न्ह्यः खँ
नेपालभाषाया सांगीतिक ख्यलय् छगू लहर वयाच्वंगु दु । नेपालभाषाया संगीत ख्यलं छगू गति कयाच्वंगु दु । ट्रेडिशनल संगीतया सवाः सकस्यां ययेकाच्वंगु दु । पुलांगु पहया म्ये हे नेवाः म्येया पहिचान जुयाःच्वंगु दु । थुकीं हे निरन्तरता काइगु खनेगु । थुगु हे झ्वलय् ज्योति म्यूजिक (युट्युब च्यानलं) सचिका चिना बोलया म्ये पितहःगु दु । नेवाः पारम्परिक बाजं ग्वसालय् थुगु म्ये तयार जूगु दुसा म्येया परिवेश नं पुलांगु हे परिवेश क्यनेत स्वःगु दु । थुगु म्येया निर्देशक, च्वमि व परिकल्पना विश्वास बज्राचार्यया दु ।
अडियो
म्येया च्वमि, निर्देशक व परिकल्पना बिश्वास बज्राचार्यया दु । पेजथ्री पिपल्स च्वइस अवार्ड ११४२य् म्यूजिक भिडियो विद्याय् उत्कृष्ट निर्देशकया अवार्ड त्याकेत ताःलाम्ह खः विश्वास बज्राचार्य । पेजथ्री अवार्ड लिपा विश्वासया हे निर्देशनय् लिफः लिफः (१०५प) व छं अय्ला मलुसा (१२२प) निपू म्ये पिदने धुंकल । थुगु म्ये निभाः डंगोलया सः दु । निभाः डंगोल थौंया इलय् नेपालभाषा ख्यःया छम्ह राइजिंग स्टार खः । भ्वइस अफ नेपालय् नं थःगु उपस्थीति न्ह्यब्वये धुंकुम्ह निभाःया सः सकस्यां हे ययेकु । म्येया संगीत सुरेन्द्र श्रेष्ठया दु अले संगीत संयोजन जीवित जल्मीया दु । वय्कपिं निम्हं नेपालभाषाख्यःया सकृय एवं वरिष्ठ सर्जक जुयादी धुंकल । वय्कपिनिगु संगीत व संगीत संयोजन तसकं हे कर्णप्रिय जू ।
भिडियो
सचिका चिना म्येया मू कलाकार कथं नैन्सी महर्जन व निभा डंगोल दु । थौं कन्हेया मिसा मस्तय् फेशन सेन्सयात कयाः छम्ह अजिं कुँखिनि तर मेम्ह अजिं धाःसां न्हापा थःगु इलय् थःपिं झन नक्कली धैगु खँ लुमंकाः म्येया भिडियो न्ह्याइ । भिडियोया बाखं कथं निम्ह मिसामस्त जोवन जायाः वःलिसे समाः यानां बांलाका मनय् ब्वलनाच्वंगु कुतुहौलताय् दुबिनाच्वंगु दु । भिडियो क्वचाये धुंकाः नं व हे निम्ह छय्पिं थुगु हे म्येय् झन न्हून्हूगु फेशन लिसें व हे म्येया टेक्नो बिट्य् प्याखँ हुला क्वचाइ ।
विश्लेषण
सचिका चिना म्येया शब्द कथं स्वयेगु खःसा थुकी छम्ह मिसा मचाया सौन्दर्यताया इच्छा प्वंकाच्वंगु तायेदु । सचिका चिइगु, सपः हिनेगु अले लाली तयाः बांलाकेगु गुगु इच्छा हरेक मिसामचाया जुयाःच्वनिं , उकियात अंकित यानाः म्येग्वः च्वयातःगु दु । जोवन जायाः वःलिसे छम्ह मिसा मचां लः काःवनेत नं समाः याना जक वने धैगु भाव थुकी दु । उकिं थुगु म्येया टाइमलाइनयात स्वयेगु खःसा मिसा मस्त घः ब्यकुंच्यानाः लः कावनेगु ईया खः धकाः धायेमाः । थःत ययेकाः तःम्ह सुँ दइ धैगु छगू कल्पना म्ये च्वमिया दु ।
म्येया भिडियो थुगु हे परिकल्पनायात साकार यायेगु निंतिं अजि व छय्या निगु पुस्ता संवाद लिसें फ्लाय्सब्याकय् यंकाः म्ये न्ह्यब्वयतःगु दु । गनं अजिम्हं थः बैसं जायाः वःगु ईया लुमंकाः म्ये न्ह्यब्वयातःगु दु । नेवाः समाजया लकसयात न्ह्यब्वयाः मिसा नेवाः मिसामस्त हितिइ वनाः लः काः वनेगु ई थौं सिबें ४०/५० वर्ष न्ह्यःयात इगित भिडियोलय् यानाःतःगु दु । उकिं निगू टाइम फ्रेम थुगु म्ये दुथ्याःना च्वंगु दु ।
