प्याखं हुलेगु गुलिसिया लागिं सौंख, गुलिसिया लागिं जीवन । प्याखं हुलेगुलिइ दुःख सकतां ल्वःमंकाच्वनी, न्ह्याक्व हे थाकुसां सुख तायेकाच्वनी । थौंकन्हय्या पुस्ताय् हुलाप्याखंया माध्यमं सँस्कृतिया संरक्षण सम्वद्र्धनया चेतना यक्व हे थहांवःगु दु । परम्परागत, साँस्कृतिक हुलाप्याखनय् दुग्यंगु अध्ययन यानाः न्ह्याःवनाच्वंपिं ल्याय्म्हत यक्व हे दु । तर न्हापा अवस्था पाः । पाश्चात्य डान्स, ब्रेक, माइकल ज्याक्सन डान्स हिट जुयाच्वंबलय् साँस्कृतिक हुलाप्याखनय् संघर्ष तःधं । अज्याःगु हे संघर्षं थहांवःम्ह, थीथी कथंया साँस्कृतिक हुलाप्याखंया अध्ययन यानाः, अभ्यास यायां सयेकाः मेपिन्त नं स्यनाः थौं छगू थाय् दयेकेत ताःलाःम्ह वरिष्ठ हुलाप्याखंमि, लिसें हुलाप्याखं स्यनामि खः यज्ञमान शाक्य ।
यज्ञमान शाक्यया जन्म २०२२ साल माघ ४ गते अबु ज्योतिमान शाक्य व मां ज्ञानीमाया शाक्यया कोखं यलया हःखा त्वालय् जूगु खः । शिक्षाया ल्याखं वय्कलं ललितकला क्याम्पसं संगीतय् प्रवीणता प्रमाण पत्र तगिं पूवंकादीगु दुसा भारतया इलाहबादं भरतनाट्यमय् संगीत प्रभाकर व इलाहबादं हे कथ्थकय् संगीत प्रवीण नं यानादीगु दु । वय्कलं मदुम्ह सप्तमुनि बज्राचार्य, मदुम्ह कान्छाबुद्ध बज्राचार्य व यज्ञमान पति बज्राचार्ययात चचा गुरु कथं लुमंकादी । अथे हे, सुरेश मिश्र व हनी श्रेष्ठपाखें कथ्थक सयेकादीगु दु । अथे हे, मदुम्ह मृगेन्द्रमान सिंह प्रधानं वय्कःयात भरतनाट्यम स्यनाबियादिल ।
थौंकन्हय् वय्कः अमेरीकाया मेरीलाय्न्डय् च्वनाः अनया थीथी राज्यय् नृत्य कला संस्कृतिया प्रचार प्रसारय् यायेगु, चचा प्याखं स्यनेगुलिइ सक्रिय जुयाच्वनादीगु दु । थ्वयां न्ह्यः वय्कः साँस्कृतिक संस्थानय् ज्या यानाच्वनादीगु खः । वय्कलं २०४३ सालय् साँस्कृतिक संस्थानय् जागीर नयादीगु खः । जीवनया छुं ई पद्मकन्या क्याम्पसया विद्यार्थीतय्त नं हुलाप्याखं स्यनेगुलिइ बियादिल । प्याखं स्यनेगु झ्वलय् थः शिष्यपिं ग्वम्ह थ्यन धइगु ला ल्याःखाना साध्य हे मदु । ‘गुलि थ्यन ठ्याक्क हे धायेमफुत, तर आः ख्यलय् सक्रिय जुयाच्वंपिं जिगु शिष्यपिं निद्वःति दइला’ वय्कलं धयादी ।
प्याखं हुलेगु धालकि मचांनिसें हे यः । तर हुलाप्याखं ख्यलय् हे थःगु करीअर दयेके धइगु कथंया आज्जु धाःसा शुरुंनिसें हे दुगु मखु । मचाबलय् गनं वनाच्वनेबलय् लँय् छुं डान्सिङ नम्बर हायेकातःगु तालकि लँय् हे प्याखं हुलाच्वनीगु । गुलिसिनं छं प्याखं ल्हूगु तसकं बांलाः धयावनी । व हे तारीफं वय्कःयात चाय्कं मचाय्कं हुलाप्याखंपाखे साला यंकाच्वन ।
