न्यादँ खुदँति न्ह्यः “द मिस नेपाल” नांयागु छगू फिल्म पिदन। नेवाः फिल्मख्यःया नांजाम्ह निर्देशक सुरेन्द्र तुलाधरं निर्देशन यानादीगु थ्व फिल्मया निर्माता व हिरोइन सुभेच्छा थापा खः। थ्व फिल्मय् ब्यूटी कन्टेस्टया बाखं क्यनातःगु दु। थथे ब्यूटी कन्टेस्ट त्याका फिल्मय् हिरोइन् जूवइपिं कम मजू। बलिउड धकाः धयातःगु हिन्दी फिल्म ख्यलय् ब्यूटी कन्टेस्ट त्याका वःपिं हिरोइनत यक्वः दु। तर कलिउड धकाः धयातःगु खस नेपाली फिल्म ख्यलय धाःसा थथे ब्यूटी कन्टेस्ट त्याका वःपिं हिरोइन त उलि मदुनि। खय्तला नेपालय् थज्यागु ब्यूटी कन्टेस्ट शुरु जूगु नं ला उलि मदुनि। दकलेसकले न्हापांगु ब्युटी कन्टेस्ट धइगु हे सन् १९९४ य् मिस नेपालया नामं जूगु खः। हिडन ट्रेजरया ग्वसालय् जुया वयाच्वंगु थ्व कासा आः तक जुया वया च्वंगु दु।
सन् १९९४य् जूगु दकले न्हापांगु कासाय् मिस नेपाल जुइत तालाम्ह रुबी राणा खः। अले रुबी राणा हे न्हापा फिल्मय् पलाः न्ह्याकुम्ह दकले न्हापांम्ह मिस नेपाल खः। थौंसिबें नीदँनीन्यादँ न्ह्यः राजेश हमाललिसे “अनमोल” नांयागु फिल्म म्हितूगु खःसा वधुंका सुनिलदत्त पाण्डेलिसे “भुतुक्कै भएँ नि” नांयागु फिल्म म्हितल। तर थ्व निगुलिं फिल्मं स्वकुमिया नुगः त्याके मफुत। अनंलिपा वं मेगु हे लजगा ज्वन। रुबी राणां लिपांगु इलय् वया “अन्तराल” फिल्मया लुखां हाकनं छक्वः फिल्मय् इन्ट्रियात अले “आधी बाटो” व “शिशा” नांयागु फिल्म नं म्हितल तर सपोर्टिंग रोलय् रिइन्ट्रि जुइत याःगु कुतः नं ताःलाये मफुत।
थुकथं दकले न्हापांम्ह मिस नेपालया फिल्म यात्रा ताःमलातसा आ थगुनेया मिस नेपाल निकिता चण्डकं नं फिल्मपाखे पलाः न्ह्याका मिस नेपालतय्गु फिल्म यात्रायात निरन्तरता बीगु ज्या याःगु दु। खय्तला निकितां म्हितेगु धका क्वछ्यूगु “रानी महल” फिल्मयाबारे उलि बांलागु खँ पिहाँ वया च्वंगु मदु, अय्सां निकिताया नं हिरोइन जुइगु ईच्छा दु धइगु खँ थुकें क्यंगु दु। थथे कलिउडय् हिरोइन् जूपिं मिस नेपालतय्गु यात्रा स्वयेगु खःसा उलि ताःलागु धाःसा खने मदु। आः तक मूक्कं नीस्वम्ह मय्जुपिं मिस नेपाल जुइधुंकल सा उकी गुम्हेसिनं कलिउडय् दुहाँ वनेगु कुतः याःगु खने दु।
