एतिहासिक नगर जलय् अर्थात हरिसिद्धिइ शनिवार स्वपू नेवाः म्येया प्रिमियर जुल । शिलाचर्हे पाहाँचर्हे , स्वाँया वासना व छंगु रुप खना बोलया स्वपू म्युजिक भिडियो प्रिमियर जूगु खःसा ज्याझ्वःलय् मू पाहां कथं वरिष्ठ सिने पत्रकार विजयरत्न असंबरे मूपाहाँ कथं झायादीगु खः ।
जलया तबला गुरु निरन्जन महर्जनया सभानायसुइ न्ह्याःगु पितब्वज्या ज्याझ्वलय् विशेष पाहाँपिं समता संगीत साधना केन्द्रया तुलसी महर्जन, हरिसिद्धि भजन मण्डलया सचिदानन्द महर्जन, समाजसेवी महेन्द्र श्रेष्ठ व मंगल महर्जन, नांजाम्ह संगीतकःमि जिवित जल्मी, म्येहालामि अशोक महर्जन व म्ये हालामि राजेन्द्र महर्जन पिन्सं नुगःखँ तयादीगु खः।
पितब्वज्या जूगु शिलाचर्हे पाहाँचर्हे म्ये अशोक महर्जनं व राजेन्द्र महर्जनं हालातःगु खःसा विष्णु जल्मीं च्वयादीगु व लसय् नं हनातःगु खः । म्येय् निरन्जन महर्जन ‘कुमारी’या संगीत संयोजन, किपालुमि रबिन डंगोल, निर्देशन व सम्पादन बि के जल्मिं यानादीगु खः । म्येय् विश्वनाथ महर्जन, विक्रम महर्जन लगायतया कलाकारपिन्सं म्हितातःगु दु ।
स्वांया वासना म्ये अशोक महर्जन काकें हालातःगु खः । म्येच्वमि कृष्णराम महर्जन, संगीत निरन्जन महर्जन ‘कुमारी’, संगीत संयाेजन जीवित जल्मि, किपालुमि व सम्पादन बि के जल्मि, कोरियोग्राफि व निर्देशन सुरज नापितं यानातःगु दु । किशोर चिपालु व रोजिना सुवाल, रविन डंगोलया अभिनय थुकी दु ।
छंगु रुप खना बोलया म्ये राजेन्द्र महर्जन व दिपा महर्जनं हालातःगु खःसा म्ये च्वमि व लय् चिनामि निरन्जन महर्जन ‘कुमारी’, किपालुमि व सम्पादन साेहन मानन्धर, कोरियोग्राफि आराध्य लक्ष्मी खडगीं यागु खः । म्येय् राजु महर्जन , आराध्य लक्ष्मी खडगी व पूर्णकाजी ज्यापु या नापनापं कलाकार आराध्य लक्ष्मीया मां सुर्जलक्ष्मी अबु राम खडगी अले मचा कलाकारपिं समर्पण गमाल व रोजिशा बलामि, सिम्रिक श्रेष्ठं अभिनय यानादीगु दु । थुगु म्येया निर्देशन जितेन्द्र महर्जनं यागु खः ।
नुगःखँ तयेगु झ्वलय् मूपाहाँ असंबरें नेपालभाषाया सांगितिक व साँस्कृतिक ख्यलय् हरिसिद्धि जलया कलाकःमि पिनिगु ज्वमदुगु योगदान दु धका धयादिसे थाैंया कलाकारिता आर्थिक समृद्धिया निंतिं जुयाः वनेमाः धकाः धयादिल ।
