येँ महानगरपालिका दुनेया निजी व सरकारी स्कुलय् स्थानीय बिषय अन्तर्गत नेपालभाषाया माध्यमं पाठ्यक्रम लागू यायेगु खँय् एमाले, कांग्रेस, माओवादी, संघिय समाजवादी लगायत सकल राजनैतिक पार्टिया समर्थन दु धकाः येँ महानगरपालिकाया मेयर विद्यासुन्दर शाक्यं नेपालभासाया स्यनामिपिंसं ग्वसाःग्वःगु च्यापान ज्याझ्वलय् न्ववानादिल ।
नेपालसंवत ११४२ न्हूदँया लसताय् येँया संखधर पार्कय् नेपालभासाया स्येनामिपिंसं ग्वसाः ग्वःगु भिंतुना कालबिल ज्याझ्वलय् मेयर विद्यासुन्दर शाक्य मूपाहाँ कथं झायादीगु खः ।
ज्याझ्वःस मिसा स्यनामिपिनिगु प्रतिनिधित्व याःसें सुनीता राजभण्डारी व मिजं स्यनामिपिनिगु प्रतिनिधित्व यासें अगिब बनेपालीं शिक्षणया अनुभव कनादीगु खः । कामपाका वडा अध्यक्ष व सदस्य लिसें निजी व सरकारी स्कुलया प्रधानाध्यापकपिनिगु उपस्थितिइ दुगु ज्याझ्वःस पाहां कथं कामपाया कार्यकारी अधिकृत राजेश्वर ज्ञवाली व कामपा शिक्षा बिभागया प्रमुख रामप्रसाद सुबेदीं नं भिंतुना देछानादीगु खः ।
ज्याझ्वःलय् मूपाहाँ विद्यासुन्दर शाक्यं नेपाल संवतया प्रबर्तक शंखधर साख्वा: व नेपाल संवत् अभियन्ता पद्मरत्न तुलाधरया शालिकय् माल्यार्पन नं याःगु खः । ज्याझ्वलय् सरकारी स्कुलय् ब्वंकादीपिं शिक्षक लिसें नीजि स्कुलय् ब्वंकादीपिं शिक्षकपिनिगु नं उपस्थीति दुगु खः ।
