याकनं हे छम्ह मिजं कलाकार व छम्ह मिसा कलाकारयात नेपाः सुपर स्टार धका घोषणा याइगु जूगु दु । थथे घोषणा जुइपिं कलाकार नेवाः फिल्मय् ज्यायाना वया च्वंपिं जुइमा । नेवाः फिल्मय् एक्टिंग याना वया च्वंपिं कलाकारमध्ये छम्ह मिजं व छम्ह मिसायात सुपर स्टार धका घोषणा यायेगु धेंधें बल्लाया निंतिं बेस्ट फाईभ नोमिनेशन कथं न्याम्ह मिजं कलाकार व न्याम्ह मिसा कलाकारया नांया ल्यःज्याः क्वचाये धुंकल । मिजं कलाकारय् आर्यम नकःमि,सुरज व्यञ्जनकार,रूपेन्द्र श्रेष्ठ थक्वाःमि,राजु महर्जन व भागेन्द्र मानन्धरया नां नोमिनेशनय् लाना च्वंगु दु धाःसा मिसा कलाकारपिं मध्ये अर्णपुर्णेश्वरी श्रेष्ठ, हिसिला महर्जन,भिन्तुना जोशी,रोजिना सुवाल व रजनी खड्गीया नां न्ह्यःने वया च्वंगु दु । नेपाः सुपरस्टार ल्यज्या यायेगु ताःतुना निस्वंगु ग्लोबल नेपाः सुपर स्टार फाउण्डेशनं ग्वःगु छगु पिकनिक ज्याझ्वःया ग्वसाः ग्वःगु खःसा उके ब्वति काःपिं कलाकारपिं मध्येजक सुपरस्टारया निंतिं जुइगु धेंधें बल्ला अर्थात नोमिनेशनय् लाईगु सुचं बियातःगुलिं उगु पिकनिक ज्याझ्वलय् पुलापिं कलाकारय् आशाकाजी थकुनिसें कया न्हूपिं कलाकारय् आराध्यलक्ष्मी खड्गीतकया अन उपस्थिति खनेदत ।
थथे उपस्थित जूपिं मध्ये नं सिनियर कलाकार आशाकाजी थकू धाःसा उगु पिकनिक ग्वसाःया कजि जूगु हुनिं सुपरस्टारया धेंधें बल्लाखं पिनेलातसा आराध्यलक्ष्मी खड्गीया आः तक छगु नं फिल्म पिहाँ मवनिगुलिं धेंधें बल्लाखय् दुमथ्यात । सुपरस्टार धइगु खँग्वः विशेष याना फिल्मय् एक्टिंग याइपिं कलाकारया निंतिंजक छ्यलिगु खँग्वः खः । व नं छुं संस्था सिरपा वा हना कथं बीगु खँग्वः मखु । थ्वला छम्ह कलाकार गुलि अप्वः लोकंह्वाः धइगुया दसु खः । तर थन नेवाः फिल्मया ख्यलय् धाःसा थ्व छगु हना वा सिरपा कथं बीत्यंगु दु । थन थ्व खँयात कया चर्चा मयाये । न्ह्यागु हे जूसां छगु संस्थापाखें छम्ह मिजं कलाकार व छम्ह मिसा कलाकारयात दँय् छक्वः छगुलख तकाया सिरपा सहित बीत्यंगु नेपाः सुपरस्टार सिरपायात मेकथं मकासे नेवाः फिल्म ख्यःया छगु तःजिगु हना वा सिरपा कथं काये । नेवाः फिल्मया कलाकारिता ख्यलय् ज्वमदूगु योगदान दुम्ह धइम्ह छम्ह सुरेन्द्र तुलाधर नं खः ।
सुरेन्द्र तुलाधर
छम्ह फिल्म च्वमि अले छम्ह फिल्म निर्देशकया रूपय् नांजाम्ह सुरेन्द्र तुलाधर भाजु छम्ह स्यल्लाम्ह एक्टर अर्थात कलाकार नं खः । आपालं फिल्म,टेलिफिल्मय् थःगु अभिनयया बलं लोकंह्वाम्ह सुरेन्द्र तुलाधर नं सुपरस्टारया धेंधें लाय्माम्ह कलाकार खः । तर सुरेन्द्र तुलाधर धाःसा थ्व सुपरस्टार सिरपाया निंतिं निस्वनातःगु ग्लोबल नेपाः सुपरस्टार फाउण्डेशनया कजि