मनूया बिचाः
निम्ह मूर्खत आकाशय् थस्वयाः हालाच्वन
छम्ह हुँ आकाशय् त्वया च्वंगु सूद्र्यः खः ।
मेम्ह मखु व तिमिला खः ।
उवले हे इमिसं अन छम्ह मनूयाके व छु धकाः न्यन ।
मनू जिं मस्यू । जि थनया मनू नं मखु ।
नारदमुनी
मिस्त प्रणाम नारदमुनी
नारदमुनी नारायण …नारायण.. । भ्यालेन्टाइन डे वइन । छु छिमि भाःतपिंसं छिमित अझं माया याःनी ला?
मिस्त याः नी । हे मुनवर, जिमित अझ नं जिमि भाःतपिंसं मतिनां जाःगु मांया जाःगु एस एम एस, मीम्स फेस बुकय् छ्वयाः हःनिं ।
नारदमुनी हे देवीपिं । व ला थिक जू । तर छिमिसं गुब्लें बिचाः याना ला, छिमि भाःतपिंत अज्योगु मेसेज सुना फोरवार्ड याना हल जुइ ….. नारायण …नारायण.. । का जि आ वना छ्वये..
निगु अप्शन
पामिभाः क… छं ला थौं बहनी तरकारीइ निता अप्शन दु धैगु मखुला ? थन ला भान्टा आलु जकं दयेका तल का । मेगु छु अप्शन दु ? तरकारीया ?
कलाःम्ह मेगु अप्शन द हे दु नी । न्ह्याःसा नं मयःसा नयेमते ।
निन्हुया जीवन
डाक्टर तसकं हे दुःखया खबर दु । छि कला आ निन्हु जक हे म्वाइ ।
पामिभाः घाः.. खला.. आ निन्हु नं सहयाये का । छु याये…
चिन्ता
मनूया जीवनया छुं भर मदु । थौं सी की कन्हे सी । तर जिगु छगू हे जक चिन्ता दु । जि सी धुंकाः जिगु मोबाइल सुया ल्हातिइ थ्यनी जुइ … क्या टेंशन का…
मोबाइल आय्प्सया कमाल
कलेजय् मार्साबं कलाः धाइपिं गथे जुइ माः धकाः लेक्चर बियाच्वन । छम्ह आदर्श कलाःया गुण फुक्कं जोश जोशं न्यंकाच्वन । छम्ह ब्वनामिं उगु खँ फुक्कं हे रेकर्ड याना मार्साबया कलायात फोर्वार्ड याना बिल । शायद कन्हे मार्साबया क्लास दइमखु जुइ ।
झी मस्त
सामाजिक संजालया कारण आ याकनं हे थज्योगु सम्वाद झीथाय् नं याउँक ताये दइ ।
मिसाया अबुम्ह झी काय् छु याइ ले ?
मिजंया अबुम्ह आर्मि खः । छि म्ह्याय् ले ?
मिसाया अबुम्ह जिमि म्ह्याय्ला कलाकार का, अभिनेत्री ।
मिजंया अबुम्ह अहोसा छु प्याखँनय् ले ?
मिसाया अबुम्ह टिकटकय् का .. अले छि काय् गन ले ?
मिजंया अबुम्ह व ला पब्जी आर्मि का ।
आखिर छु दत ?
निम्ह पासापिं साप हे मिले जुपिं । छम्ह आखः ब्वनेगुलिइ अव्वल । मेम्ह आखः ब्वनेगु बाहेकय् अव्वल । आखः ब्वनिम्ह आखः ब्वना डाक्टर जुल । यक्व हे सिरपा त्याकल ।
छक्व देशया दकलय् तःधंगु पदक बिइत व डाक्टरयात सःतल । उबलय् व डाक्टरयात थः पासा लुमंसे वल । व छु यानाच्वन जुइ धकाः मत्तिइ तल । ला सा छपेय् नयेत नं खँ ला मखंला धकाः बिचाः यानाच्वन ।
समारोहलय् वनां उम्ह डाक्टरं सिरपा फः वन । सिरपा काये त्यंबलय्ला सिरपा लःल्हायेत्यंम्ह वया हे पासाम्ह लानाच्वन । पासाम्ह ला नेता जुइधुंकल खनिं । तसकं हे तःधंम्ह नेता।
अबले व नेता जुइधुंकुम्ह पासां धाल – छं आखिर जिगु न्ह्योने ल्हाः हे फयेमाःगु खःसा उलि मछि आखः छाये ब्वनागु ?
इर्ष्रया
थौं न्हापांखुशी पामिभाः भारा सिला लयताल । खँ छु जुल धाःसां पामिभाःया कलाःम्हं भारा स्यु धकाः अर्डर ब्युगु जुयाच्वन । पामिभा धाःसा कःसिइ च्वना भारा सिला च्वन । नापं छेँ च्वंम्ह मिसां खन । अले धाल जितः नं छ थें जाम्ह हे भात माःगु का ।
थुलि ताये सातकं पामिभाःया कलाःम्हं – म्वाल कन्हे निसें जिं हे भारा सिले धाल ।
