पासाया ज्या
पामिभा जिं छ लिसे १०० बर्ष तक्क म्वाये ।
१०० बर्ष तक्क छन्त मतिना याये ।
कलाम्हेस्यां ज्वये पिया स्वइ ।
कलाम्ह ओह… अय्सा छ १०० बर्ष लिपा सुयाथाय् वनेगु ?
छाय् सुम्क … का लिसः ब्यू …. ।
कलाःलिसे यक्व मतिनाया खँ ल्हाये मज्यु ।
टेन्शन
पामिभा थः कलायात ज्वना हथाये हथाये चाचां डाक्टरथाय् वल । कलायात ध्याकुंचाय् तयाः हथाये चाचां डाक्टरयात मेगु कुनय् साला यंकल ।
डाक्टर छु जुल? छाय् …
पामिभा डाक्टरसाप् । जिमि कलानं जिगु ८ जिबिया
मेमोरी कार्ड धुर्काछ्वल धयाः…। आः ला मद्दिक्क
हे म्ये हालाच्वन का… । याकनं गथे याना
लिकायेगु खः छक्व स्वये माल ।
डाक्टर गुब्ले निसें म्ये हालाच्वंगु ले ?
पामिभा हाय् डाक्टर साप् । म्ये–मि त्वतादिसँ । म्ये
हाला ला जितः छुं तन्ता मदु । जितः ला म्येया
फोल्डर लिपा भिडियोया फोल्डरय् दुहांवनिं धकाः
जक चिन्ता जुयाच्वन ।
गाय्ब
कलाम्ह यदि जितः छिं निन्हु प्यन्हु मखन धाःसा छित गथे
ताइ ?
पामिभां थथे तायाः मन चिइ हे मफुत । तसकं हे लय्ताल । धाये मखु धाःसां म्हुतुं प्वाक्क धायेक पिहांवल । – ‘ जितः ला साप हे न्ह्यइपुसे च्वनि ।’
थुलि धायेवं पामिभां आइतबार निसें सोमवार, मंगलबार, बुद्धबार, बिहिबार तक्क थः कला हे मखन । शुक्रवार भचा भचा खन । मिखा मनावःगु भचा क्वलाना ।
न्हूगु स्किम
एन ए सिं छगू न्हूगु स्किम हल । प्लेनया टिकट न्यापिंत कलाया निंतिं नं टिकट छपाः फ्रि । बाइ वान गेट वान । थुगु स्किम तसकं हे हिट जुल। थुकीया फिड्ब्याक कायेगु निंतिं एन ए सिं छगू कमिटि दयेका सकल टिकट न्याःपिनि कलायात फोन याना न्यन – छिगु यात्रा गथे जुल ? । सकस्यां छगू हे जवाफ बिल – छु यात्रा ? गज्योगु यात्रा ?
पुलांगु ल्वये
डाक्टर छुं पुलांगु ल्वय् दु ला ? दुनं दुनं छित नयाच्वंगु दु ।
पामिभा डाक्टर साप । बुलुहुँ न्ववानादिसँ । पिने हे दु ।
वान पिस
कला व भात पोखराय् चाः ह्युवन । लँय् ववं भातम्ह दल । ल्हातय् घाःजुल । हि वल । भातम्ह तसकं हे रोम्यान्टिकम्ह । वँ कलाम्हं थःगु कुर्ताया शल खुनां घाः जूथाय् चिनाबिइ धकाः आशां जाःगु मिखां कलाम्हेसित स्वल।
कलाम्हेस्यां तुरुन्त हे लिसः बिल । – म्वाल यक्व बिचाः यायेम्वाल । थ्व डिजाइनर कुर्था खः ।
म्ह्याय्या चिन्ता
कलाम्ह स्वयादिसँ… । झी मचाया चाल थिक मजू सिल ला?
पामिभा छाय् छु जुल ?
कलाम्ह जितः ला शंका वं… वं ला सुँ ब्वाइफ्रेण्ड दयेकल थें च्वं …
पामिभा हाइँ… छं गथे याना सिल ?
कलाम्ह थौंकन्ह मोबाइल रिचार्ज याये माल धकाः ध्यबा हे मकाः जि के ला…
समस्याया मुक्तिदाता
पामिभा सर जिमि कला जि लिसे छ वाः चाह्युवने धकाः
धयाच्वंगु दु । जितः बिदा माल ।
सर बिइ फइ मखु ।
पामिभा सुभाय् सर । सरं हे जक जितः थज्योगु समस्यां बचे
याइ धकाः जि न्ह्याब्लें विश्वस्त ।
रोम्यान्टिक साय्री
कलाम्ह छिं न्ह्याब्लें फेशबुकय् रोम्यान्टिक रोम्यान्टिक कविता
च्वया… छंगु रेश्म थें जाःगु नायुगु सँ धकाः.. स्वइत
च्वयेगु ?
पामिभा छन्त ला खःनिं । मेपिं सु दु धकाः..
कलाम्ह अय्सा जाः नइबलय् सँ छपू वल धकाः छाय् न्हिछिं
हालेमाःगु ले ?
थौं पिने नः वनेगु
पामिभा थौं झी पिने नयेगु ।
कलाम्ह ज्यु । जिं २ मिनेटं तयार जुयाः वये ।
पामिभा म्वा.. । अथें हे ज्यु । जिं छेँ पिने लासा लानातयागु
दु ।
बेमौसम वा वइगु इलय्
थौं कन्हे इब्यः मदयेक वाः वयाच्वनिं
ब्याहा मयाःपिं म्हगसय् म्हंकाच्वनिं ।
रिलेशनय् दुपिं डेटिंग वनिं ।
ब्याहा यायेधुंकुपिं हाय् आ गन वसः पाये धकाः टेन्सन कयाच्वनिं