अजुचायापुसे च्वंगु खँला छु धाःसां मिस नेपाल हे जुइत ताःलाःपिं बाहेक मेमेगु ब्यूटी कन्टेस्ट त्याकूपिं वा मिस नेपालय् ब्वति कया मेमेगु उपाधी त्याकुपिं धाःसा फिल्मय् दुहाँ वःगु उलि खने मदु। उकी मध्ये सन् १९९७ य् झरना बज्राचार्य मिस वल्र्ड नेपाल जूगु ईलय् फस्र्ट रनर अप जूम्ह मिनाक्षी वन्दना शर्मा छम्हेसिनं हे जक फिल्मय् अभिनय याःगु दु तर नेपाली फिल्मय् मखु , हिन्दि टेलिसिरीयलय्। मिनाक्षीं भारतय् “हम फिर मिलेंग”, “करीना करीना”, “कीट्टा” नांयागु छुंछुं हिन्दि टेलिसिरीयल म्हितल तर वयागु पलाः नं अन क्वातुइ मफुत।
मिनाक्षी मय्जु फस्र्ट रनर अप जूबले मिस वल्र्ड नेपाल जूम्ह झरना बज्राचार्य मय्जु कलिउडय् जक मखसे बलिउडय् तक नं हिरोइन जूगु कुतः यात। नेपालय् शुटिंग जूगु हिन्दि फिल्म “लभ इन नेपाल” य् तकं म्हितूम्ह झरनाया न कलिउड यात्रा सुथांलात न त बलिउड यात्रा हे। “हतियार” नांयागु फिल्मय् डेब्यू याम्ह झरना बज्राचार्यं “शुभकामना”, “कोही मेरो”, “सिंउदोको सिन्दुर”, “भाईटिका”, “संजीवनी” थेंज्यागु झिगू झिंन्यागुति फिल्म म्हितल तर हिट हिरोइन्या दर्जा काये मखं। उकीसनं झरनाया “सेफ ल्याण्डिंग”, “रंगीन मनशाय” व “दिदी बहिनी”थेंज्यागु फिल्मत पिहाँ हे वये मफुबलय् वयात कया फिल्म दयेकीपिं हे मदया वन। झरनां लिपा वना “सेफ ल्याण्डिंग” फिल्मया प्रोडुसर राहुल अग्रवाललिसे इहिपा याना जीवनया सेफ ल्याण्डिंग यात।
आ तकया दुने मिस नेपाल जूपिं मध्ये रुबी राणा, सुमी खड्का, झरना बज्राचार्य, मलिना जोशी, सृष्टि श्रेष्ठ धुंकाः आः वया निकिता चण्डकं कलिउडय् हिरोइन जुइगु कुतः यात सा मेपिन्सं थथे मयाः। खय्तला सन् २००२ या मिस नेपाल माल्भिका सुब्बां हिरोइन् जुइगु कुतः मयागुला मखु तर वं म्हितूगु न्हापांगु फिल्म “गुडबाई काठमाण्डौ” नांयागु फिल्म रिलिज हे मजूबलय् वयागु हिरोइन् जुइगु इच्छा अथेहे तुं लात। मेम्ह मिस नेपाल सुमी खडकां नं “ग्रहण” नांयागु फिल्मया लुखां थःयात हिरोइनया रुपय् न्ह्यब्वयेगु कुतः यात। थ्व फिल्मया बनेज्या ताः मलात। अनं लिपा भुवन के.सी. थेंज्याम्ह नांजाम्ह स्टारं सुमीयात “सुपरस्टार” फिल्मय् हिरोइन् दयेकल। थ्व फिल्म नं फ्लप हे जूबलय् सुमी खड्काया यात्रा दित।
कलिउडय् थ्व दँबदँ न्ह्यः खनेदयेक वःपिं निम्ह मिस नेवाः धइपिं मलिना जोशी व सृष्टि श्रेष्ठ खः। सृष्टि श्रेष्ठयात थःगु न्हापांगु हे फिल्म “गाजलु” ई अनमोल के.सी. थेंज्याम्ह लोकंह्वाम्ह हिरोया हिरोइन् जुइगु ह्वता चू लात। फिल्म नं सुपर हिट हे जुल। तर वयागु मेगु फिल्म धाःसा पिदंगु मदुनि। थौंकन्हे सृष्टि मयजु थःगु फिल्मी क्यारियरसिबें कलिउडया हिरो सौगात मल्ललिसेया यःत्यःया यात्राय् न्ह्यावना च्वंगु खने दु। अथे हे तु मलिना जोशीं नं सन् २०१३य् “ऋतु” फिल्मं न्ह्याकूगु यात्रा “झुम्की”, “संरक्षण”, “लीला” व “द वीनर” थेंज्यागु आपालं फिल्मतक थ्यंकूसा वयागु पलाः नं आतक थातय् लाय्फूगु मदुनि।
