संकिपाः बसन्त ऋतु पाखें यक्व हे न्हूपिं कलाकार व वरिष्ठ निर्देशक पवन जोशीया उत्साहा आकांक्षा स्वानाच्वंगु खः । धुँ दे प्रोडक्शन प्रालि किपूया न्ह्यब्वया थुगु प्याखँ पाखें बसन्त ऋतुया हे ई लाका थुगु प्याखँ पिथंगु दु ।
प्याखँया बाखँ
प्याखँया बाखं कथं निम्ह पासा बसन्त व हेमन्त दइ । निम्हेसिया थः थः हे गर्लफ्रेण्ड दइ सुभद्रा व ऋतु । बसन्तया व्याहा शुभद्रा नाप क्वछिइ । अंगू न्ह्याकः वनिगु इलय् हेमन्तं शुभद्रायात खनां मिखा तइ । थ्व हे इलय् धाःसा हेमन्त पाखें ऋतुया प्वाथय् दये धुंकी । हेमन्तं ऋतुयात हेयेका बसन्तया छेँय् तये यंकी तर समाजं बसन्तया हे कलाः धकाः थुइकी । हेमन्तं शुभद्रा नाप व्याहा याइ । बसन्तं ऋतुया मचायात समाजया न्ह्योने थःगु नां बिइ । ईया अन्तराल लिपा हेमन्त व शुभद्राया म्हाय् अले ऋतुया काय् दथुइ मतिना जुइ तर जब व्याहाया खँ जुइ निम्हं दाजु व क्येँहे धकाः सिइ । प्याखँ क्वचाइ ।
थ्री एक्ट स्टेज कथं प्याखँया स्वरूपय् बाखँ दु । तर नं गुगु ढंगं प्याखँ न्ह्येब्वये माःगु खः व कथं प्याखँ सल्ल मवं । थथे जूगु मू कारण धैगु हे प्याखँया टाइम फ्रेमयात निर्देशकं न्ह्यब्वये मफूगु खः । थुगु प्याखँ शुरुया इलय् नेपाल मण्डल टिभिइ समाचार व फेशबुकया छ्यलाबुला यानातःगु कथं शुरुया ब्वः वा फस्र्ट हाफ थौंया युग खः । तर जब सेकेण्ड हाफ थ्यनी फिल्म २० बर्ष लिपा थ्यनी तर परिवेश छुं पाःगु मदु । ई पात धकाः क्यनेत छुं उल्लेखनीय कुतः मजुसा ऋतुया प्वाथय् मचा दुगु ई व मचा बुइगु ई केवल लच्छि निला जक हे पाःगु क्यनातःगु दु । थुकीं सिइ दुकी प्याखँया पटकथा भचाः छ्वासु ।
चरित्र
प्याखँया मू चरित्र प्याखँया नां कथं बसन्त व ऋतुया खः । ऋतु (अनु महर्जन)या चित्रण थुकी छम्ह स्वच्छन्द मिसा कथं थः योम्ह लिसे व्याहा यायेत छेँ त्वते तकं तयार धकाः क्यनातःगु दु । थःगु जीवन थः यःथे म्वाये धकाः धैम्ह मिसा । तर प्याखनय् धाःसा बसन्त (किशोर चिपालु) नापलायेवं हेमन्त (राजी महर्जन) मदुगु छुं दुःख तकं नं खंके थाकु । अस्पतालय् यंकीबलय् फोन छगू मल्ह्वंगु अले नापलाः वंसां छेँ तालंग्वयातःगु । बसन्तयात नं थःगु इन्गेजमेन्ट जुइ धुंकाः हे नं छम्ह याकः मिसायात थःगु छेँ तयेगु छुं आपत्ती मदुगु ला जू हे जुल लिसें थः मतिनामियात व समाजया न्ह्योने नं नालेकायेत छुं आपत्ती खने मदु । म्ह हे मस्युम्हेसित अथें थः मचा नालेत नायकया गुण १९८०या बलिउडया नायकया गुण लिसे जक ज्वः लाः । सुभद्रा (शोभा महर्जन)या रोलयात थुगु संकिपाय् प्राथमिकता बियातःगु दु । प्याखँया नां बसन्त ऋतु । सुभद्रां बसन्त लिसे अझ धाये इहिपा क्वछिइ धुंकाः छगू नं संवाद तकं मदु । थौं कन्हेया इलय् थःगु मनय् ब्वंलंगु शंकाः तकं नापलाना मन्यंसे सम्बन्ध हे त्वाथलेगु धैगु छगू हास्यास्पद खने दु । प्याखँयात न्हाकेत न्ह्यां न्ह्यां थे बाखंयात साला यंकुगु खनेदु ।
