स्थानीय चुनावया मौसम थौंकन्हे सामाजिक संजाललिसें देन्यंक हे लकस क्वानाच्वंगु दु । विशेषत स्वनिगःया राजनैतिक समिकरण व थी थी व्यक्तिया उम्मेदवारीं स्थानीय चुनावया माहौल ग्वानाच्वंगु दु । थ्व हे झ्वलय् थी थी राजनैतिक व्यक्तित्व लिसें गैर राजनैतिक ब्यक्तिपिंसं नं राजनैतिक ख्यलय् पलाः न्ह्याकुगु दु सा राजनैतिक ब्यक्तित्व जुयाः नं नेपालभाषाया मनोरंजन ख्यलय् न्हापांनिसें योग्दान बियाच्वंपिं ब्यक्तित्वपिंसं नं थःगु दावेदारी पेश याःगु दु । बिशेषत नेपालभाषाया कलाकारीता क्षत्र लिसें मनोरंजन क्षत्रया व्यक्तित्व गन गनं थःगु उम्मेदवारी बियाच्वन धैगु खँय् छक्व कुले बह नं जू ।
नेपालभाषाया मनोरंजन क्षत्रयात कःधायेगु वा नेवाःत बहुआयामिक जूगु कारणं नं उम्मेदवारी दर्ता छगू कथं रोमांचक जुयाच्वंगु नं दु ।
केशव स्थापित (मेयर उम्मेदवार)
येँया मेयरया निंतिं केशव स्थापित एमाले पाखें थःगु उम्मेदवारी बियादीगु दु । थ्व सिबें न्हापा नं येँया मेयर जुयादी धुंकुम्ह थुगुसि हाकनं थःगु दावेदारी पेश याःगु दु । केशव स्थापित नेपालभाषा मनोरंजन ख्यःलिसे स्वापू दुम्ह ब्यक्तित्व खः । वय्क छम्ह रंगमंचया कलाकार कथं यक्वस्यां मसिइफु । चर्या निृत्य कथं कालभैरव नृत्य वयेकलं न्ह्यब्वयादी धुंकुगु दुसा वय्कलं थेएटर भिलेजया न्ह्यब्वयाय् चारुमति नाटकय् जुजु अशोकया भुमिका नं म्हिते धुंकुगु दु ।
मदनदास श्रेष्ठ (मेयर उम्मेदवार)
थुगुसिया चुनावया निंतिं मदनदास श्रेष्ठं राष्ट्रिय प्रजातन्त्र पार्टिपाखें येँ मेयरया निंतिं उम्मेदवारी ब्यूगु दु । वय्क छम्ह तसकं हे नांजाःम्ह कलाकार खः । नेपाल टेलिभिजनया टिभि सिरियलय् तसकं लोकंह्वाःम्ह कलाकार खःसां नेपालभाषाया प्याखँ ‘माया’ व ‘मू मदुगु जिन्दगी’ म्हितादी धुंकुगु दु ।
सुनिता डंगोल (उप मेयर उम्मेदवार)
मिस नेवाः २०११या बिजेता सुनिता डंगोल खः । मनोरंजन क्षत्रय् प्रत्यक्ष रुपं स्क्रीनय् मदुसां थी थी मनोरंजनात्मक ज्याझ्वःया मू आकर्षक कथं ज्याझ्वः संचालननं यानादी । सुनिता डंगोल धकाः थौं म्हमस्युपिं मनूत शायद तसकं हे म्हो हे जुइ । वलिसें रंजनालिपिया प्रचारय् सुनिता डंगोलया प्रत्यक्ष संलग्नाता नं दु । सुनिता एमाले पाखें उपमेयरय् उम्मेदवारी बियाच्वंगु दु ।
रामेश्वर श्रेष्ठ (उप मेयर उम्मेदवार)
उप मेयरय् एस पाखें येँया उपमेयरय् उम्मेदवारी बियादीम्ह रामेश्वर श्रेष्ठ खः । पार्टिगत रुपं नेकपा एकिकृत समाजवादीं दनाच्वनादीम्ह वय्कलं अतिकं लोकं ह्वाःगु नेपालभाषाया संकिपा सेरिव बन्जालय् सेरिव बन्जाः जुयाः म्हितादीगु खः ।
निर्मलरत्न शाक्य (वडाअध्यक्ष उम्मेदवार)
नेपालभाषाया संगीत ख्यलय् अतिकं हे चर्चित एवं अतिकं हे नांजाम्ह संगीतकःमि खः भाजु निर्मल रत्न तुलाधर । वय्क छम्ह म्ये च्वमि एवं संगीतकार जक मखुसे यल १६ वडाया अध्यक्ष जुयाः छगू कार्यकाल नं पूवंके धुंकुम्ह वडा अध्यक्ष खः । पार्टिगत रुपं वय्क नेपाली कांग्रेसय् आवद्ध जुयाःदी । ्नेपालभाषाया मनोरंजन ख्यःयात ल्व वने थें ज्व मदूगु म्येचाः व थौं कन्हे हरेक ज्याझ्वलय् प्याखँ हुलेत मजिइ मगाःगु म्ये लिक्क वयाः जितः धाल वं या च्वमि नं वयेकः हे खः । पेजथ्री पिपल्स च्वइस अवार्ड ११३० व ११३३य् उत्कृष्ट म्येच्वमिया अवार्ड त्याके धुंकुगु दुसा पेजथ्री पिपल्सच्वइ अवार्ड ११४२य् पेजथ्री ज्यूरी अवार्ड पाखें सम्मानीत नं जुयादीगु खः ।
