थौंकन्हे नेपालभाषाया मनोरञ्जनया स्थितिया बारे खं ल्हायेगु खसा न्हापा न्हापा १५/२० वर्ष सिबें न्ह्यः व आ या इलय् यक्व पाःगु खनेदु । न्हापा मनोरञ्जनया साधन धैगु हे हलय् वना प्याखं स्वयेगु, रेडियो नेपालंय् थ्वयेका हइगु म्ये न्येनेगु अले राष्ट्रिय नाचघर, सभागृह, प्रज्ञाभवनया दबुलिइ क्यनिगु नाटक, ख्यालः स्व वनेगु खः वा गन नं साँस्कृतिक ज्याझ्वः जुइगु सिल धाःसा अन वना स्वः वनेगु अले मनोरञ्जन व आनन्द कायेगु खः। तर थौंकन्हे मनोरञ्जन साधन थः थःगु ल्हातय् ल्हातय् दु, मनोरञ्जनया साधनत यक्वं दुगु कारणं याना यक्व हे ह्यूपाः वःगु खनेदत।अथे धयागु सामाजिक संञ्जाल । फेसबुक, यू ट्यूब तप्यंक धायेगु खःसा मोबाइल । झीगु नेपालभाषाया प्याखं, संगीत मनोरञ्जन यायेत वा कायेत थौं कन्हे तापाक गनं वना च्वने हे म्वाये धुंकल । आ थुकिं छखे सकारात्मक दृष्टिकोणं स्वये फइसा मेखे नरारात्मक दृष्टिकोणं स्वयेमाला च्वंगु दु । सकारात्मक धायेबलय् सामाजिक सञ्जाल धयागु थौं कन्हे फुकसित मदेकमगाःगु जुइ धुंकल, फुकस्या सुथं निसें बहनि अझ चान्हय् तक हे छ्यलाच्वनिगु । थ्व कारणं याना सु नं कलाकारपिंसं थःगु प्रस्तुति वा प्रतिभा याकन हे याउँक हे हलिं न्यंक प्रचार प्रसार याना म्हो इलय् हे थः चर्चित जुइगु माध्यम जुयाच्वंगु दुसा मेखेर नकारात्मक धयागु मनोरञ्जनया नामय् अवैध, अश्लिल व अपराधिक ज्या यायेत हःपाः बिइ कथंया भिडियो तया हइगु अले व स्वया मनोरञ्जन कयाच्वनिगु जुयाच्वंगु दु । तर न्हापा न्हापाया मनोरञ्जनय् गन नं नकारात्मक पक्ष धयागु हे दइ मखु, न्हापा न्हापा गन नं चाहे हलय् जुइमा चाहे त्वाः त्वालय् न्ह्याथाय् हे छुं मनोरञ्जनया ज्याझ्वः जुल धाःसा सकलें मुनेगु या । थ्व धयागु कलाकारपिंत हपाः व प्रत्यक्ष रूप सफल जुइगु खः । तर थौंकन्हे थें दे न्यंक अले हलिं न्यंक प्रचार चाहिं जुइमखु, छगु लक्षितवर्गतय्त जक आज्जु तयाः प्रचार प्रसार याइ, अले लां लां तक चर्चा न जुयाच्वनि, तर थौंकन्हे थें लाखौं मनूतयेगु दथुइ व ईया कलाकारपिंस थःगु प्रतिभा ब्वये मफइगु व ई या खँ जुल। झीसं व ईयात इलं घ्वाना यंकुगू ह्यूपाः धायेमालि । मनोरञ्जनया स्थिति न्हापा नं बांला आ नं बां हे ला जु । सुभाय् !
नेपालभाषाया मनाेरंजन ख्यःया यथास्थीति छिं गथे खंका दिया ? न्ह्यसःया लिसः ब्युसें निर्देशक सुरेन्द्र तुलाधर