थुकथं न्ह्याना च्वंगु मिस नेपालतय्गु हिरोइन् जूइगु यात्रा आः तक उलि ताःलागु खने मदुनिसा कलिउडय् थःगु पलाः न्ह्याकूपिं मेमेपिं मध्ये माल्भिका सुब्बां लिपा वना फिल्म प्रोडुसरया रुपय् “हाउ फन्नी” फिल्मय् लाय् तःगु खनेदत सा रुबी राणां लिपा वना क्यारेक्टर आर्टिस्ट जुइगु तकं कुतः यात। थुपिं बाहेक जेनिशा मोक्तान, उषा खड्गी, ईशानी श्रेष्ठ नं फिल्मलिसे स्वापु तःपिं मिस नेपाल खः। आपासिनं थः मिस नेपाल जुइ धुंकाः फिल्मय् स्वापु क्वातुकेगु स्वःगु खनेदुसा सन् २०१३ या मिस नेपाल ईशानी श्रेष्ठं धाःसा थः मिस नेपाल जुइसिबें यक्व हे न्ह्यः मचाबलय् हे बाल कलाकारया रुपय् कलिउडय् पलाः न्ह्याकूगु खः।
एक्शन स्टारया रुपय् नांजाम्ह शिव श्रेष्ठया मेन रोल दूगु “लक्ष्मण रेखा” नांयागु फिल्मय् बाल कलाकार जुया म्हितूम्ह ईशानी श्रेष्ठं उगु दँय् नेपाल चलचित्र संघं ग्वसाः ग्वःगु मोशन पिक्चर एवार्डय् बेस्ट चाईल्ड आर्टिस्टया सिरपा तकं त्याकेत ताःलागु खः। अथे हे तुं सन् २००९ या मिस नेपाल जेनिशा मोक्तानं आर्यन सिग्देल व नम्रता श्रेष्ठ दूगु “मेरो एउटा साथी छ” नांयागु फिल्मय् साइड रोल म्हितूगु दुसा सन् २००० या मिस नेपाल उषा खड्गी नं कलिउडय् इन्ट्रि जुइंगु चर्चा जूगु खः। चर्चा कथं उषा मय्जु धाःसा हिरोइन्, साइड हिरोइन् वा छुं नं कथंया आर्टिस्ट जुया मखसे छम्ह फिल्म प्रोडुसर जुया कलिउड दुहाँ वयेत्यंगु खः। खय्तला उषा खड्गीं छुं छुं म्युजिक भिडियो व विज्ञापन फिल्मय् म्हितूगु दु तर फिल्मय् धाःसा कलाकारया रुपय् मखसे प्रोडुसरया रुपय् पलाः न्ह्याकेत्यंगु खः।
पूर्व मिस नेपाल उषा खड्गीं दयेकेत्यंगु फिल्मया नां “आउँदै जाँदै” धका तःगु खः। थ्व फिल्मया डाईरेक्टर मेपिं सुं मखसे उषाया हे जहान जि.पि. तिमल्सिना जुइ धका नं धाःगु खः। तर फिल्मया खँ पिहाँ वया छुं लिपा हे इपिं निम्हतिपु दथुइ बायभु वल। व धुंकाः थ्व फिल्मया पलाः दित। थुकथं स्वयेबलय् नेपाःया फिल्म ख्यलय् मिस नेपालपिन्सं न्ह्याकूगु छुं नं कथंया पलाः उलि ताःलागु खनेमदुनि धकाः धायेमा।
