योमां जितः बियाःछ्वे म्वाल… तेजवति जोशीया सलय् न्हूगु नेपालभाषाया भिडियो थौं बेन्टो लाउन्ज एण्ड बारय् प्रिमियर जुल । वरिष्ठ कलाकार रत्न बेहोसिया सभापतित्वय् मू पाहाँ कथं भृगुराम श्रेष्ठ झायादीगु खः ।
ज्याझ्वयल् थुगु म्यूजिक भिडियोया निर्माता योगेन्द्र राजकर्णिकारं लसकुस यानादीगु खः । म्येया संगीतकार जुगल डंगोल व म्येच्वमि हरिराम महर्जन थेच्व खःसा थुगु म्ये प्रदीप खड्गीं निर्देशन याःगु खः ।
म्येया बिषयलय् न्ववाःसें सभापति रत्न बेहोसिं प्रिमियर जूगु नेपालभाषाया म्ये थी थी म्ये लिसे स्वाकुसें न्हापा जगमोहन वाःमिं झिंन्यान्हु मानि व्याहा यायेगु धकाः हाले धुंकाः थःम्हं नं काय्मचा ल्याम्ह जूगु स्वयेबलय् व्याहा याये माः थें च्वं हालागु व आः वया छम्ह म्हाय् मचां यो मां जितः बिया छ्वये म्वाल धैगु म्यें व्याहाया बिषयलय् थी थी पक्षया खँ झीगु समाजय् वयाच्वंगु ह्युपाःया बिषयलय् खँ तयादील ।
मू पाहां भृगुराम श्रेष्ठं थुगु म्येया बिषय बस्तु बारे खँ कुलादिल । मिसा मचां नं थः योम्ह दु धकाः थः मांयात कनाच्वंगु खँ न्हूगु मखु तर आः म्येया कथं पिदंगु खँ झीगु समाजय् सिइदयक वयाच्वंगु ह्युपाः यात कुलादिल ।
निर्देशक प्रदीप खड्गीं थुगु म्येया निर्देशनय् वयाच्वंगु ह्युपाःया बिषयलय् खँ ल्हासें थः मांयात छम्ह म्ह्यानं थः त गज्योम्ह मिजं यः धैगु बिषलय् कनाच्वंगु तर मांयात तँ पिहाँमवयेक न्ह्यब्वयेमाःगु खँ हाथ्याःया जूगु खँ कुलादिल।
म्येच्वमि हरिराम महर्जन थेच्वं थःम्हं छुं नं म्ये च्वयाः मेपिंसं गज्योगु कथं थुइकल धैगु प्रतिकृया कायेगु थःगु बानी दुगु धयादिल । अथे हे संगीतकार जुगल डंगोलं संगीत धैगु तप्यंक नुगलय् थि माः धाःसें थःम्ह अज्योगु हे कुतःयानागु खँ न्ह्यब्वयादिल।
म्येहालामि तेजवतिं सुभाय् देछाःसें जूगल डंगोलया संगीतय् अले दर्शनवीर शाक्यया च्वसाय् मथुला छिं म्ये नं हालाः न्यंकादिल।
