येँ महानगरपालिका, युनेस्काे, काठमाडाैं सिटी अफ फिल्मस् या मंकाः ग्वसाः लिसें नेपाः डान्स एकेडेमी, बाैद्ध दर्शन अध्ययन पुचः व नेपाः सांस्कृतिक पुचःया सहकार्यय् जमल स्थीत राष्ट्रिय नाचघरय् छगू ऐतिहासिक ज्याझ्व चर्या प्रवाह क्वचाल । ज्याझ्वः बौद्ध दर्शन व नृत्यया ख्यलय् विशेष योगदान बिया वयाच्वनादीम्ह गुरु यज्ञमान पति बज्राचार्ययात विशेष सम्मान याःगु खः । ज्याझ्वलय् कलाकारपिन्सं चर्या नृत्य न्ह्यब्वसें गुरुजुया योगदानप्रति सम्मान प्वंकूगु खः ।
ज्याझ्वलय् न्ववानादिसें गुरु यज्ञमान पति बज्राचार्यं “थौंया परिवेशय् देवदेवीपिनिगु अलौकिक उपस्थिति महसुस जुयाच्वंगु दु, थुज्वःगु आध्यात्मिक व सांस्कृतिक ज्याझ्वःत तसकं दुर्लभ जूगु दु । थौं जिं थःगु जीवनया अर्थ थुइकागु दु ।” धकाः कनादिल । वय्कलं काठमाडौं महानगरप्रति नं विशेष आभार प्वंकादिसें थौं मनूया रुपय् जन्म जूगुया अर्थ गहन अनुभूति जूगु धयादिल ।
ग्वसाः खलःपाखें कार्यवाहक प्रमुख सुनिता डंगोलं गुरु यज्ञमान पति बज्राचार्यं छुं नं जाति, उमेर, वर्ग वा समुदायया भेदभाव मयासे सकसितं समान रुपं शिक्षा बिया वयाच्वनागु खँ कनादिल । वय्कलं संस्कृति संरक्षणया नितिं निरन्तर सक्रिय जुयादीम्ह गुरुयात सम्मान यायेगु नितिं थज्याःगु ज्याझ्वःया ग्वसाः ग्वयादीगुलिं सकल कलाकारपिन्त सुभाय् देछानादीगु खः ।
