नेपालभासा चिहाः संकिपा कासा ११३९य् न्हाप लाम्ह निर्देशक योवन शाक्यया न्हूगु चिहाः संकिपा नयेगु छु युट्युब पिदन । लकडाउनया हुनिं सहरय् म्वानाच्वपिं आर्थिक रूपं बिपन्न वर्गया समस्या न्ह्यब्वयातःगु दु ।
विश्वन्यंकं कोराेना भाइरसं अनेक कहर ब्वलंका च्वंगु दु । विशेषकथं न्हिं खना न्हिं नयेमाःपिनिगु जीवन दुष्कर जुयाच्वंगु दु । उकिसनं सरकारं लकडाउन धकाः जनतायात छेँ नं पिहाँ वये मदइगु नियम जारि यायेवं छेँय् छेँय् मनूत राेगं स्वयां पित्याया समस्यां अप्वः ग्रसित जुयाच्वंगु चिन्ता ‘नयेगु छु’ नेपालभाषाया चिहाः संकिपाय् न्ह्यब्वयातःगु दु ।
नेवाः यूट्युवया न्ह्यब्वया योवन शाक्यया ११.३४ सेकेण्डया ‘नयेगु छु ?’ वास्तविक जीवनया यथार्थ खः । योवन शाक्यया निर्देशन व सम्पादनय् तयार जूगु थुगु चिहाः संकिपाय् सुरज ब्यन्जनकार व राेजीना सुवालया अभिनय बांला जू । सिने प्रावधिक पक्ष नं स्तरीय जू ।
‘नयेगु छु ?’ चिहाः सिनेमा मूलत विपन्न नेवाःपरिवार केन्द्रित याना निर्माण यानातःगु दु ।बेराेजगारया कारणं नयेत हे मदुगु मूल चित्रण खः । तर थुकिया प्रतिनिधि परिवार नेवाः परिवार जुयाच्वंगु व नेवाः समाजय् पारिवारीक मिसा हिंसाया पृष्ठभूमि न्ह्यथनातःगु खँय् चिन्तन यायेमाःगु आवश्यक दु । समस्या न्ह्याःगु हे तःधंगु खःसा ‘मिसा हिंसा’ संस्कार आम मनूतय् दथुइ स्वीकार्य मजुइगु खँ थुइकेमाः ।
नेपालभाषा प्रचारया खँय् चिहाः सिनेमा छगू सशक्त माध्यम खः । थुकि बीगु सन्देश विश्वया कुँ कुलामय् थ्यनाच्वनी । कोराेना महामारीं नेवाःतय्गु जनजीवन नं प्रभावित जुयाच्वंगु दु । नेवाः समाज थवं थवय् सहयोगि जुयाः न्ह्यानाच्वंगु सन्देश नं थुकि दु । आपत विपतय् ग्वहालि यायेगु नेवाःतय् सकारात्मक सोचाइ व व्यवहार दु । तर थ्व समस्याया समाधान स्थायी जुइमखु । लकडाउनया इलय् नं थुलि सोचया चिहाः सिनेमा निर्माण याना नेवाः संकिपा ख्यः चलायमान यानातःगु खँय् नेवाः यूट्युवया पुचः सुभाय्या पात्र खः ।
