न्ह्यखँ
उजं शाक्य नेपालभाषाया संगीत ख्यलय् छम्ह न्हूम्ह नगु थें थियाच्वंगु नां खः । इमर्ज ब्याण्डया मैंचा म्येपाखें नेपालभाषाया संगीत ख्यःयात छगू न्हूगु मोड बिइफइ धैगु आश सकल कलाकार व न्हूगु पुस्तायात ब्यूगु नां खः । उजंया हे दकलय् लिपांगु नेवाः म्ये राजमतिचा, थौं कन्हे तकं नं लोकंह्वानाच्वंगु दु । उजं शाक्यया युट्युब च्यानलय् दुगु थुगु म्येया भ्यूज नं आः १.७ M पुलेधुंकल । थुगु म्ये नेपालभाषा ख्यःया मेगु सुपरहित म्ये खः ।
म्ये
म्येया च्वमि व संगीतकार लिसें म्ये हालामि उजं शाक्य हे खः । म्येय् थौं कन्हेया ट्रेण्ड कथंया संगीत बिइत उजं शाक्य ताः लाःगु दु । म्येया शब्द नं तसकं हे सरल जु । संगीत संयोजन नं उतिकं हे कर्णप्रिय जु । उजं शाक्य नेपालभाषाया संगीत ख्यलय् छम्ह पूर्ण प्याकेज कथं हे खनेदु । छम्ह हे कलाकारं म्ये च्वयेगु, लय् तयेगु, संगीत जायेकेगु लिसें म्ये हालेगु व अभिनय नं यायेगु अले म्ये हिट नं जुइगु धैगु नेपालभाषा संगीत ख्यःया निंतिं छगू तःधंगु हे उपलब्धी कथं नाले माः ।
भिडियो
थुगु भिडियोस उजं शाक्य थःम्हं हे सिंगर लिसें मोडल जुयाः म्हिताच्वंगु दु । राजमतिया भुमिकाय् गृष्मा महर्जन लिसें हिसिला महर्जनया राजमतिया नं केमियो दु । भिडियोया निर्देशन युट्युबय् अतिकं लोकंह्वानाच्वंम्ह आशुतोष बाराहीं यानातःगु दु । थुकीया परिकल्पना उजं शाक्य, आशुतोष बाराही लिसें रपिल महर्जनं यानातःगु दु। भिडियोया छायाँकन व सम्पादन रपिल महर्जनं यानातःगु दु । लिसें मेपिं केमियो कथं थुकी मनोज महर्जन व आशुतोष बाराही नं थुकी खनेदु । थुगु ल्याखँ नेवाः म्यूजिक भिडियोस स्वम्ह स्वम्ह कलाकारया केमियो दु तर नं हिसिला महर्जनया केमियो तसकं हे विशेष खने दु । वय्कया इन्ट्री जुइबलय् छगू कथंया उत्साह स्वकुमिपिंके खंके फइ ।
विश्लेषण
लोक म्ये राजमति म्ये नेवाः सभ्यता लिसे स्वानाच्वंगु छपू लोक म्ये खः । लोकम्येय् वर्णन यानातःम्ह छम्ह मिसाया रूपयात कयाः राजमति धैगु नां व स्वरूपया छम्ह बांलाम्ह मिसाया पर्यावाची खँग्वः थें थौंकन्हे छ्यलाबुला जुयाःच्वंगु दु । थुगु हे शब्दभावय् म्ये तयार जुयाच्वंगु दु । राजमति नां थौंया इलय् आधुनिक नां मखु । इतिहास व लोकम्ये थ्वयाच्वंगु नां खः । थुगु हे नामय् जितः योम्ह राजमतिचा धकाः छम्ह मिसायात सम्बोधन यानातःगु दु । म्येया परिवेश धाःसा थौंया ई कथं दु । लोकेशन लिसें उजंया फेशन सेन्सं म्ये थौंया ईयात इंगित यानाच्वंगु दुसा संगीत नं थौंया हे ईया खः ।
राजामतिया बारे अनेकौं म्ये पिदने धुंकल । तर थुगु म्ये संभवत् राजमति लोक म्ये धुंकाः राजमतिया बिषयलय् दकलय बांलाःगु म्ये जुइ माः । छाय्की थुकीया शब्द, संगीत लिसे सकतां हे पाय्छि खनेदु । म्येया भ्यूज हे १.७ M पुले धुंकल । म्येया सफलताया चिं थुकिं हे क्यनाच्वंगु दु ।
