सुरज व्यंजनकार – छम्ह माेडल, कलाकार, संगीतकार, म्ये हालामि लिपा अाः छम्ह निर्देशक कथं नं दंवःगु दु । मिसा व तिसा नांया छगू एक्सपेरिमेन्टल शर्ट मूभी सुरज ब्यंजनकारं दयेकुगु खः । थुगु प्याखँयात छाय् एक्सपेरिमेन्टल धाये छिं धाःसां लकडाउनया इलय् यलया खपिन्छे त्वाः परिवार, उगु त्वाः गन सुरज ब्यंजनकार च्वनिं, व त्वाःयापिं जानाः छगू शर्ट मूभी मिसा व तिसा दयेकुगु खः । कलाकार व प्राविधिक तकं व हे त्वाः यापिं जानां दयेकुगु खः ।
थुगु हे प्याखँया प्रिमियर याेमरि पुन्हिया लसताय् खपिन्छे त्वाःलय् हे जूगु खः। थुगु संकिपाया पटकथा नं सुरज ब्यञ्जनकारं च्वगु खःसा हरि महर्जनं सिनेमाटोग्राफी व सम्पादन यागु खः । कलाकार कथं थुकी बिन्की डंगोल, रबिसन महर्जन, किरण महर्जन, सरु महर्जन, शान्ति महर्जन व सानु महर्जनं अभिनय यानादीगु खः । पिक्स प्रोडक्शन स्टुडियो व आजु प्रोडक्शनया थ्व मंका कुतः खः ।
यल महानगरपालिका वडा नं ९ या वडा अध्यक्ष राजु महर्जन मूपाहाँसुइ जूगु ज्याझ्वलय विशेष पाहाँ कथं त्वाःया मूगुरु अष्टलाल महर्जन, चिच्याः मोतिलाल महर्जन, नेवाः पत्रकार राष्ट्रिय दबूया केन्द्रिय अध्यक्ष सुरजवीर महर्जन नापं वरिष्ठ सिने पत्रकार विजयरत्न असंबरे झायादीगु खः । ज्याझ्वः नातिभाई महर्जनया नायोसुइ जूगु खः ।
थुगु चिहा प्याखं न्यंकं बाखंया लिधँसाय् दयेकातःगु खः । थुगु प्याखँ याकनं हे युट्युबय्र पिहांवइगु जानकारी सुरज ब्यंजनकारं बियादीगु दु ।
