दिवंगत् गणेशदेवी मानन्धरया निक्वगु बार्षिकि लाकाः वइगु जेष्ठ ६ गते शनिवार, मरूहिति व्यांक्वेटय् , १२बजे न्हापांगु साहित्यिक एवं सङ्गितिक सम्मान ज्याझ्वः यायेत्यंगु दु । दिवंगत गणेश देवि मानन्धर – येँ महानगरपालिका १३ वडाया समाजसेवी दिलबहादुर मानन्धरया जहान खःसा वय्कःया कायपिं प्रा. डा. राजु मानन्धर (अस्ट्रेलिया), राजु मानन्धर, राजेश मानन्धर व सज्जु मानन्धर खः । दिवंगत् गणेशदेवी मानन्धरया लुन्तिइ वय्कःया परिवारपाखें गणेश देवी मानन्धर स्मृती प्रतिष्ठान गठन जूगु खः ।
थुगु समारोहस गायन, संगीत व पत्रकारीता बिधा याना मुक्कं स्वम्ह उत्कृष्ट ब्यक्तित्वपिन्त नगद लःल्हासें सम्मान लः ल्हायेत्यंगु खः। थुगुसी न्हापांखुशी जुइत्यंगु थुगु सम्मानय् जनगायक भृगुराम श्रेष्ठ, वरिष्ठ सिने पत्रकार विजयरत्न असंबरे व उदीयमान कलाकर सिद्धार्थ बज्राचार्ययात ल्यःगु दु।
छुं दिं न्ह्यः जक हे १३ वडाया स्थानीय समाजसेवी विजयकुमार मानन्धरया अध्यक्षताय् झिंस्वम्ह सदस्य च्वनां थुगु प्रतिष्ठान गठन याःगु खः । प्रतिष्ठानय् थीथी ख्यःपाखें प्रतिनिधित्व जुइकथं ज्यासना पुचःयात पूर्णता बिउगु दु । सांस्कृतिक, सांगीतिक, साहित्यिक ख्यलय् विशिष्ट योगदान बियादीपिं स्रष्टालिसें पत्रकारिता ख्यलय् क्रियाशील जुयाच्वनादीपिं स्वतन्त्र रूपं मूल्यांकन यानाः सम्मान यायेगु उद्देश्य प्रतिष्ठानया गठन जूगु खँ जानकारी ब्यूगु दु । नेपालभाषाया साहित्य व संगीतयात अन्तर्राष्ट्रियस्तरय् समृद्ध यायेगु निंतिं प्रतिष्ठानं थःगु थासं भूमिका म्हितीगु व देश विदेशय् दुगु प्रतिभायात नं सम्मान यायेगु योजना दुगु अध्यक्ष मानन्धरं कनादिगु दु ।
प्रतिष्ठानया ज्यासना पुचःपाखें छगू परामर्श समिति नं गठन याःगु खः। निर्देशक, च्वमिलिसें कलाकार पवन जोशीया संयोजकत्वय् थुगु परामर्श समितिइ उप संयोजक वरिष्ठ कलाकार नगिना जोशी, दुजः संगीतकार सुरेन्द्र श्रेष्ठ, म्येहालामि निशा देशार व पेजथ्री बाःछिपौया सम्पादक दर्शनवीर शाक्य दु । समितिं याःगु सिफारिसया लिधंसाय् स्रष्टा व विधा ल्ययाः सम्मान याःगु प्रतिष्ठानं जानकारी बिउगु दु ।
