विरज महर्जन नेपालभाषा ख्यःयाम्ह छम्ह उदीयमान गायक खः । वय्कलं पेजथ्री पिपल्स च्वइस अवार्ड ११३७य् उत्कृष्ट नव प्रतिभाया सिरपा नं त्याकादीगु खः । थौंकन्हे वय्क अष्ट्रेलियाय् आखः ब्वनाच्वंगु दु । इलय् ब्यलय् वय्क नेपालय् झायाःच्वनिं अले छपू, निपू म्ये रेकर्ड यानाः वनिं । थथे हे थुगुसी नेपाः झायादीबलय् वय्कलं नक्कलिम्ह मय्जु व तिमि आउने बाटो भरी बोलया निपू म्ये रेकर्ड यानादिगु खः सा थुगु हे निपुं म्येया भिजुअल सिटिसि मलय् प्रिमियर जूगु खः ।
गोदावरी नगरपालिका अन्तर्गत थेच्व निवासी विरज महर्जन, थुगु प्रिमियर ज्याझ्वलय् मदुसां वय्कःया मां बाःपिं विनोद महर्जन व रत्नकुमारी महर्जनं थौंया प्रिमियरया नितिं फुक्कं हे व्यवस्थापन यानादीगु खः । ज्याझ्व ताः लाकेगु निंतिं गोदावरी नगरपालिकाया मेयर गजेन्द्र महर्जन इलय् हे थ्यंकः झायादीगु खः। विरज छम्ह तसकं हे क्षमता दुम्ह म्ये हालामि खः धकाः ज्याझ्वःलय् पाहाँकथं उपस्थीत जुपिं सकलें अतिथिपिंसं छगू मतं सः तयादीगु खः ।
निपुं म्येया संगीतकार एवं संगीत संयोजक जुगल डंगोलं विरजया नेवाः म्ये प्रतिया लगावया बारे कनादीगु खः । ईया व्यस्तताया कारण विरजं निन्हु स्वन्हुया दुने हे म्ये क्वचायेका अष्ट्रेलिया लिहांवंगु खँ कुलादिल ।
खस नेपाली म्येया संगीतकार बद्री देसारं १२ १३ बर्ष न्ह्यः ललितकला क्याम्पस पाखें म्ये धेंधेंबल्लाकासाय् ब्वति कयागु खँ कुलादीगु खः ।
मू पाहां गजेन्द्र महर्जनं थेच्वय् आपलं हे कलाकारपिं दुगु खँ कुलादिसेँ विरज नं आः थेच्वयाः हे छम्ह लोकंह्वाःम्ह कलाकार कथं दँ वःगु खँ कनादील ।
नेवाः म्यूजिक भिडियो नक्कलिम्ह मय्जु स मनोज महर्जन व हसना महर्जनया अभिनय दुसा म्ये रामकृष्ण खड्गीं निर्देशन यानादीगु खः अले म्ये सुरजवीर बज्राचार्यं च्वयातःगु खः ।
नेपाली म्यूजिक भिडियो तिमि आउने बाटो भरी अभिषेक जोशी व मिशेल घिमिरे लिसें कृष्णभक्त महर्जनया अभिनय दुसा थुगु म्ये सयद कार्किं निर्देशन यानातःगु खः ।