पूर्णकाजी ज्यापू (वडाअध्यक्ष उम्मेदवार)
येँ १५ वडाया अध्यक्षया निंतिं नेपालभाषाया छम्ह इन्टटेनर भाजु पूर्णकाजी ज्यापूं थःगु उम्मेदवारी ब्यूगु दु । नेपालभाषाया मनोरंजन ख्यलय् भजन, म्यूजिक भिडियो, अडियो, लाइभ प्रोगाम लिसें संकिपा निर्माण तकं यानां हिसिमति प्याखँ दयेके धुंकुगु दु सा निर्माणाधीन प्याखँ ‘तुयु’ नं ज्याखँ न्ह्यानाच्वंगु दु । थुगुसीया पेजथ्री पिपल्स च्वइस अवार्डया संकिपा विधा पाखे उत्कृष्ट मिजं कलाकार सह भुमिकाय्या अवार्ड त्याकादीगु खःसा पेजथ्री अवार्ड ११३७य् उत्कृष्ट म्येचाः कथं ऋतु लसं पिज्वःगु सः पाखें उत्कृष्ट म्येचाया अवार्ड नं त्याकादीगु खः ।
न्हुच्छेकाजी महर्जन (वडाअध्यक्ष उम्मेदवार)
नेपालभाषाया संगीत ख्यलय् बिस्कं हे रुची दुम्ह न्हूूच्छेकाजी महर्जन थुगुसी नं येँ १८ वडा पाखें वडाअध्यक्षया निंतिं उम्मेदवारी ब्यूगु दु । न्हूच्छेकाजी महर्जनया थी थी ल्वकं ह्वाःगु म्ये कथं भिंतुना दु भिंतुना (संगीता शाक्य व रीता महर्जन)या सलय् दुसा छि नेवाः झी नेवाः .. म्ये पेजथ्री पिपल्सच्वइस अवार्डय् उत्कृष्ट पुचः म्येया नामांकनय् दुथ्याःगु खः ।
चन्द्रमान मुनिकार (वडा अध्यक्ष उम्मेदवार)
चर्या नृत्यगुरु चन्द्रमान मुनिकार येँ १९ वडा पाखें थःगु उम्मेदवारी दर्तायाःगु दु। नेपाःया सांस्कृतिक एवं चर्या नृत्ययात गतिशीलता बिइगु निंतिं चन्द्रमान मुनिकारया नं योगदान आपालं हे दु । वयकया सकृयताय् अझं नं रंगमंचय् थी थी नाटक प्रदर्शन जुयाच्वंगु दु । वयकया निर्देशनय् दकलय् लिपांगु नाटक पचली भैरवया सफल शो जूगु खः ।
थुकथं हे वडा सदस्यय् रविनशन कंसाकारं एमाले पाखें येँ २५ वडाय् खुल्ला सदस्य पाखें थःगु उम्मेदवारी ब्युगु दु । रविनशन कंसाकारया जमाना मभिं स्व बोलया ज्वः म्ये तसकं हे लोकंह्वाःगु म्ये खःसा पेजथ्री बाःछिपौया ग्वसालय् जूगु बुदिंया म्येकासा उत्कृष्ट ५य् दुथ्याम्ह म्येहालामि खः ।
येँ २७ वडाय् माओवादीपाखें सदस्यय् उम्मेदवारी ब्यूम्ह मेम्ह कलाकार खः बिजेन्द्र बज्राचार्य । नेपालभाषाया म्यूजिक भिडियो ख्यलय् कान्हिं मैंचा व लुमंका च्वयाच्वंसां बोलया म्ये लोकंह्वाःगु म्ये त खः । थुपिं नितां म्युजिक भिडियोलय् वय्कया अभिनय स्वये दु ।
येँ २० वडाय् स्वंगु दलया गठबन्धनपाखें वडा सदस्यय् देवकुमार महर्जनं उम्मेदवार कथं दु । वय्क छम्ह फाइट डाइरेक्टर खःसा थीथी नेपालभाषाया संकिपा एवं टेलिसिरियलय् नं म्हितादी धुंकुगु दु ।
यल ११ वडाय् वडा सदस्य कथं माओवादी केन्द्रपाखें विक्रम खड्गी उम्मेदवार कथं दु । विक्रम खड्गी तसकं हे सकृयरुपं नेपालभाषाया म्युजिकभिडियो लिसें फोटोग्राफिइ संलग्न जुयाच्वंगु दु लिसें संसार्स अनलाइन टिभिइनं संलग्न जुयाच्वंगु दु ।
यलया हे २७ वडाय् रुपेश डंगोल वडा सदस्य कथं उम्मेदवारी बियाच्वंगु दु । रुपेष डंगोलया तिमिला थें च्वंगु ख्वाः व योवनया गाच्व ब्वयेका बोलया म्ये सामाजिक संजालय् तसकं हे लोकंह्वाःगु म्ये खः।