भिडियोस उजं शाक्यया अभिनय लिसें ग्रिष्मा महर्जन तसकं हे रिफ्रेशिंग खने दु । निर्देशक आशुतोष बाराहिं निम्ह कलाकारपिंत थःगु नियन्त्रणय् तयाःतःगु दु । आशुतोषया युट्युबय् थी थी ख्यालः भिडियो त दु । तर व भिडियोत स्वयेबलय् कमेडी जुसां गनं गनं कृतिम नं खनेदु तर थुगु भिडियोलय् गनं कृतिमता खने मदु । आशुतोषं ख्यालः भिडियो लिसें नेवाः म्यूजिक भिडियोत नं यानाः वनेमाःगु खने दु ।
गननं कलाकारपिं थःगु क्यारेक्टरं पिहांवंगु खने मदु । थी थी कलाकारया केमियों कलाकारपिनिगु महत्व झन हे अप्वयेकाब्यूगु दु । हिसिला महर्जनं थ्व सिबें नं न्हापा छुं छुं म्यूजिक भिडियोस राजमति हे जुयाः केमियो यानादीगु दु । तर थुगु भिडियोलय् यानाच्वंगु केमियो रोल तसकं हे च्वछाय्बह जु ।
संभवत् छगू म्यूजिक भिडियो गथे जुइमाः धैगु बिषयलय् गनं दसू न्ह्यब्वयेमाःसाः थुगु म्ये छगू पूवंगु म्यूजिक भिडियो खः धकाः धायेमाः । छाय्की थुकी कलाकार, म्ये हालामि, बाखं लिसें थुकीया एण्डिंग तसकं हे बांलाःसा छायाँकन पक्ष नं तसकं हे बांलाः जु। नेपालभाषा ख्यलय् छम्ह सेल्लाम्ह निर्देशक लिसें प्रोडक्शन टिम थन दु धकाः धस्वानाच्वंगु थुगु पुचः खने दु ।
आलोचना
थुगु भिडियोस आलोचना यायेथाय् तसकं हे म्हो । संभवत आलोचना यायेत गनं ध्वात्थुके थाकु अय्नं थुगु म्येग्वः पुवंक म्येया संरचनाय् मदु । थुगु म्येग्वःयात पूर्ण रूप बिइफइगु स्थीति यक्व हे दुगु खःसां म्ये च्वयातःगु कथं यक्व हे खँ अपूर्ण खने दु । म्येय् राजमतिया ख्वाः बांलाःनं यल तर गथे यानां धाये, धाये मवः धका तसकं यइपुक्क वर्णन यानाः च्वयातःगु खःसां लिपाः वं लिसें न्हापांगु झ्वः हे लिसा कयाः कयाः हालातःगु दु । थुकींयानाः म्येग्वःया स्तर गुलि थहां वनेमाःगु खः व कथं मवं । म्ये न्यन्यं हे म्ये च्वमि अल्छिचाया वनला थें तायाः वइ ।
थौंकन्हे म्येहालामि पिंसं शब्दया उच्चारण स्यंका बिइवं सकस्यां अज्योगु शब्द लिसा कयाः हालिबय् नेवाः शब्दत झन झनं प्रभावित जुयाः वनाच्वंगु वाः चायेके फइ । म्येहालामिं म्ये हाले धुंकाः न्यनिंपिसं नं व हे कथं म्येहालीबलय् शब्द त स्येना वं । थुगु नं म्ये वयेका जिला मातिनाया स्वां ज्वनाः वयेका शब्द हालीगु इलय् छगू हे शब्द मतिनायात मति–नाया यानां शब्द फानां उच्चारण यानातःगु दु । फयांफत्तले शब्द फानां म्ये महाःसा बांलाइ । छम्ह बांलाम्ह गाय्क व संगीतकारं थज्योगु खँ वाः चायेके माः ।
अथे हे ब्वयेका दक्वं सरगम सरगतय् ब्वयेकाः छंथाय्.. म्येग्वः काइबलय् नं ब्वयेकालय् विसर्ग अथवाः भचाः ताः हाकः उच्चारण जुइमाः । ब्वयेका जक धाइबलय् थः ब्वये (I will fly) जक जुइ तर म्यें धाःसा ब्वयेकाः (I will be flying) या उच्चारण माग यानाच्वंगु दु । खँ चिचिधं थें खने दुसां शब्दया शाब्दिक उच्चारण पुवंके फुगु जुसा थुगु म्ये अझ झन हे सुथां लाइगु जुइ ।
लिखँ
नेपालभाषा ख्यः न्हू पुस्ताया खः । न्हू पुस्तां नेपालभाषा ख्यलय् पलाः न्ह्याकाः सुथां लानाच्वंगु दु धैगु दसू राजामतिचा म्ये खः । म्ये तसकं हे बांलाः जु अले म्ये संपुर्ण विधाय् न्याय् यानाच्वंगु दु । म्ये अझं झन हे ताः लायेमाः धकाः भिंतुने ।
