्व खः । छुं दँ न्ह्यो निसें आख्यानकार मथुरा साय्मिं नेपालभासा ख्यलय् छगू हे शिर्षकय् चिबाखँ कासा याना वयाच्वंगु दु । वय्कलं दकलय् न्हापा हिरामोति अनं घाः शिर्षकय् चिबाखँ कासा याःगु खःसा आ हाकनं न्हापा थें हे इलोहं प्रकाशन प्रालि लिसे जाना कोरोनाया ग्याचिकुया इलय् ‘त्रास’ शिर्षक बियाः बाखँ कासा न्ह्याकाच्वना दीगु दु ।
पासा पुचः गुथि युके
पासा पुचः गुथि, युके पाखें थुगु लकडाउनया इलय् विश्वन्यंकं हे हलिमय च्वंपिं नेवाःतय्त मनोरंजन बी धकाः यु.के. नेवाः शर्ट फिल्म फेस्टीभलया ग्वसाः ग्वःगु दु । युट्युबय् दुगु शर्ट फिल्मत ल्ययाः थुगु गुठीया हे वेभसाइट पाखें सकस्यां स्वये जिइक नेवाः प्याखँ छथासं तयाः थुगु फेस्टीभल याःगु खः । थुगु फिल्म फेस्टीभलय् सुनिता राजभण्डारीया ग्वाय्पियाः सुखद्याँ, दर्शनवीर शाक्यया इन्द्रायणी, लूःजःसिंया संकिपाया उँ, पखाः, कुमाःननिया नायिकाजुपिं व नीलबाराही रिचुअल डान्स क्यंगु चौलाथ्व द्वादशी खुन्हु क्यंगु खः । थुगु प्याखँत अझंनं वेभसाइटय् तयातःगु दनिं ।
पवित्र कसाः
लकडाउनया इलय् मेम्ह छम्ह सक्रिय व्यक्तित्व खः पवित्र कसाः । थुगु इलय् वय्कलं अनलाइन च्वना नेपाल लिपि स्यनाच्वनादीगु दु । लकडाउनया इलय् छुं न्हूगु खँ सयेके खंगु खँय् यक्व हे स्वकुमिपिं थुगु लाइभ स्वयाच्वंगु दइ । अझ न्ह्यइपुगु खँ ला थुगु लाइभ क्वचायेके धुंकाः पवित्र कसाः पाखें ब्यूगु होमवर्क तकं वय्कःया हे मेसेन्जरय् स्वकुमिपिंसं छ्वयाहयेगु यानाच्वंगु दु ।
भूषण प्रसाद श्रेष्ठ
वरिष्ठ साहित्यकार भूषण प्रसाद श्रेष्ठं कोरोनाया संक्रमण पाखें सचेत यायेगु ल्याखं हिन्दी म्येया लसय् म्ये छपू च्वयाः दीगु खः । लिसें वय्कलं सामाजिक संजाल मार्फत हे थुगु म्ये यात हे अपना दिल तो आवारा धैगु लसय् हालेत नं इनाप यानादीगु खः । तर थुगु म्ये ा ल्याय्म्ह संगीतकार सुरेन्द्र श्रेष्ठं न्हूगु हे लसय् हनां हाला सामाजिक संजालय् पोष्ट यानादीगु दुसा नेवाः संगीतय् प्यारोडीकल गायनया अतिकं प्रभावशाली गायक सुरजवीर वज्राचार्यं हिन्दी लसय् हालादीगु दु ।
