थौं कन्हे एकदमय् बांलाना वयाच्वंगु । छाय्धाःसां जि थुगु नेपालभाषाया मनोरंजन ख्यलय् दुहांवयागु १५/१७ बर्ष दये धुंकल । थ्व दौरानय् जिं गुगु रूपं थ्व विकास जूगु खना, अझ धाये जिं ला छुं ई यु एस नं च्वं वना तर जि हाकनं लिहां वया अले भचा भचा नं ज्या यानागु दु । थुगु हे दौरानया ह्यूपाः खना जितः एकदम हे लय्ताः वः । न्हापा झी टेक्निकलि नं ज्या याइगु भचा कमजोर तर आ थौं कन्हे धाःसा टेक्निकलि सम्झौता यानाच्वंगु खने मदु । क्यामरा, सम्पादन लिसें खर्च यायेगु नं बांलाक्क यानाच्वंगु दु । उकथं हे न्हापा प्याखँ म्हितिपिं कलाकार नं तसकं हे म्हो । गथेकि छुं नं प्याखँया हिरो सु वा हिरोनी सु धकाः न्यन धाःसा पतिंचाय् हे ल्याखाय् ज्यु । तर थौं कन्हे धाःसा कलाकारया ल्याः आपा दु । न्हूगु पुस्तां नेपालभाषाया मनोरंजन ख्यःयात आकर्षित जुयावयाच्वंगु दु । थथे वःगु धैगु हे झीसं यानावयाच्वंगु ज्याःया प्रभाव खनां मेमेपिं दुहांवःगु धकाः नाले माः ।
अथे हे पारिश्रमिकया खँ ल्हाये । न्हापां जिमिसं ज्या यायेगु इलय् पारिश्रमिक धैगु हे मदु । जिमिसं थःगु नांया निंतिं अले थःगु भाय्या निंतिं यानाच्वनागु जुल। तर वयाः पारिश्रमिकया खँ जु । थौंया परिवेशय् छिं म्युजिक भिडियो म्हितेत गुलि ध्येबा कयादी धकाः न्यनिं । थथे न्यंगु धैगु हे छगू चरण पार जुयाः वःगु स्थीति खः । थथे न्यंगु नं सकारात्मक हे खः । तर जिमिसं नं यक्व पारिश्रमिक धायेमिले मजू छाय् धाःसां थ्व नेपालभाषा मनोरंजन ख्यः धैगु हे चिंधं । मनोरंजनया ख्यलय् नेपाली ख्यःला गुलि चिधं धाःसा उकिया न्ह्योने नेपालभाषाया ख्यःला झन हे चिधं । उकिं कलाकारपिंसं नं यक्व डिमाण्ड यायेगु पाय्छि मखु तर कलाकारया पारिश्रमिकता बिइ फूगु अवस्था वयाच्वंगु दु । नेपालभासाया प्याखँ, म्युजिक भिडियो दयेकेत नं विदेशय् च्वंपिंसं नं मं क्यनाच्वंगु दु । थज्योगु ह्युपाः वयाच्वंगु नेपालभाषाया मनोरंजन ख्यःया निंतिं बांलागु व सकारात्मक हे खँ खः ।
छुं ई न्ह्यः निशा देशारया म्यूजिक भिडियो खना । नेपालभाषा ख्यःया पिं सिबें पिनेयापिं टेक्निसियन, प्राविधिकपिं च्वना दयेकुगु तसकं हे स्तरीय जु । अज्योगु खँ वइबलय् झी न्ह्याबलें छगू हे जक बाउण्डरी च्वनेमाः धैगु मदुधका धयाच्वनिं । जितः नं गुलिस्यां नेपालभासा ख्यः त्वता नेपाली ख्यलय् वन धकाः कुँखिनाच्वनी । झीसं न्ह्यागु ज्याः याःसां विश्वन्यंक वनेमाः धैगु तातुनाच्वने माः । गथे बलिउडयात थौंकन्हे साउथ इण्डियाया प्याखनं प्रभावित यानाच्वंगु दु । भाय् हे मथुसां सबटाइटल सिबें डब याना हयाच्वंगु दु उकिं झी नं अज्योगु हे आज्जु ज्वना वने माः थें तायेका च्वना ।