निर्देशन
पवन जोशीया निर्देशनय् बसन्त ऋतु पिदंगु खः । थुगु प्याखया लेखक नं वय्कः हे खः । प्याखया बिषय बस्तु स्वइबलय् थौंया इलय् थुकथं स्थीति दइ मदइ धायेगु छखे दु तर प्याखंनय् कलाकारपिं सकसितं हे निदेशकं थःम्हं धाथे निर्देशन याका तःगु खने दु । हरेक कलाकारया एक्ंिटय् लगभग छगू हे कथंया छाप दु । डाइलग डेलिभरी तकं वहे कथंया छाप दु ।
एक्टिंग
बसन्त ऋतु संकिपाय् कलाकारपिंसं औसत कथं हे जक प्रदर्शन यानाच्वंगु दु । झीके अझ नं व्यवसायिक कलाकार मदुनी वा प्याखनय् काये मफुनि धैगु संकेत खः । कलाकार थःगु चरित्रय् दुबिनेत अझं भचा मेहनत याये मानीगु खने दु । सुं प्रशिक्षण कयातःपिं कलाकार मखुगुलिं थुलि एक्टिंग याःगु नं छगू औसत प्रदर्शनया रूपय् नाले माः । तर थुकी दुपिं कलाकारयाके नं बिस्कं हे पोटियन्सिल खने दु मात्र थुकी पितबिइ मफयाच्वन ।
सः
प्याखनय् बेवास्ता वा न्याये याये मफुगु छगू पक्ष प्याखँया सः वा साउण्ड खः । प्यानय् म्वाःगु थासय् सः तःसः यानातःगु दु सा सलं गुलि ज्या बिइमाःगु खः उलि काये मफु । साउण्डया डिटेलय् ध्यान बिल तर साउण्ड भ्यलय् मपुंगु ।
सम्पादन
प्याखँया मेगु कमजोर पक्ष प्याखँया सम्पादन नं खः । म्वाःसां म्वाःसां दृष्यत ताः हाकः यानातःगु दु । गुलि प्याखँयात सम्पादन यायेमाःगु खः सम्पादन यायेत नुगः स्याकुगु खने दु। म्वाःसां म्वाःसां एक्सट्रा कलाकारपिंत यक्व फुटेज बियातःगु खंके फइ ।
संवाद
प्याखँया संवादय् थौंकन्हेया भाय्या प्रभाव यक्वं दु । संवाद सिरियस जुसां दृष्य धाःसा मजु । जुन गोरुको सिंह छैन त्यसको नाम तिखे खँत्वाःयात नेवाः भासं हिइका न्ववाइ बलय् गथे जुइ बिचायाये थाकु मजू । अथे हे छिमःबुयात फोनयाना च्वनागु धकाः छम्ह मांनं थः म्ह्याय् यात धायेगु नं साप मछिं ।
लिखँ
समग्रय् बसन्त ऋतु संकिपा नेपालभासाया संकिपालय् छगू विशुद्ध पारिवारीक मेलो ड्रामा दयेकेगु कुतः जुयाच्वंगु दु । गृहणी वा सिरियल स्वइ पिंत प्रभाव लाके फु । प्याखँ पाखें यक्व हे नेवाः कलाकारतय्सं डेब्यु याःगु दु । थ्व ख्यलय् कलाकार म्हो जुयाच्वंगु इलय् थुकीया कलाकार पिंसं छगू न्हूगु आस बिइफु ।
