म्येहालामि प्रबेश मान शाक्यया सःलय् लाेकम्ये सिरसाया हेकु थःगु अफिसियल युट्युबय् च्यानलय् रीलिज याःगु दु । युट्युबय् तसकं बय्बय् जुइधुंकुगु थुगु म्येया मेगु छगू भर्सन सिरसाया हेकू पिदंगु दु । तर थुगु म्ये धाःसा मेमेगु सिरसाया हेकू म्ये सिबें पानाच्वंगु दु ।
सिरसाया हेकू म्ये म्यन्यंपिं सुं हे नेवाः मदु धाःसा पत्या याये थाकुइ । तसकं हे लाेकंह्वाःगु थुगु लाेकम्ये खःसा प्रबेश मान शाक्यं हालादीगु थुगु म्ये धाःसा भचा पाः । कारण खः थुगु म्येया मिजं भर्सनं हालातःगु दु ।
नेवाःम्येया थीथी विशेषता कथं मिसाम्ये, मचाम्ये, ज्वम्ये इत्यादी दु। तर सिरसाया हेकु म्ये सामाजिक संजालय् अतिकं हे लाेकंह्वाःगु लिं थुगु म्ये मिजंतय्सं नं हालातःगु दु । तर थुगु म्येया विशेषता हे मिसातय्गु लैंगिक चरित्र ब्वलनाच्वंगुलिं म्येहालामि प्रबेश मान शाक्यं धाःसा थ्व मिले मजूगु तायेका मिजंम्हेस्यां हालेमाःसा शब्द हे मिलेमजू धाःगु तायेका संकलक रामकृष्ण दुवाल लिसें जानाः मिजं भर्सन तयार याःगु खः ।
म्येया शब्द हे परिमार्जित याना दयेकातःगुलिं आ थुगु म्ये न्ह्याम्हं मिजनं हाले जिइ धकाः प्रबेश मान शाक्यं लसता प्वंकुगु दु ।
सिरसाया हेकु जिमि दाइचां ब्यूगु … धकाः मिजंम्हेस्यां हालेबलय् थाैंया इलय् अर्थया अनर्थ जुयाच्वंगुलि जिं थ्व मिजंया दृष्टिकाेणं अथवा मेल भर्सन हालागु खः । वय्कलं धयादील ।
थुगु म्येया रचना कथं रामकृष्ण दुवालया नां दुसा, संगीत संयाेजन भुपेन्द्र बज्राचार्यं यानादीगु दु । थुगु म्ये अडियाे नेपाल स्टुडियाेलय् बुद्ध साय्मिं रेर्कड यानादीगु खः ।
