नेपालभासाया सांगितिक ख्यलय् नव प्रतिभा गायिका मय्जु कल्पना श्रेष्ठया न्हूगु म्ये छंगु लँ स्वैच्वंगु मिखाया छायाँकन क्वचागु दु । ह्याउँगु गाउन फिनां छम्ह म्ये हालामि कथं हे थुगु म्युजिक भिडियोलय् कल्पना खनेदइ । थुगु म्येय् नेपालभासाया ख्यःया नांजाःम्ह निर्देशक रविन्द्र शाही न्हापांखुशी छम्ह मोडल कलाकार कथं खने दइ । अथे हे मेम्ह लोकंह्वाःम्ह कलाकार रेश्मी महर्जन नं थुकी दु । थुगु म्येय् पल्पसा डंगोलया रेष्टुरेन्ट नेपाली भोजनय् शुट जूगु खः ।
म्येया निर्देशक राजन शाही खःसा म्येया छायाँकन एवं सम्पादनय् मनोजरत्न शाही दु अले म्येया परिकल्पना दर्शनवीर शाक्यं यानादीगु दु । म्युजिक भिडियो ख्यलय् स्वम्हेसिया थुगु पुचःया थ्व खुगूगु देछाः खः ।
सामाजिक संजालय् गायन पाखें थःत न्ह्यब्वयाच्वंम्ह कल्पना श्रेष्ठं थुगु म्ये लकडाउनया इलय् रेकर्ड यानादीगु खः । म्येया भाव कथं छम्ह मतिनामि थः योम्हेसित छेँ हे पियाच्वंगु व मिजं विदेशय् वनाच्वंगु भाव दुथ्यानाच्वंगु दु। थुगु म्ये पेजथ्रीया सम्पादक दर्शनवीर शाक्यं च्वयादीगु खः । म्येया कम्पोज बिजय कायस्थं यानादीगु खः अले संगीत संयोजन जुगल डंगोलं यानादीगु दु । थुगु म्ये आर्टोम्युज स्टुडियोय् रेकर्ड जूगु खः ।