उगु ई धयागु प्याखं हुलेगु, नाटक म्हितेगु आदि ज्यायात समाजं बांलाःगु मिखां मस्वः । गुलिसिनं ख्वालय् हे धयावनी, प्याखं हुलाः नइम्ह धकाः । मेपिन्सं ला मेपिन्सं, छेँय् नं नं छु प्याखं हुला जुयागु धकाः ब्वःबीगु । तर प्याखं हुलेगुलिइ हे मन क्वसाःम्ह, वय्कः प्याखं हुलाः तुं च्वन । छगू निगू प्रतिस्पर्धाय् भाग नं काल । उकी गुकिं न्हाप लात, गुकिं ल्यू लात । धमाधम सिरपाः त्याकाहःगु स्वस्वं छेँय् नं ब्वःबीगु स्वयां हःपाः बीगु यानाहल । वय्कलं दक्कले न्हापां सिरपाः त्याकूगु धइगु १९८५इ इन्टरनेशल मोडर्न डान्स ब्रेक डान्स धेंधें बल्लाखय् खः । उकी वय्कलं माइकल ज्याक्सन डान्स यानाः न्हाप सिरपाः त्याकादिल । उकी वय्कलं तका सिरपाः नं त्याकादिल । गुलि धकाः ठ्याक्क हे ल्वःमन । तर १५सः, २द्वः ति दुगु खँ वय्कलं धयादी । डान्स ख्यलं दक्कले न्हापां धेबा ल्हातय् लाःगु धयागु नं थ्व हे जुल । थनिं स्वीन्यादँ न्ह्यःया १५सः, २द्वः धयागु आःया १५द्वः २०द्वः स्वयां अप्वः जुल । छगू ला भारत, हङकङ, सिङ्गापुर लिसेंया देशं वःपिं डान्सरतय् नं ब्वति दुगु इन्टरनेशनल कम्पिटिशनय् न्हाप लाःगु, उकीसनं उलिमछि धेबा सिरपाः कथं ल्हातय् लाःगु, गुलि लय्ताः गुलि लय्ताः ।
क्लासिकल डान्सपाखे हे थःगु जीवन बियाच्वनादीम्ह वय्कलं थःगु करीअरया शुरुवात धाःसा वेस्टर्न डान्सं यानादीगु खः । न्हापा ला वय्कलं माइकल ज्याक्सन, ब्रेक डान्स हे यायेगु यानादी । विशेष यानाः साँस्कृतिक संस्थानय् जागीर नयेधुंकाः धाःसा वय्कःया मन चाय्कं मचाय्कं क्लासिकलपाखें क्वसाःवन । थःगु हे मौलिक प्याखंया विशेषता थुयावःलिसे, थुकिया दुग्यंगु अध्ययन यानावंलिसे पाश्चात्य हुलाप्याखनय् स्वयां ला थःगु हे मौलिक हुलाप्याखनय् यक्व शिक्षा व ज्ञान दु धइगु थुयावल व थुकी हे वय्कः अध्ययन, अनुसन्धानलिसें अभ्यास यायां न्ह्याःवन ।
वय्कलं प्याखं हुलादीगु जक मखु, तःगु हे नाटकय् अभिनय नं यानादिल । के सक्कली के नक्कली, साहुजीको लाटि स्वास्नी, सिद्धार्थको गृहत्याग, राजकुमार विश्वन्तर, स्वस्थानीको व्रतकथा, पृथ्वीनारायण शाह, संकल्प, विश्वामित्र, दुर्गा अवतार, नेपालमण्डल लगायतया थीथी नाटकय् मुख्य भूमिकाय् म्हितादिल । राजकुमार, रानीखोला, हतियार लगायतया संकिपाय् नृत्य निर्देशन यानादिल । भारत, चीन, हङकङ, श्रीलङ्कालिसें इन्डोनेसिया, बैङ्कक, फ्रान्स, जर्मनी, जापान आदि देसय् नं ज्याझ्वलय् थःगु प्रस्तुति बियादीधुंकल । सिरपाः व सम्मानया खँ ल्हायेबलय् ग्वःगु ग्वःगु, धयां साध्य हे मजू । १९८५इ इन्टरनेशल मोडर्न डान्स ब्रेक डान्स धेंधें बल्लाखय् न्हाप लाःगुलिसें १९८६य् मोडर्न डान्स कासाय् न्हाप, १९८९य् लोक नृत्य धेंधें बल्लाखय् ल्यू, १९८९य् हे लोकनृत्य धेंधें बल्लाखय् लियांल्यू, १९९५य् कथ्थक नृत्य प्रतियोगीताय् गोल्ड मेडल, २०००य् भरतनाट्यम धेंधें बल्लाखय् गोल्ड मेडल, २००४य् कलानिधि श्रुति युथ म्यूजिक अवार्ड, २००६स साधना सम्मान, २००२स परिवर्तन नेपाल सम्मान, २००८ सालनिसें अमेरीकाय् थीथी अवार्ड स्व. ईन्द्रलाल श्रेष्ठ मेमोरियल अवार्ड, कल्चर त्रेडिस्नल हेरिटेज अवार्ड, आउटस्ट्यान्डिङ पर्फमेन्स एन्ड कन्ट्रिब्यूट नेपाली कल्चरल अवार्ड, एक्सिलेन्स कम्यूनिटि सर्विस एन्ड डेडिकेसन एवार्ड आदि ।
न्हापा १९८५इ वल्र्ड डान्स कम्पिटिसनय् न्हाप लाःगु वय्कलं गलबें ल्वःमंकादी फइमखु । वय्कःया प्याखं हुलेपिं पासापिं येँय् वंगः, झ्वःछेँ अले बसन्तपुरपाखे नापलाइगु, पासापिं नापलानाः प्याखं हुलाः ई वंगु हे चाइमखु । अले चान्हय् १२, १ बजे न्यासि वनाः यलय् हःखाय् छेँय् लिहांवनेगु व ई नं न्ह्याबलें लुमनाच्वं । उगु ईया थज्याःगु खँत लुमनीबलय् आः तसकं न्ह्यइपुसे च्वं । तर व ई कम संघर्षमय नं मखु, प्याखं हुलेगु दबू तसकं म्ह्वः जक दुगु इलय्, सयेके धाःसां आः थें अःपुक्क सयेके खनीगु ई नं मखु । हरेक ल्याखं तसकं थाकु । आः ई हिलेधुंकल । ई ह्यूगुलिसें क्लासिकल डान्सपाखे ल्याय्म्हतय् सक्रियता नं अप्वया वयाच्वंगु दु । आःया ई खनीबलय् पाश्चात्य वा क्लासिकल डान्सपाखे ल्याय्म्हतय् सक्रियता खनीबलय् वय्कः उलि हे लय् नं ताः ।
हुलाप्याखं ख्यःयात थनतक्क थ्यंकेत तःम्हेसिगु योगदान दु । तःम्हेसिगु संघर्षया बाखं सुलाच्वंगु दनि । व हे मध्ये छम्ह खः, यज्ञमान शाक्य । न्हूपिं कलाकार उत्पादन यायेगु नितिं वय्कः थौं नं उलि हे सक्रिय । झीगु मौलिक नृत्यया बारे सीकेत थौं नं वय्कः अध्ययन यानाच्वनागु दीगु दनि । अले अध्ययनं थम्हं सयेकागु, सीकागु खँ मेपिन्त कनेत नं छतिं नुगः मस्याः । वय्कःया थज्याःगु लगनशीलता च्वछायेबहःजू, वय्कःया योगदान हनेबहः । थ्व ख्यलय् वय्कः थुकथं हे न्ह्यज्यानाच्वनेफयेमा । वय्कः न्ह्याबलें नं थुकथं हे धस्वानाच्वने फयेमा । भिन्तुना ।