थौं कन्हे सिरियल नं वयाच्वंगु दु, प्याखँ, म्युजिक भिडियो वयाच्वंगु दु । छुं नं ज्या शुरुवात नं याये अःपु वा सिधयेके नं अःपु तर उकियात निरन्तरता बिइगु धैगु तसकं हे थाकुगु खँ खः । थथे निरन्तररूपं ज्या यानाच्वंपिंत नं यक्व यक्व सुभाय् बिइ मास्तिवः। निरन्तररूपं निर्माण जुइगु बांलागु हे खँ खःसा निर्माण जुयाच्वंगु थज्योगु प्याखँ स्वइपिं अडियन्सपिं नं चकना वनाच्वंगु खना । छाय्धाःसां न्हापा सिडि न्याना स्वयेमाःगु अवस्थाय् आः वया युट्युब व सामाजिक संजालं याना झीगु पहुँच झन ब्यापक नं जुयाःवनाच्वंगु दु । झीसं क्वाय्लिटि कन्टेन्ट बिइफत धाःसा थौं बिश्वया कुनाकाप्चाय् च्वना हे मनूत ल्हातय् ल्हायतय् हे मोबाइलं स्वयाः मनोरंजन कायेफूगु स्थीति दु । थ्व नं छगू अवसर हे खः छाय्की न्हापा थें झी प्याखँ स्वये धकाः फय्तुनां हे स्वये माः धैगु मदयेधुंकल ।
थ्व क्षत्रयात प्रोत्साहित यायेगु निंतिं मज्जिमगाःगु अवार्डया स्थापना यानादीगुलिं दकलय् न्हापां ला पेजथ्री पत्रिकायात सुभाय् बिइ माः । छाय्धाःसां ज्या यायेधुंकाः सकारात्मक खँ नकारात्मक खँ जुयाच्वनिं तर उगु हे ज्यायात मुल्यांकन यानाबिइवं कलाकारपिं तसकं हे उत्प्रेरित जुइ । अले मुल्यांकन मजुसां नं थ्व पालय् मजुसा जिं मेगु पालय् अझं बांलाक्क ज्या याये धैगु छगू दृढता कलाकारपिंके ब्वलनाच्वनेगु याइ । कलाकारपिंत प्रोत्साहन बिइगु निंतिं पेजथ्रीनं शुरुवात यायेधुंकाः स्वतन्त्रं संसार महर्जनं नं न्ह्याकुगु दु । तर जितः ताः की थज्योगु ज्याझ्वः जुइबलय् बांलाक्क जजमेन्ट धाःसा जुइमाः ।
थथे खःसां नं छतानिता खँय् झीसं सुधार याना वनेमाःगु अवस्था नं दु । नेपालभाषाया मनोरंजन ख्यः भचा चिधं हे जु । थुकी बजेट नं चिधं । तर नं ई कथं झी भचा सुधार याना वने माःगु दु । थौंया इलय् सुटिंगया दौरान नं ब्रेक जुइ तर कलाकारयात फय्तुइत मेचया व्यवस्था छगू मजू । थ्व न्हापां निसें आःतक्क व हे स्थीति तिनिं । गन थाय् दु अन फय्तुइमाः । थथे फय्तुइबलय् कलाकारया वसः स्यनेफु छाय्की थ्व हे वसः फिना बाकी शुटिंग क्वचायेके मानी । अले थौंकन्हे सुटिंग यायेत प्रोडक्शन युनिट नं दयेधुंकुगु अवस्थाय् मेचया व्यवस्था जुइमाःथें च्वं उलि जक मखुसे सुटिंगया इलय् कलाकारया सामान गन सुरक्षित याना तयेगु धैगु खँ नं महत्वपूर्ण थें ताः । कलाकारया निंतिं छम्ह अलग्ग हे स्वइम्ह मनूया आवश्यकता नेपालभाषा ख्यलय् नं माला च्वंगु दु । थथे जुइबलय् छम्ह आर्टिस्टया मन पूवंक थःगु ज्याय् समर्पित जुइ मेमेथाय् ध्यान वनाच्वनिं मखु ।
नेपालभाषाया मनाेरंजन ख्यःया यथास्थीति छिं गथे खंका दिया ? न्ह्यसःया लिसः ब्युसें
आशिष्मा नकःमि (कलाकार)
