गीत संगीत भावनात्मक अभिव्यक्ति खः । थुकीयात सुनानं मखु धाये फइमखु। थज्योगु हे भावनात्मक अभिव्यक्तिया छगू दसू थौं स्वयेखंगु दु नेवाः टिभी एचडीया ज्याकुथिइ ।
थनिं ५२ दँ न्ह्यः मतिना जुयाः श्रृजना जूगु छपू म्ये थौं जिं म्हगसय् छन्त खनां..या म्युजिक भिडियोया प्रिमियर जुल । थुगु म्ये हालादिम्ह, च्वयादिम्ह व लय तयादीम्ह व्यक्तित्व खः पुष्प नारायण मानन्धर । थनिं ५२दँ न्ह्यः वय्कया मतिना राधिका सिंह डंगोललिसे जुल । तर थःगु जात मिले मजूगुलिं तत्कालीन समाजं वय्कपिंत नापलाके मबिल । तत्कालीन समाजं निम्ह ययेकाच्वंपिंन्त फायातल । थ्व हे इलय् पुष्प नारायण मानन्धरं थःगु भाव व्यक्त याये कथं थुगु म्ये श्रृजना यानादीगु खः ।
थुगु भिजुअलय् पुष्प नारायण मानन्धरलिसें वय्कया जहान राधिका मानन्धरं नं म्हितादीगु दु । व्याहा जूगु ५०दँ क्यंगु लसताय् वय्कलं थुगु म्येयात भिजुअल दयेकादीगु खःसा थुगु म्येया निर्देशन सुरेन्द्र मानन्धरं यानादीगु दु । न्हापां थःम्हं भोगेयानागु ई लिसें मतिनाय् तापाक्कं खँल्हाबल्हा याये कथं न्हाय्कनं निभाः ख्वालय् क्यंका इशारा यागु यथार्थ क्षण थुकी दु । लिसें नापलाये मखनिबलय् तस्वीर स्वयाः मन हयेकेमाःगु भावुक यर्थाथ भोगाइ नं दुकी दुथ्याकातःगु दु । गीत संगीतं मनूयात न्ह्यागु परिवेशय् नं अभिव्यक्त याइ धैगु खँ थुगु म्येय् खने दु । थुगु म्येय् किरण जोशी व सुजना बज्राचार्य, विमला मानन्धर व ध्रुव कपालिंनं अभिनय यानादीगु दु । म्येया छायांकन आयुष महर्जनं याःगु खःसा सम्पादन इन्द्र मानन्धरं याःगु दु ।
थुगु म्ये भुपालमान सिंहं संगीत संयोजन यागु दुसा म्ये अन्नपूर्ण रेकर्डिङ्ग स्टुडियोलय् बिजय मास्कीं याःगु खः । थुगु म्ये येँ १३ वडाया नायो ध्रुवनारायण मानन्धर, वरिष्ठ सिने पत्रकार विजयरत्न असंवरे व नेवाः टिभी एचडीया चेयरम्यान नविन जोशीं मंकाः कथं यानादीगु खः । छगू औपचारी ज्याझ्वः याःसें सुरेन्द्र मानन्धरं ज्याझ्वः न्ह्याकादीगु खः ।
