सुनाकुथि स्थापना यानातःम्ह व विश्वया हे दकलय् तःधिम्ह भिंद्यःया प्रचारय् दयेकातःगु म्यूजिक भिडियो दर्शन याः वने नु बोलया म्यूजिक भिडियो दरवारमार्ग स्थीत किंग्स् लाउन्जय् प्रिमियर जुल । अतिथी द्वय वरिष्ठ हास्य कलाकार मदनकृष्ण श्रेष्ठ व हरिवंश आचार्यया उपस्थीतिइ म्येया प्रिमियर जुगु खः। सुनाकुथिया बालकुमारी चौर लिकसं १२ फिट तःधिम्ह भीमसेनया मूर्ति स्थापना यानातःगु दु। सुनाकुथि समाजका अध्यक्ष बिनोद डंगोलं मच्छेगाँया छगू गालं (खोंच) गुलि दुःख सियाः लां लां बिइका ल्ह्वं हयाःगु व उकिं भिंद्यःया मूर्ति देकागु खँ कनादिल । थ्व हे झ्वलसय् सुनाकुथि निवासि रुपेश डंगोललिसे जानाः थुगु द्यःया प्रचारया नितिं दर्शन याः वनेनु बोलया म्ये निर्माण जूगु खँ कुलादिल । म्यूजिक भिडियोया समीक्षा वरिष्ठ सिने पत्रकार विजयरत्न असंबरें यानादीगु खः ।
अतिथिपिं हरिवंश आचार्यं भिंद्यःया म्येय्या प्रिमियरय् थः नं थ्यंनेफूगु धैगु हे मदनकृष्ण श्रेष्ठया संगत याना जक खः धाःसें भिंद्यःया कृपा सकलसितं दयाच्वनेमाः धयादिल । वरिष्ठ हास्य कलाकार एवं ख्यालि जुजु मदनकृष्ण श्रेष्ठं भिंद्यःया म्ये हाले खनां तसकं हे लय्ताःगु खँ कनादिल । म्यूजिक भिडियोया निर्देशक सुरेन्द्र तुलाधरं म्यूजिक भिडियोस १६म्ह म्येहालामि व निसःसिबें आपाः स्थानीय वासिन्दा संलग्न जूगु खँ कनादिल ।
थुगु म्येय् मदन कृष्ण श्रेष्ठ, हरिवंश आचार्य, प्रवेशमान शाक्य, जेम्स प्रधान, बबिन प्रधान, भीम तुलाधर, ज्योति घिमिरे, बुद्ध सायमि, सचिन रौनियार, भुपेन्द्र बज्राचार्य, विजय गुरुङ, कविन्द्र श्रेष्ठ, यमन श्रेष्ठ, नील शाक्य, बिजय गुरुङ्ग व लसता जोशीं म्ये हालातःगु दु। म्यूजिक भिडियोया छायाङ्कन व सम्पादन सोहन मानन्धरं यानातःगु दु ।