जूगु हुनिं थूगु कासां पिने लाम्ह कलाकार खः । थनथाय्लाक्क लुमंकेमाःगु छता खँ छु धाःसां यदी छम्ह कलाकार थः फिल्मया निर्देशक , च्वमि वा मेगु न्ह्यागु हे विधाय् ल्हा ज्वयेका वयाच्वंम्ह जूसां यदी उम्ह कलाकारं नेवाः फिल्मय् याना वया च्वंगु अभिनयया हुनिं लोकंह्वाम्ह वा योगदान दुम्ह खःसा उम्ह संकिपामियात सुपरस्टारया धेंधें बल्लाखय् लाकेमा । यदी उम्ह कलाकारं नेवाः फिल्मय् याना वया च्वंगु अभिनयया हुनिं लोकंह्वाम्ह वा योगदान दुम्ह खःसा उम्ह संकिपामियात सुपरस्टारया धेंधें बल्लाखय् लाकेमा । थ्वहे हुनिं नांजाम्ह नेवाः संकिपामि आर्यम नकःमिया नां नोमिनेशनय् वःगु खः।
रवि डंगोल
थुकथं स्वयेबले आपालं मेमेपिंनिगु नां वयेमाःगु खः । तर थथे नां वयेमाःपिं कलाकारपिं ग्वसाः खलकं सुपरस्टार ल्यःज्याया निंतिं ग्वसाः ग्वःगु पिकनिकय् ब्वति मकाबले सुपरस्टारया कासां पिनेलावंगु दु । अज्याम्ह हे छम्ह नेवाः फिल्म निर्देशक रवि डंगोल नं खः । रवि डंगोल गुलि लोकंह्वाः धइगु खँ थन धयाच्वनेमालि मखु जुइ । नेवाः फिल्मयात पुनर्जागृत याम्ह धका धयातःम्ह आर्यम नकःमिया “सुभाय्ं”पिहाँ वःगु ईया जःखः हे पिहाँ वःगुं “यांमिखा”या निर्देशक व कलाकार खः,रवि डंगोल । अनं लिपा रवि डंगोलंं “कुलांगार”, “वल वल फसिक्वाः”,ं “व मिसा”, “टेम्पो ड्राईभर”लगायतया फिल्म निर्देशनया नापनापं उगु फिल्म व “थ्वला ग्यानापु स्टायल”आदी फिल्मय्ंं नं अभिनय यात । तर पिकनिकय् थ्यंके मफूगु हुनिं सुपरस्टारया कासाय् मथ्यात ।
बासु शाही
सुपरस्टारया कासाय् मथ्याम्ह मेम्ह छम्ह कलाकार , निर्देशक बासु शाही नं खः । नेवाः फिल्म ख्यलय् दिपा मदिक्क फिल्म दयेका नन् स्टप फिल्म मेकर कथं न्ह्यःने वःम्ह बासु शाहीं आः तकया दुने थ्यंमथ्यं झिंच्यागु नीगु नेवाः फिल्म दयेके धुंकल । अले उकी मध्ये आपालं फिल्मय् मेन रोलय् अभिनय नं याये धुंकल । “लुँयाम्ह झंगः” व “ग्वंगः क्वसः”फिल्मं निसें “वाया दुने जाकी दु” थेंज्यागु फिल्म मध्ये छम्ह निर्माता अले छम्ह निर्देशक वा छम्ह फिल्म च्वमि जुया जक मखसे छम्ह कलाकारया रूपय् नं थःगु प्रतिभा न्ह्यब्वया वया च्वंम्ह बाशु शाही नं सुपरस्टार कासाय् मथ्याम्ह कलाकार खः ।
आशिष्मा नकःमि
सुपरस्टारया कासाय् मथ्यामि कासामि मध्ये दकले चर्चा जुया च्वंगु नां धइगु आशिष्मा नकःमिया नां खः । आशिष्मा नेवाः फिल्म ख्यःया छम्ह साप हे लोकंह्वाःम्ह हिरोइन् खः । “न्याल्लब्या”फिल्मंनिसें न्ह्याःगु आशिष्माया यात्रा आःतक नं निरन्तर हे दनि । खय्तला इहिपा धुंका आशिष्मां मेगु फिल्म म्हितूगु मदुनि । तर इहिपासिबें छुं ई न्ह्यःतिनि आशिष्मां छम्ह फिल्म निर्माताया रूपय् नं पलाः न्ह्याका “लाखेभाजु”नांयागु फिल्म दयेकूगु खःसा “रश्मी”नांयागु छगु फिल्म नं पिदने ल्यँदनि । ंंं
