नेपालभासा ख्यलय् छगू बिस्कं सवाः बिइगु ताःतुनां निर्माण जूगु म्ये खः छु जुल रे .. । नेपालभासाया म्युजिक भिडियाे धायेवं मिजं व मिसा अले गायक गायिका च्वनां सिधयेकेगु प्रवृतिया अःख थुगु म्येय् छगू लाइभ सेट दयेका हे निर्माण याःगु दु ।
नेपालभासाया मनाेरंजन ख्यलय् न्हूगु पुस्ताया स्वम्ह युवाः राजन शाही, मनाेज रत्न शाही व दर्शन वीर शाक्य या संलग्नताय् तयार जूगु थुगु म्ये खः । थुगु हे पुचलं नेपालभासा ख्यलय् द मिथ जीराे, इन्द्रायणी थें जाःगु शर्ट मूभी दयेके धुंकुगु दुसा छन्त जिगु माया मदुला थें जाःगु ज्वः म्युजिक भिडियाे नं दयेके धुंकुगु दु । थ्व हे झ्वलय् थेच्वया बालकुमारी चपाः छेँया चुकय् भव्य सेट निर्माण याना छु जुल रे म्ये तयार याःगु खः ।
रत्नशोभा महर्जनया सः, जिवित जल्मिया लय् व संगीत संयोजन अले दर्शनवीर शाक्यया च्वसाय् तयार जूगु थुगु म्येया भिडियोया प्रिमियर जूगु खः । मेलोडी स्टुडियोलय् रेकर्डिंग जूगु थुगु म्येया रेकर्डिस्ट सुरेन्द्र श्रेष्ठ खः ।
म्येया भाव कथं छम्ह मिसायात छम्ह मिजं ययाः उम्ह मिजंयात मांवनाच्वंगु दु। नकतिनि मतिना जुयाः थः योम्ह मिजं न्ह्याथाय् नं खँ थें जुइगु लिसें अन्तय् धात्थें खःसां थः अझ नं अतःमतः कनाच्वंगु भाव थुकी दु । म्येया मू आकर्षण रविना तुलाधर खः । रविनां हे रुपेन श्रेष्ठ ययाः मात्तुमाःवनिगु खः ।
न्हू प्रतिभा अले थुगु म्येया मू अाकर्षण रविना तुलाधरया थ्व निक्वःगु म्युजिक भिडियो खः । थ्व सिबें न्हापा रविनाया छन्त जिगु माया मदुला.. म्ये लोकंह्वानाच्वंगु दनि । नेपालभासा ख्यलय् थःगु सेल्लागु उपस्थीति रविनां ब्वयाच्वंगु दु । थुगु म्ये रूपेन श्रेष्ठया स्टारडमं थुगु म्ये झन् हे ल्ववनापुसे च्वंका ब्युगु दु । रूपेनया स्टारडमं म्येयात थप अाकर्षक दयेकाब्युगु दु । रूपेन स्क्रीनय् वयेवं हे लुइँ नस्वाः लु थें च्वंक गनं धायेथाय् मदु ।
थुगु म्येया निर्देशन राजन शाहीं याःगु दु । म्येया छायाँकन व सम्पादन मनोजरत्न शाहीं याःगु दु । मेकअपय् उमिसा पाण्डे ‘उमेश’ दुसा थुगु म्युजिक भिडियोया निर्माण नानिमैंया तुलाधर व राजेश महर्जनं यागु खः । पोष्ट प्रोडक्शनया ज्या फोटो क्यानभास नेपालं याःगु खः ।
थुगु म्ये मुक्कं ३७म्ह कलाकार दु । म्येय् नेवाः ईंग्लिस स्कुल थेच्वया मस्त लिसें स्थानीयपिंसं नं साथ बियाच्वंगु दुसा मेमेपिं कलाकर नं थुकी दुथ्यानाच्वंगु दु । मस्तय्गु उपस्थीति व थेच्वया स्थानीय बासी नं म्युजिक भिडियाेया हे ब्व जुयाः न्ह्यानाच्वंगु दु ।