भिडियोया निर्देशकं छम्ह मिसामचाया भावयात नालाः थःगु च्वसा, परिकल्पना व निर्देशनं न्ह्यब्वयेत स्वःगु दु । मिसातय् मनया इच्छा गथे जुइ धकाः न्ह्यब्वयेत स्वःगु दु । यौवन जायाः वः लिसे ब्याहा जुइगु अले मचाः प्वाथय् दइगु खँयात गुलि कौतुहलतां मिसा मस्तय्सं स्वयाच्वनिं धैगु नं संकेत थुकी दु ।
भिडियोलं क्यं थें हे निम्ह मिसा मस्त थःगु यौवनं जाःगु इलय् नुगः चिइ मफूगु अवस्थां नेवाः समाजय् मिसा मस्तय् यौनकुण्ठायात न्ह्यब्वया तःगु दु। मिसा मस्त यौवनं जायाःवःगु इलय् यौनिकतायात ब्वइ । तर व हे मिसा मस्त अजि जुइ धुंकाः हाकनं थौंया पुस्तायात वसः गथे याना पुनिइ धकाः कुँ खिनाच्वंगु नं क्यनातःगु दु । मिसातय्गु स्वतन्त्रताय् मिसात हे चकने मफूगु धैगु खँ नं थुगु भिडियोलय् खने दु ।
आलोचना
भिडियोया टाइम फ्रेम कथं निथी दु । छथी ई अजिया पालय् अले मेगु ई थौंया ई । थुपिं नितां हे टाइम फ्रेमयात दृष्यया ल्याखं भचाः पाके फइगु अवस्था दु । थौं या इल्य् भचा कलर करेक्शनपाखें पुलांगु फ्लाय्स ब्याकया भिडियो व थौंया ईया भिडियो पाके फूगुगु जुसा अझ सार्थक जुइगु । थौं सिबें ४०÷५० बर्ष न्ह्यया परिवेश धकाः उलि सशक्त रुपं प्रस्तुत जुइ मफू । क्वथाय् दुनेया आधुनिक मत (चीम), पावर सकेट, लँय् न्हूगु मोडलया गाडी, स्कूटी इत्यादि खँयात क्यामरापर्सनं वाःचायेकमाःगु खः ।
छगू संवादं धुंकाः म्ये शुरु जुइवं निम्ह चरित्र सु खः वा छु खः धैगु खँय् भचा अलमल नं जू । निम्हं चरित्र गुगुरुपं स्टाय्ब्लिस जुइमाःगु खः, उकिइ अलमह जू । निम्हं चरित्र व हे अजिपिं खः वा अजिया छय्पिं खः धैगु खँय् नं अलमल जुइ ।
भिडियोस सचिका चिनां व सपः हिना धैगु शब्द बारम्बार वयाच्वंसां सपः हिनाच्वंगु वा सपः हिनातःगु दृष्य छगू नं मदु । मसः मसः लाली तयाः धयातःथाय् तसकं हे मिलेजुइक लाली तयाःतःगु दुसा सपः हिनातःगु धाःसा तसकं हे छ्वासू । उकिं थुगु म्यूजिक भिडियोया छगू कम्जोर पक्ष मेकअप नं जुयाःच्वंगु दु । थौं सिबें ४०÷५० वर्ष गथे याना मेकअप याइ जुइ धकाः जक मखुसे व ईया हयर स्टाइलनं स्वये आवश्यक जू । म्यें धयाःच्वंगु सपः हिनिइगु खँयात बेवास्ता यानातःगु दु । निम्ह कलाकार दुथ्याकातःसिनि छम्हेसिया सँ भचाः पाकुसा बांलाइगु खः ।
लिखँ
ज्योति म्यूजिक नेपालभाषा ख्यःया छगू थां कथं दं वयाच्वंगु दु । नेपालभाषाया म्यूजिक च्यानल जक मखुसे निरन्तर रुपं म्ये निर्माण यानाः वयाच्वंगु दु । थुगु टिमया ज्याखँय् तसकं हे मेहनत नं खनेदु । पुलांगु म्यूजिक भिडियोसिबें न्हूगु म्युजिक भिडियो त झन झनं बांलानावयाच्वंगु दु । म्येया च्वसा कथं मिसातय्गु यौनिक सःयात खुल्ला रुपं न्ह्यब्वयेफुगुलिं थुगु म्यूजिक भिडियोया परिकल्पना च्वछाये बहजू । नेपालभाषा ख्यलय् न्हूगु पुस्ता बुलुहुँ दुहांवयाच्वंगु दु । तर थुगु म्येयात निभा डंगोलया न्हापांगु सोलो म्ये धकाः प्रचार यानाच्वंगु दु जबकि थ्व सिबें न्ह्यः गाल रे गाल बोलया सोलो म्ये निभाः डंगोलं हाले धुंकुगु दु । प्रचारया ट्यागलाइनयात नं तथ्यगत जाँच यायेगु आवश्यक जु ।