हृदयप्रसाद मिश्र
“सुभाय्”फिल्मनिसें निरन्तर अभिनय याना वया च्वंम्ह ज्वमदुम्ह कलाकार धईम्ह छम्ह हृदयप्रसाद मिश्र खःसा मेम्ह सबिन शाक्य खः । छम्ह ख्यालिन्हिलि कलाकारया रूपय् नांजाम्ह हृदयप्रसाद मिश्रं आपालं फिल्मय् ख्यालिन्हिलां जाःगु रोलय् अभिनय याना तःगु दुसाः वय्कया म्हसीका हे थ्व खः । तर वयकलं “न्हाय्कं” फिल्मय् छगु बिस्कं कथंया रोल म्हितातःगु दुसाः “पानबति”फिल्मय् नेगेटिभ रोल नं म्हितूगु दुसाः “सत्य धरोधर्म”नांयागु फिल्मय् नं मेन रोल हे म्हितुम्ह खःं । छगु कथंया बिस्कंं हे म्हसीका दुम्ह हृदयप्रसाद मिश्र ग्वसाः खलःया पिकनिकय् मथ्यंगु हुनिं सुपरस्टार कासाय् दुम्याम्ह खः ।
सबिन शाक्य
सबिन शाक्य नं “सुभाय्”फिल्मं निसे निरन्तर नेवाः फिल्मय् थःगु पलाः न्ह्याका वया च्वंम्ह कलाकार खः । आपालं आपा नेवाः फिल्म म्हिते धुंकूम्ह सबिन शाक्य धाःसा छम्ह ज्वमदुम्ह कलाकार अले लोकंह्वाम्ह कलाकार खः । “न्याल्लब्यां”, “थः कतः कतः थः”लगायतया आपालं फिल्मनिसें “तानाज्यो”तकया दुने यक्वः हे नेवाः फिल्म म्हितेधुंकूम्ह सबिन शाक्यंं ग्वसाः खलकं ग्वसाः ग्वःगु पिकनिकय् थ्यना नं सुपरस्टारया नोमिनेशनय् मलाम्ह कलाकार खः ।
दकले लिपा
नां ल्ययेगु तातुना जूगु पिकनिक ज्याझ्वलय् नेपालभाषा फिल्म ख्यःया तसकं लोकंह्वाम्ह हिरोइन् आशिष्मा नकःमिया धाःसा उपस्थिति मदु । वय्क थौंकन्हे अमेरिकाय् च्वनाच्वंगु खः । अन उपस्थित जूपिं मध्येजक नां ल्ययेगु धका ग्वसाः खलकं घोषणा याना तःगुलिं भिन्तुना जोशी धाःसा थः भारतया न्हूदिल्लींनिसें वया जूसां उगु ज्याझ्वलय् थ्यंक वःगु खः । उगु ज्याझ्वलय् “भिन्तुना”फिल्मया निम्हं हिरोइन्त रेश्मी महर्जन व रेमा महर्जनया नं उपस्थिति मदु । अले थौंकन्हे राइजिंग स्टारया रूपय् बय्बय् जुया च्वंम्ह “तिन तिकः महाबिकः” फिल्मया हिरोइन् निकी महर्जनया नापनापं ख्वपया कलाकार तिपु श्यामसुन्दर शिल्पकार व अर्णेश्वरी शिल्पकार अनंलि हरिश तण्डुकार, राजु महर्जन जुजु व राजु स्यस्यःलगायतया नं उपस्थिति खनेमदु । “पटाचारा” व “कृषा गौतमी” म्हितूपिं नेपाःया हे नांजापिं कलाकारपिं मेलिना मानन्धर व कर्मा व कलाकार व निर्देशकया रूपय् पलाः न्ह्याका वया च्वंम्ह रुपिन डंगोलया नं अन उपस्थिति खनेमदुसा आपालं आपा फिल्मय् थीथी कथंया भुमिकाय् थःगु प्रतिभा न्हयब्वया वया च्वंपिं कलाकार पल्पसा डंगोल व सुनिता श्रेष्ठ ठाकुर थेंज्यापिं नं पिकनिकय् मवःगु हुनिं सुपरस्टारया नोमिनेशनय् मथ्याम्ह कलाकार खः ।
बिजय रत्न असंबरे
