इलाेहं प्रकाशन प्रा लियात येँ महानगरपालिकां सुशासन पत्रकारीताया सिरपाः लःल्हात । इलाेहं प्रकाशन प्रा लि पाखें प्रकाशनया मू व्यवस्थापक दर्शनवीर शाक्यं लः ल्हानाकाःगु खः । येँ महानगरपालिकाया २७ क्वःगु महानगर दिवसया लसताय् मंसिर २९ गते बुधवाः वसन्तपरय् तःजिगु ज्याझ्वः याःगु खः । ज्याझ्वलय् थीथी सञ्चारमाध्ययमया १० म्ह पत्रकारपिन्त म्हतिं ५० द्वः तका रकम लिसें सुशासन पत्रकारिता पुरस्कार लःल्हाःगु खः । संस्थापक रूपं इलाेहं प्रकाशन प्रालि लिसें नीलः साय्मी (नागरिक), सुनिल महर्जन (नेपाल समाचार पत्र), रञ्जित तामाङ (स्थानीय खबर), शिवहरि घिमिरे (नयाँ पत्रिका), सोभित थपलिया (क्लिकमाण्डु), संजिता आचार्य (थाहा खबर), अजय खड्गी (महानगर डटकम), अनिस अविरल मिजार (न्यूज एजेन्सी) व विराजकाजी राजोपाध्याय् (झीगु सः डटकम) यात लःल्हाःगु खः ।
ज्याझ्वःलय् २२० म्ह परम्परागत बाजा गुरुपिनत म्हतिं म्हतिं ३० द्धः लिसें सम्मान पौ लःल्हानानं हंगु खः । व्यवसाय, बहाल व सम्पत्ति करपाखे नियमित व आपालं कर पुउपिं करदातापिन्त करदाता सम्मान नं याःगु खः । स्थानीय सेवा पदक, महानगर गौरव पदक, साधना प्रधान अग्रणी महिला सम्मान, जनकमान श्रेष्ठ सुशासन पुरस्कार वितरण, महानगर सेवा पुरस्कार, महानगर सेवा गौरव पुरस्कारया नापं सम्मान व पुरस्कार देछाःगु खः ।
ज्याझ्वलय् संघीय मामिला तथा सामान्य प्रशासन मन्त्री राजेन्द्रप्रसाद श्रेष्ठ, बागमती प्रदेशया सभामुख सानुकुमार श्रेष्ठ, महानगरया प्रमुख विद्यासुन्दर शाक्यं मंकाः रुपं चित्रकार हरिप्रसाद शर्माया सफू स्वनिगःया संस्कृति, सम्पदा व परम्परा झल्के जुइगु चित्र मुना नं सार्वजनिक यानादीगु खः ।
ज्याझ्वलय् संघीय मामिला तथा सामान्य प्रशासन मन्त्री राजेन्द्रप्रसाद श्रेष्ठ, बागमती प्रदेशया सभामुख श्रेष्ठ, जिल्ला समन्वय समितिया प्रमुख शिवसुन्दर राजवैद्य, ज्याझ्वलय् महानगरया प्रमुख विद्या सुन्दर शाक्य, नेपाल सरकारया मुख्य सचिव शंकरदास वैरागी, संघीय मामिला तथा सामान्य प्रशासन मन्त्रालयया सचिव सुरेश अधिकारी, महानगरया प्रमुख प्रशासकीय अधिकृत राजेश्वर ज्ञवालीपिन्सं थीथी विषययात कःघाना थःथःगु नुगः खँ तयादीगु खः ।
थुगु दिवसया अवसरय् थीथी ४० गू वुथपाखें सेवाग्राही सर्वेक्षण, ज्येष्ठ नागरिकयात निमोनियाया निःशुल्क खोप, मधुमेह, रक्तचाप व कोविड परीक्षणसहितया वृहत स्वास्थ्य शिविर, विशेष सरसफाई, वाकथन, मैत्री फुटबल खेल, सांस्कृतिक कार्यक्रम, ‘सांस्कृतिक सहर, काठमाडौं महानगर’ विषयया विद्यालय स्तरीय वक्तृत्वकला व निबन्ध लेखन धेंधेंबल्ला कासा लगायत ज्याझ्वःत न्ह्याकेगु याःगु खः ।
अथेंहे रानी पोखरी पुननिर्माण सहजीकरणया लागि गठित स्थानीय उपभोक्ता समिति सदस्यपिन्त सम्मान यागु उगु ज्याझ्वलय् थीथी पीगु बुथपाखें सेवाग्राही सर्वेक्षण, ज्येष्ठ नागरिक निमोनिया निःशुल्क खोप, मधुमेह, रक्तचाप व कोविड परीक्षणसहितया वृहत स्वास्थ्य शिविर, विशेष सरसफाई, वाकथन, मैत्री फुटबल खेल, सांस्कृतिक कार्यक्रम, ‘सांस्कृतिक सहर, काठमाडौं महानगर विषययात कया विद्यालय स्तरीय वक्तृत्वकला व निबन्ध लेखन कासाया नं ग्वसाः ग्वगु खः । महानगर दिवसया औपचारिक ज्याझ्वः क्वचायका सांस्कृतिक ज्याझ्वः नं न्ह्याकेगु याःगु खः ।
